މުވައްޒަފުން ފުރިހަމަކުރި ތަމްރީނު ޕްރޮގްރާމާއެކު ފާގަތި މުސްތަޤުބަލަކަށް ހަރުދަނާ ލީޑަރޝިޕެއް އުފެދިގެންދާނެ- ފަހުމީ

ސްޓެލްކޯގެ މުވައްޒަފުން ފުރިހަމަކުރި ތަމްރީނު ޕްރޮގްރާމާއެކު ފާގަތި މުސްތަޤުބަލަކަށް ހަރުދަނާ ލީޑަރޝިޕެއް އުފެދިގެންދާނެ ކަމަށް އެ ކުންފުނީގެ މެނޭޖިންގް ޑިރެކްޓަރ ހުސައިން ފަހުމީ ވިދާޅުވެއްޖެއެވެ.

އެކްސް މެދުވެރިކޮށް ޙިއްޞާކުރެއްވި މަޢުލޫމާތުގައިވާ ގޮތުން، މޯލްޑިވްސް ލީޑަރޝިޕް އެންހޭންސްމަންޓް ޕްރޮގްރާމްގެ 9 ވަނަ ބެޗްގައި ސްޓެލްކޯގެ 469 މުވައްޒަފުން ބައިވެރިވެ، ތަމްރީނު ފުރިހަމަކޮށްފައިވެއެވެ. މީގެ ތެރެއިން އެންމެ ފަހުން ބޭއްވުނު ސެޝަންގައި 51 މުވައްޒަފުން ބައިވެރިވެ، ގިރިފުށީ ޓްރެއިނިންގ ސެންޓަރުން ރައްކާތެރިކަމާއެކު އެނބުރި އައިސްފައިވާކަން ފާހަގަކުރެއްވިއެވެ.

މި ޕްރޮގްރާމް ނިންމުމުގެ ރަސްމިއްޔާތުގައި މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަލްފާޟިލް ޢަބްދުﷲ ރާފިޢު ބައިވެރިވެވަޑައިގެންނެވިއެވެ. އަދި މިޕްރޮގްރާމް ކުރިއަށް ގެންދިއުމަށް އެމްއެންޑީއެފްގެ ފަރާތުން  އެއްބާރުލުން ލިބޭކަން ފަހުމީ ފާހަގަ ކުރެއްވިއެވެ. މިކަަމަށްޓަކައި ޔޫތް މިނިސްޓަރ ރާފިޢު އަށާއި ސިފައިންގެ ޗީފް ކޮމާންޑަރު ރައީސް ޑރ. މުހައްމަދު މުއިއްޒަށް ވެސް ޝުކުރު އަދާކުރައްވާފައިވެއެވެ. 

ޕްރޮގްރާމްގެ ބައިވެރިން މި ތަޖުރިބާއާ ގުޅޭގޮތުން ޚިޔާލު ފާޅުކޮށްފައިވެއެވެ.  އެގޮތުން ގިނަ ޢަދަދެއްގެ މުވައްޒަފުން ވަނީ މިފަދަ ޕްރޮގްރާމެއް ކުރިއަށް ގެންދަވާތީ ކުންފުނީގެ އެމްޑީއަށް ޝުކުުރު އަދާކޮށްފައެވެ. އަދި މި ޕްރޮގްރާމްގެ ތެރެއިން ގިނަ ކަންކަން ދަސްވިކަމަށްވެސް ފާހަގަ ކޮށްފައިވެއެވެ. 

"ސްޓެލްކޯގައި މިފަދަ މުހިންމު ތަމްރީނު ޕްރޮގްރާމެއް ހިންގައިދެއްވީތީ އެމްޑީއަށް ޝުކުރިއްޔާ. މި ސެޝަންތަކަކީ ޙަޤީޤަތުގައިވެސް ވަރަށް އަގުހުރި ސެޝަންތަކެއް. އަޅުގަނޑުމެންނަށް ދިރިހުރުމަށް ބޭނުންވާ މުހިންމު ހުނަރުތަކާއި، ކުއްލި ޙާލަތްތަކުގައި އެންމެ އެކަށީގެންވާ ގޮތުގައި އަމަލުކުރާނެ ގޮތް މި ސެޝަންތަކުން ދަސްވެއްޖެ." ބައިވެރިއަކު ބުނެފައި ވެއެވެ. 

ފަހުމީ  ވިދާޅުވީ މިހާތަނަށް މިޕްރޮގްރާމް އަކީ ވަރުގަދަ ލީޑަރޝިޕެއް އުފެއްދުމަށާއި ފާގަތި މުސްތަޤުބަލެއް ބިނާކުރުމަށް ސްޓެލްކޯއިން ދެމެހެއްޓެނިވި ގޮތެއްގައި ކުރައްވަމުންމުން ގެންދަވާ މަސައްކަތެއް ކަމަށެވެ. މި ޕްރޮޮގްރާމުގައި މިހާތަނަށް 9 ބެޗަކުން 469 މުވައްޒަފުން ތަމްރީނު ކޮށްފައިވެއެވެ.