އިމިގްރޭޝަންގެ އޮޕަރޭޝަން: އިތުރު 9 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި

އިމިގްރޭޝަނުން ކުރިއަށްގެންދާ އޮޕަރޭޝަންގެ ތެރެއިން އިތުރު 9 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ވިދާޅުވީ ރާއްޖޭގައި ޤަވައިދާއި ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރިއަށް ގެންދާ އޮޕަރޭޝަންގައި ހުޅުމާލޭގެ ދިހަ ތަނެއް ބަލައި ފާސްކޮށް ނުވަ ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ. 

ނުވަ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސް ދިހަ ތަނެއް ބަލާ ފާސްކޮށްފައިވަނީ އިއްޔެ ހުޅުމާލޭގައި ކުރިއަށްގެންދިޔަ އޮޕަރޭޝަންއެއްގައެވެ. އިއްޔެގެ އޮޕަރޭޝަންގައި ވެސް އިމިގްރޭޝަނުން ވަނީ ފިހާރަތަކާއި ކެފޭތަކާއި ސެލޫންތައް ވެސް ބަލާ ފާސްކޮށްފައެވެ. 

މާލެ ސަރަޙައްދުގައި ކުރިއަށްގެންދާ އޮޕަރޭޝަންގައި އިމިގްރޭޝަނުގެ އޮފިސަރުން މަގުތަކަށް ނިކުމެ ޤަވާޢިދާ ޚިލާފަށް ޢަމަލުކުރަމުންދާ ގިނަ ޢަދަދެއްގެ ބިދޭސީން ހައްޔަރުކޮށްފައިވެއެވެ.ޤަވާޢިދާ ޚިލާފަށް ހިންގަމުންދިޔަ ބައެއް ވިޔަފާރިތަކަށް ޤަވާޢިދުގެ ތެރެއަށް ވަނުމަށް 1 މަސްދުވަހުގެ މުއްދަތެއް ދީފައިވާއިރު، މި މުއްދަތު ހަމަވާއިރު އެ އެތަންތަން ޤަވާޢިދާ އެއްގޮތަށް ޢަމަލުކުރަން ނުފަށައިފިނަމަ، ފިޔަވަޅުއަޅާނެކަމުގެ އިންޒާރުވެސް ދީފައިވާކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މީގެ ކުރިން ވަނީ ވިދާޅުވެފައެވެ.

ޤަވާޢިދާ ޚިލާފަށް މާލެ ސަރަޙައްދުގައި ދިރިއުޅެމުންދާ ބިދޭސީން، ފިލުމުގެ މަސައްކަތްކުރަމުންދާތީ އިމިގްރޭޝަންގެ އޮޕަރޭޝަންތައް ވަނީ އަތޮޅުތަކަށް ފުޅާކޮށްފައެވެ.ޤަވާޢިދާ ޚިލާފަށް ރާއްޖޭގައި އުޅެމުންދާ ބިދޭސީން ހޯދައި، މިހާތަނަށް 4000 އަށްވުރެ ގިނަ ބިދޭސީން ޑީޕޯޓް ކުރިކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދު ވަނީ ވިދާޅުވެފައެވެ.