ކައުންސިލްތަކަށް ސަރުކާރުގެ އެއްބާރުލުން – ހެޔޮ ބަދަލެއް

އިންތިހާބުކުރެވިފައިވާ ކައުންސިލްތަކާއި ކައުންސިލަރުންގެ އެންމެ ބޮޑު ޝަކުވާއަކަށް އަބަދުވެސް ވެފައިވަނީ ސަރުކާރުގެ އެހީތެރިކަން ކައުންސިލްތައް ހިންގުމުގައި ލިބެމުން ނުދިއުމެވެ. އަދި ސިޔާސީ ގޮތުން ސަރުކާރާ އިދިކޮޅު ވިސްނުމެއްގެ ކައުންސިލެއް އޮންނަ ނަމަ އެކި އުނދަގޫތައް ކުރިމަތިކުރުވުމާއި ދަތިކޮށް މަސައްކަތަށް ހުރަސް އެޅުމެވެ. ރައީސް ޑރ. މުޙައްމަދު މުޢިއްޒަކީ ރައީސުލްޖުމްހޫރިއްޔާކަމަށް ވަޑައިގަތުމުގެ ކުރީގައި މާލޭ ސިޓީ ކައުންސިލްގެ މޭޔަރެވެ. އެއިރު ވެރިކަމުގައި އޮތް އެމްޑީޕީން އިންތިހާއަށް އުނދަގޫތައް ކުރިމަތިކުރަމުން ދިޔައިރުވެސް ރައްޔިތުންނަށް ހިދުމަތްތައް ފަހިކޮށްދެއްވި ހިންގުންތެރި މޭޔަރެވެ 

 އާދެ، އަޅުގަނޑުމެން އިރާދަކުރެއްވިއްޔާ، ސަރުކާރުން ކައުންސިލްތައް، ފުރިހަމަ މާނައިގައި ބާރުވެރިކޮށްދޭނަން. މިދިޔަ ދެމަހެއްހާ ދުވަހުވެސް މަސައްކަތްކުރީ އެ މަގުން. ކައުންސިލްތަކަށް އާމްދަނީ ހޯދައިދިނުމަކީ، އަޅުގަނޑުމެން އެންމެ އިސްކަންދޭނެ އެއް ކަންތައް.

މާލޭ ސިޓީ ކައުންސިލަށް އަލަށް ހޮވުނު މޭޔަރ އަދި ކައުންސިލަރުން ހުވާ ކުރުމުގެ ރަސްމިއްޔާތުގައި ރައީސް މުޢިއްޒު ވާހަކަފުޅުދައްކަވަނީ

 އަޅުގަނޑުމެން މިތިބީ އަޅުގަނޑުމެންނާ އެކީގައި، ކައުންސިލަރުން މަސައްކަތް ކުރަން ތިބިއްޔާ، އެ ކައުންސިލަރުންނާ އެކީގައި ރެޔާއި ދުވާލު މަސައްކަތް ކުރަން ތައްޔާރަށް. އިރާދަކުރެއްވިއްޔާ، އެކަން އެގޮތުގައި ކުރިއަށްދާނެ.

-  މާލޭ ސިޓީ ކައުންސިލްގެ މޭޔަރ އަދި ކައުންސިލް މެންބަރުން ހުވާކުރެއްވުމުގެ ދަރުބާރުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްކެވި ވާހަކަފުޅު

ރައީސް ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެން އެންމެ ބޮޑު އެއް އިސްކަމެއް ދެއްވީ ލާމަރުކަޒީ ބާރުވެރިކަން އިތުރުކޮށް ކައުންސިލްތަކުގެ މާލީ ފުދުންތެރިކަން އިތުރުކުރުމަށެވެ. އެމްޑީޕީ ސަރުކާރުން ކައުންސިލްތަކުގެ އިހުތިޞާސްއިން ވަކިކުރި ފަޅުރަށްތައް އަލުން ކައުންސިލްތަކާ ހަވާލުކުރިއެވެ. މާލީ ބާރުވެރިކަމުގެ އިތުރު ފުރުސަތުތައް ފަހިކުރިއެވެ. ކައުންސިލްތަކާ ސަރުކާރުގެ ގުޅުން ބަދަހިކޮށް ހިދުމަތްތަކާއި ތަރައްގީގެ މަސައްކަތްތަކުގައި އެއްބާރުލުން ބޮޑުކުރުމަށް ލާމަރުކަޒީ ވުޒާރާ އުފެއްދެވިއެވެ. ސަރުކާރާ ކައުންސިލްތަކުގެ ދުރުކަން ގާތްކުރެވި ހިދުމަތްތަކަށް ފަހިކަން ގެނެވުނެވެ. 

