ކައުންސިލް ތެރޭން ބޭނުންވާ ކޮންމެ ކަމެއް ކުރަންވެސް ސަރުކާރުގެ އެއްބާރުލުން ލިބޭ - މޭޔަރ އާޒިމް

މާލޭ ސިޓީ ކައުންސިލް ހިންގުމަށްޓަކައި އެއްވެސް ދަތިކަމެއް ކުރިމަތި ނުވާކަމަށާއި ކައުންސިލް ތެރޭން ބޭނުންވާ ކޮންމެ ކަމެއް ކުރަންވެސް ސަރުކާރުގެ އެއްބާރުލުން ލިބޭ ކަމަށް މާލޭ ސިޓީކައުންސިލްގެ މޭޔަރ އާދަމް ޢާޒިމް ވިދާޅުވެއްޖެއެވެ.

ކުޅުދުއްފުށީ ސިޓީގައި ކުރިއަށްދާ މޯލްޑިވިއަން ޑިމޮކްރެޓިކް ޕާޓީ، (އެމްޑީޕީ)ގެ "ލާމަރުކަޒީ ގުޅުން – ކައުންސިލަރުންގެ ކޮންފަރެންސް" ގައި ވާހަކަ ދައްކަވަމުން ޢާޒިމް ވިދާޅުވީ ދަތިވާ އެއްވެސް ކަމެއް ނެތް ކަމަށާއި ޕާޓީގެ ކޮންސަލްޓަންޓުން ބޭނުން ވުމުން އެކަންވެސް ކުރެވުނު ކަމަށެވެ.

އަޅުގަނޑަކަށް ދަތިވާ ކަމެއް މިވަގުތު އަދި ހަމަނެތް ކައުންސިލް ތެރެއަކު. ހަމަ އަޅުގަނޑު ބުނާ ކަމެއް ވެއްޖާ ކޮށްދޭ. އަޅުގަނޑު ކޮންސަލްޓަންޓުން ނަގަން ބޭނުންވީމަ ބޭނުންވާ 15 ކޮންސަލްޓަންޓުން ނަގައިގެން ހަމަ އަޅުގަނޑުމެންގެ ޕާޓީގެ މެމްބަރުން އެތިބީވެސް. އެކަކު ނޫނީ. އަނެއްގޮތަކަށް ދަތިކަމެއް އަޅުގަނޑަކަށް މިހާތަނަކަށް ނެތް - މޭޔަރ އާޒިމް ވިދާޅުވިއެވެ. 

އާޒިމް ވިދާޅުވީ އެމްޑީޕީގެ 15 ކޮންސަލްޓަންޓުން ސިޓީ ކައުންސިލްގައި މަސައްކަތް ކުރަމުންދާ ކަމަށާއި، މާލޭ ރައްޔިތުންނާއި ގުޅުންހުރި ކަންކަން ކުރުމަށް ކަމާގުޅޭ އިދާރާތަކާއި ގުޅިގެން މަސައްކަތްކުރައްވާ ކަމަށެވެ.  

ރާއްޖެ ޓީވީން ވަގުތުން ގެނެސްދެމުންދިޔަ މި ކޮންފަރެންސްގައި މާލޭ ސިޓީގެ މޭޔަރ އާޒިމް ވާހަކަ ދައްކަވާ ނިންމާލެއްވުމުން އިދިކޮޅު އެމްޑީޕީގެ ޗެއަރ ޕާރސަން ފައްޔާޒު އިސްމާޢީލް ވަނީ އެމްޑީޕީގެ 15 ކޮންސަލްޓަންޓުންނަށް ވަޒީފާދިން ވާހަކަ އުނިކޮށްލެއްވުމަށް ސިޓީ ކައުންސިލްގެ މީޑިއާ މަސައްކަތް ކުރައްވާ އަދި އެމްޑީޕީގެ އެކްޓިވިސްޓެއް ކަމަށްވާ ޝަތުފާއަށް އަށް އަންގަވާފައެވެ.

ކޮންސަލްޓަންޓުންނަކީ ކަނޑައެޅޭ ވަކި މުސާރަ އަކަށް ކޮންޓްރެކްޓެއްގެ ދަށުން ވަޒީފާ އަދާކުރާ ފަރާތްތަކެެވެ. މި ވަޒީފާތަކަކީ ސިވިލް ސަރވިސް ވަޒީފާތަކެއް ނޫނެވެ.  އާންމު ގޮތެއްގައި ސިޓީ ކައުންސިލްގެ ކޮންސަލްޓަންޓުންގެ މުސާރައަކީ 20،000ރ އާއި 35،000 ދެމެދުގެ ޢަދަދެކެވެ.

އިދިކޮޅު އެމްޑީޕީގެ ޗެއަރ ޕާރސަން ފައްޔާޒު އިސްމާޢީލް ވިދާޅުވީ "ސަތޫ ވީޑިއޯ ކޮޅު ޓްވީޓް ކުރައްވަންޏާ އެޑިޓް ކޮއްލައްވައްޗެ އަޅުގަނޑުމެންގެ ޕާޓީގެ މެމްބަރުންނަށް ކޮންސަލްޓަންސީ ވަޒީފާ ދިން ތަންކޮޅު" މިހެންނެވެ.

ރާއްޖެ ޓީވީން ލައިވް ކުރަމުންދިޔަކަން އެނގި ނުލައްވާ ފައްޔާޒު މިހެން ވިދާޅުވީ ފަހުން އެކަން އެނގުމުން ހިތްހަަމަ ނުޖެހުނު މަންޒަރު ލައިވްގައި ފެނިގެން ދިޔައެވެ. އެމްޑީޕީގެ މި ކޮންފަރެންސަކީ 2028 ވަނަ އަހަރުގެ ރިޔާސީ އިންތިޚާބުގައި ރާއްޖޭގެ ވެރިކަމަށް އާދެވޭނެގޮތެއް އޮތްތޯ ބެލުމަށް ބާއްވާ ކޮންފަރެންސެއް ކަމަށް އެމްޑީޕީގެ ކުރީގެ ރައްޔިތުން މަޖިލީހުގެ މެމްބަރެއް "ދިޔަރެސް" އަށް މަޢުލޫމާތު ދީފައިވާ ކަމަށް އެނޫހުން ރިޕޯޓްކޮށްފައިވެއެވެ.