ބީލަމުގެ އުސޫލުން ހުޅުމާލެއިން އިތުރު 18 ބިމެއް ވިއްކަން ހުޅުވާލައިފި

ބީލަމުގެ އުސޫލުން ހުޅުމާލެއިން އިތުރު 18 ބިމެއް ވިއްކަން ހުޅުވާލައިފިއެވެ.

ބީލަމުގެ އުސޫލުން  18 ބިމެއް ވިއްކުމަށް ހުޅުވާލާފައިވާއިރު، މީގެ ތެރޭގައި ހިމެނެނީ ބީޗްފްރަންޓް އަދި ބީޗް ސައިޑްގެ ބިމެވެ. މި ބިންތަކަކީ 1864 އަކަފޫޓާއި 2408 އަކަފޫޓުގެ ބިންތަކެކެވެ. މި ބިންތައް ވިއްކުމަށް ހަމަޖެހިފައިވަނީ ހުޅުމާލެ ދެވަނަ ފިޔަވަހީގެ ބީޗް ފަޅިންނެވެ.

ބިން ވިއްކަނީ ދެ މަރުހަލާއަކަށް ބަހާލައިގެންނެވެ. ފުރަތަމަ އޮންނާނީ އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމެވެ. ގަންނަން ހުށަހަޅާފައިވާ ބިމެއް އެއް ފަރާތަށް ވުރެ ގިނަ ފަރާތުން އީއޯއައި ހުށަހަޅާފައިވާ ނަމަ ދެން ޖެހޭނީ ބީލަން ހުށަހަޅާށެވެ. 

މި ބިންތަކަކީ ހަމައެކަނި ދިރިއުޅުމުގެ ބޭނުމަށް ދިވެހިންނަށް ވިއްކާ ބިންތަކެކެވެ. ބިމުގެ ބީލަން ފެށޭނީ އަކަފޫޓަކަށް 4000 ރުފިޔާއަށް ކަމަށް އެޗްޑިސީން ވިދާޅުވެއެވެ.  ހުޅުމާލެ ދެވަނަ ފިޔަވަހީގެ ބީޗް ފަޅިން ވިއްކާ މި ބިންތަކުގައި ބީޗްފްރަންޓް 2 ބިމަކާއި، ބީޗް ސައިޑް 16 ބިމެއް ހިމެނެއެވެ.

މި ބިންތައް ގަންނަން ބޭނުންވާ ފަރާތްތަކަށް އެޗްޑީސީގެ ބިޑް ޕޯޓަލް މެދުވެރިކޮށް އެޕްލިކޭޝަން ހުށަހެޅޭނެ ކަމަށް ވިދާޅުވިއެވެ. ދިވެހި އަމިއްލަ ފަރުދުންގެ އިތުރުން 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށްވެސް ބީލަމުގައި ބައިވެރިވުމުގެ ފުރުޞަތު އެޗްޑީސީން ވަނީ ހުޅުވާލާފައެވެ.

އެޗްޑީސީން ވަނީ ދާދި ފަހުން ހުޅުމާލޭ ދެވަނަ ފިޔަވަހިން ބީލަމުގެ އުސޫލުން ބީޗް ފްރަންޓުން ވިއްކާ ބިމާއި ބީޗް ސައިޑުން 16 ބިމެއް ވިއްކުމަށް އިޢުލާނު ކޮށްފައެވެެ.