އިންޑިއާގެ ރައީސް ދަޢުވަތަކަށް ކުރެއްވި ފުރަމާނަ  ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން އެނބުރި ރާއްޖެ ވަޑައިގެންފި

އިންޑިއާގެ ރައީސް ދަޢުވަތަކަށް ކުރެއްވި ފުރަމާނަ  ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން އެނބުރި ރާއްޖެ ވަޑައިގެންފިއެވެ.

ވަޒީރުންނާ ސަރުކާރުގެ އިސް ވަފުދެއް ބައިވެރިވެރިވެވަޑައިގެންނެވި މި ދަތުރުފުޅު ނިންމަވާލެއްވުމަށްފަހި ރައީސް ރާއްޖެ ވަޑައިގަތީ މިއަދުގެ ވަގުތެއްގައެވެ. 

މި ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދަޢުވަތައް އިންޑިއާއަށް ކުރެއްވި 5 ދުވަހުގެ ރަސްމީ ދަތުރުފުޅެކެވެ. މި ދަތުރުފުޅުގައި އިންޑިއާގެ ރައީސާއި، ބޮޑު ވަޒީރާއި އެ ޤައުމު އިސްވެރީންނާއި ބައްދަލުކުރައްވައި، ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަޝްވަރާކުރައްވާފައި ވެއެވެ. އެއާއެކު އިންޑިއާގެ ހަތަރު ސިޓީއެއް ކަމުގަވާ ނިއުދިއްލީ، އާގްރާ، މުންބާއި އަދި ބެންގަލޫރުގައި ރަސްމީ ބައްދަލުކުރެއްވުންތައް ކުރިއަށްގެންގޮސްފައިވެއެވެ. އެ ސިޓީތަކަށް ކުރެއްވި ދަތުރުފުޅު ތަކުގައި އެ ސިޓީގައި ދިރިއުޅޭ ދިވެހިންނާއި އެކި ބޭނުންތަކަށް އިންޑީއާއަށް ގޮސްފައިތިބި ދިވެހިންނާއި ރައީސް ވަނީ ބައްދަލުކުރައްވާފައެވެ. މި ބައްދަލުކުރެއްވުންތަކުގައި ދިވެހިންގެ ޙަލަތު ބައްލަވާ އެހީތެރިކަން ބޭނުންވާ ކަންކަން އޮޅުންފިލުއްވާފައިވެއެވެ.

ދަތުރުފުޅުގެ ތެރެއިން މުހިންމު ކޮންފަރެންސްތަކެއްގައި ރައީސް ބައިވެރިވެ ވަޑައިގެންނެވިއިރު ދެޤައުމުގެ ގުޅުން ވަރުގަދަ ކުރުމާއި ރާއްޖޭގެ އިޤްތިޞާދު ހަރުދަނާ ކުރުމާގުޅޭ ގިނަ އެއްބަސްވުން ތަކެއްގައި ވަނީ ސޮއި ކުރައްވާފައެވެ. 

މި ދަތުރުފުޅުގައި ދިވެހި ވަފްދުގެ މެހެމާންދާރީގެ ހުރިހާ ކަންކަންވެސް ހަމަޖައްސަވައި ދެއްވާފައިވަނީ އިންޑިއާ ސަރުކާރުގެ ފަރާތުންނެވެ.  މި ދަތުރުފުޅާ ގުޅިގެން ރައީސް ވިދާޅުވީ އިންޑިއާއަށް ކުރެއްވި މި ފުރަމާނަ ދަތުރުފުޅަކީ ވަރަށް ކާމިޔާބު ދަތުރުފުޅެއް ކަމުގައެވެ. އަދި މި ދަތުރުފުޅުގެ ކާމިޔާބީ މިނެކިރުއްވީ ކަނޑައެޅުއްވި މަގުސަދު ޙާސިލްވެފައިވާތީކަމުގައި އެމަނިކުފާނު ވިދާޅުވިއެވެ. އެގޮތުން ދިވެހި ރައްޔިތުންނަށް ކަންކަން ފަހިވެގެންދާ ގޮތަށް، ދިވެހިރައްޔިތުންގެ ހައްޤުގައި، ރައްޔިތުންނަށް މުހިންމު ކަންތައްތަކަކަށް މަސައްކަތްތަކެއް ފެށި، މަގު ހުޅުވިގެންދިއުމަކީ މުހިންމު ކާމިޔާބެއްގެ ގޮތުގައި އެމަނިކުފާނު ސިފަކުރެއްވިއެވެ.