ސަރުކާރުގެ ލާމަރުކަޒީ ބާރުވެރިކަމުގެ މަސައްކަތްތައް ފެނި އެމްޑީޕީން ކުޅުދުއްފުށީގައި ލާމަރުކަޒީ ކޮންފަރެންސެއް ފެށިއެވެ. މައުލޫއަކަށްވީ ސަރުކާރުން ލާމަރުކަޒީ ނިޒާމަށް ހުރަސްއަޅަމުންދާކަމަށް ބުނުމެވެ. ދަތިތަކާ އުނދަގޫތައް ކުރާ ކަމަށް ބުނުމެވެ. އެހެން ނަމަވެސް ފެންނަން ނެތް ކަމެއްގައި އޮޅުވާލަން އުނދަގޫވާނެއެވެ. މާލޭ ސިޓީގެ މޭޔަރ އާދަމް އާޒިމް ވާހަކަފުޅު ދައްކަވަމުން ވަނީ ސަރުކާރުން މާލޭ ސިޓީ ކައުންސިލަށް ފުރިހަމަ އެއްބާރުލުން ދޭކަމަށް ހާމަކުރައްވާފައެވެ.  

ކައުންސިލް ތެރެއިން އަޅުގަނޑު ބުނާކަމެއް ވިއްޔާ ކޮށްދޭ. އަޅުގަނޑު ކޮންސަލްޓެންޓުން ނަގަން ބޭނުންވީމާ 15 ކޮންސަލްޓެންޓުން ނަގައިގެން ހަމަ އަޅުގަނޑުމެން ޕާޓީގެ މެމްބަރުން އެ ތިބީ ވެސް އެކަކު ނޫނީ – މާލޭ ސިޓީގެ މޭޔަރ އާދަމް އާޒިމް 

އެމްޑީޕީގެ ލާމަރުކަޒީ ގުޅުން ކޮންފަރެންސްގައި މޭޔަރ އާޒިމް ވާހަކަފުޅުދައްކަވަނީ

އާޒިމްގެ ވާހަކައިގައި ސަރުކާރުގެ ފަރާތުން މިހާތަނަށް އެއްވެސް ދައްޗެއް ކުރިމަތިވެފައި ނުވާކަން ފާހަގަކުރެއްވިއެވެ. އާޒިމްގެ ވާހަކަ ނިންމަވައިލެއްވުމުން ކޮންފަރެންސް ރިޔާސަތުގައި އިންނެވި އެމްޑީޕީގެ ޗެއަރޕާސަން ފައްޔާޒު ވަނީ އާޒިމްގެ ވާހަކަތައް ސޯޝަލް މީޑިއާގައި ހިއްސާކުރެއްވުމުގެ ކުރިން އެޑިޓް ކުރުމަށް އެދިލައްވާފައެވެ. އެގޮތުން އެމްޑީޕީގެ މެންބަރުންނަށް ކޮންސަލްޓަންޓުންގެ މަޤާމުދޭކަން ފާހަގަކުރައްވާ އާޒިމް ދެއްކެވި ވާހަކަފުޅު އުނިކުރުމަށްވެސް ފައްޔާޒު އެދިވަޑައިގެންނެވިއެވެ. ނަމަވެސް އެމްޑީޕީގެ މި ކޮންފަރެންސް ދިޔައީ ޓީވީ ލައިވް ކުރަމުންކަން އެނގިވަޑައިގަތުމުން ފައްޔާޒުގެ މޫނުމަތިން ވަނީ ހާސްކަން ފެނިފައެވެ. 

އާޒިމްގެ ވާހަކަތައް އެޑިޓްކޮށްފައި ސޯޝަލް މީޑިޔާއަށް ލުމަށް ފައްޔާޒު އެދުމުން އާންމުންގެ ބޮޑު ފާޑުކިޔުމަކާ އެމްޑީޕީއަށް ކުރިމަތިލާން ޖެހުނެވެ. އާންމުން ފާޅުކޮށްފައިވާ ހިޔާލުތަކަށް ބަލާއިރު ހިޔާލު ފާޅުކުރުމުގެ މިނިވަންކަން އެމްޑީޕީގެ ތެރޭގައި އޮތް މިންވަރާއި މެދު ސުވާލު އުފައްދާފައިވެއެވެ. އަދި ރައްޔިތުންނަށް ކިތައް ކަންތައް އޮޅުވާލާފައިވާނެތޯ  އަހާފައިވެއެވެ. ލާމަރުކަޒީ ބާރުވެރިކަމަށް ސަރުކާރުން ހުރަސް އަޅާކަމަށް ބުނެ އެމްޑީޕީން ބޭއްވި ކޮންފަރެންސް ގޮވީ އަތަށެވެ. ހާމަވީ ސަރުކާރުން ކައުންސިލްތަކަށް ދޭ އެހީތެރިކަމާ އެއްބާރުލުމެވެ.