ޚަބަރު
ރައީސް މުޢިއްޒުގެ ނިންމެވުމަށް ކުރީގެ ވަޒީރު މަޙްލޫފް މަރުޙަބާ ދަންނަވައިފި!
ކުރީގެ ޔޫތް މިނިސްޓަރ އަޙްމަދު މަޙްލޫފް. ފޮޓޯ:ރައީސް އޮފީސް
ހުލާސާ
ރާއްޖޭގައި ވޭޕްކުރުމާއި ރާއްޖެއަށް ވޭޕް އެތެރެކުރުން މަނާ ކުރުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ނިންމެވި ނިންމެވުމަށް ކުރީގެ ޒުވާނުންނާއި ކުޅިވަރާ ބެހޭ ވަޒީރު އަޙުމަދު މަޙްލޫފް މަރުޙަބާ ދަންނަވައިފިއެވެ.
މަޙްލޫފް އެކްސްްގައި ކުރެއްވެވި ޕޯސްޓެއްގައި ވިދާޅުވެފައިވަނީ މަސްތުވުމާއި ދުންފަތުގެ އިސްތިއުމާލުކުރުމުގެ ވަބާގައި ޖެހިފައިވާ އެތައް ޒުވާނުންނެއް އަދި އެތައް ކުޑަކުދިންނެއް މިއަދު ރާއްޖޭގައި ތިބިކަމީ ހަޤީޤަތް ކަމަށެވެ.
ޚާއްސަކޮށް ވޭޕުކުރާ ކުޑަކުދިން އިންތިހާއަށް އިތުރުވާކަން، ސުކޫލުތަކުން ހޯދާ ވޭޕުގެ އަދަދުތަކުން ޔަޤީންވާ ކަމަށްވެސް މަޙްލޫފްވިދާޅުވެފައިވެއެވެ.
ވޭޕު ކުރުން ހުއްޓުވުމުގެ މަޤްސަދުގައި، ވޭޕުކުރަން ބޭނުންކުރާ ސާމާނާއި އޭގެ ވަކިވަކި ބައިތައް އެތެރެކުރުން ހުއްޓުވުމަށް ރައީސުލްޖުމްހޫރިއްޔާ ޑރ. މުޢިއްޒު ނިންމެވި ނިންމުމަކީ ރަނގަޅު ކަމެއްކަމަށްދެކި މަރުހަބާކިޔަން - މަޙްލޫފް ވިދާޅުވެފައިވެއެވެ.
މަސްތުވުމާއި ދުންފަތުގެ އިސްތިއުމާލުކުރުމުގެ ވަބާގައި ޖެހިފައިވާ އެތައް ޒުވާނުންނެއް އަދި އެތައް ކުޑަކުދިންނެއް މިއަދު ރާއްޖޭގައި ތިބިކަމީ ހަގީގަތް. ހާއްސަކޮށް ވޭޕުކުރާ ކުޑަކުދިން އިންތިހާއަށް އިތުރުވާކަން، ސުކޫލުތަކުން ހޯދާ ވޭޕުގެ އަދަދުތަކުން ޔަގީންވޭ.
— Ahmed Mahloof (@AhmedMahloof) October 14, 2024
ވޭޕު ކުރުން…
މިރޭ ރައީސް ޑރ މުޙައްމަދު މުޢިއްޒު ކުރައްވައިފައިވާ ޕޯސްޓެއްގައި ވިދާޅުވެފައިވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭ ބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އެމަނިކުފާނު އަންގަވައިފައިވާނެ ކަމަށެވެ.
