52 ޤައުމަކުން 76 ބައިވެރިން ވާދަކުރި މުބާރާތަކުން ތިންވަނަ ޝާޔާއަށް!

52 ގައުމަކުން 76 ބައިވެރީން ވާދަކޮށްފައިވާ ޤުރުއާން މުބާރާތުން ފާޠިމަތު ޝާޔާ މުޅި މުބާރާތުން ތިންވަނަ ހޯދައިފިއެވެ.

ފާޠިމަތު ޝާޔާ ޒާހިރު 3 ވަނަ ހޯދާފައިވަނީ މެލޭޝިއާގެ ވެރިރަށް ކުއަލަލަމްޕޫރުގައި މި މަހުގެ 5 އިން 12 އަށް ކުރިއަށްގެންދިޔަ 64 ވަނަ "މެލޭޝިއަން އިންޓަނޭޝަނަލް އަލްޤުރުއާން ރިސައިޓޭޝަން އެންޑް މެމޮރައިޒޭޝަން އެސެމްބްލީ" (އެމްޓީއެޗްކިއުއޭ) މުބާރާތުންނެވެ.

މި ކާމިޔާބީއާއި ގުޅިގެން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މެލޭޝިޔާގައި ބޭއްވި ބައިނަލްއަޤުވާމީ ޤުރުއާން މުބާރާތުގައި ރާއްޖެ ތަމްސީލުކުރި ދަރިވަރު،ފާޠިމަތު ޝާޔާ ޒާހިރު މުބާރާތުން ތިންވަނަ ހޯދާފައިވާ ކަމަށެވެ. އަދި މި އުފާވެރި މުނާސަބަތުގައި ޝާޔާއާއި އާއިލާއަށް ތަހުނިޔާއާއި ހެޔޮ ދުއާ ރައްދުކުރައްވާ ކަމަށާއި މިއީ ރާއްޖެއަށް ލިބުނު ފަޚުރެއް ކަމަށް ވަޒީރު ވިދާޅުވިއެވެ.

ފާޠިމަތު ޝާޔާ ޒާހިރަކީ މި އަހަރު ރާއްޖޭގައި ބޭއްވި ކީރިތި ޤުރުއާން ކިޔެވުމުގެ 36ވަނަ ޤައުމީ މުބާރާތުން ޙާފިޡުންގެ ބައިން އެއް ވަނަ ހާސިލްކޮށްފައިވާ ދަރިވަރެވެ. އަދި ފާޠިމަތު ޝާޔާ ޒާހިރަކީ މިދިޔަ އަހަރުގެ އޭޕްރީލް މަހު މިސްރުގައި ބޭއްވި ޤުރުއާން މުބާރާތަކުން ދެވަނަ ހޯދައިފައިވާ ދަރިވަރެކެވެ.