ގެދޮރުވެރިޔާ ސްކީމާ ގުޅުވައި ފިޝިން ލިންކުތަކެއް ދައުރުކުރަނީ

ގެދޮރުވެރިޔާ ސްކީމާ ގުޅުވައިގެން ހަދާފައިވާ ފިޝިން ލިންކުތަކެއް ދައުރުވަމުންދާތީ، މިކަމަށް ސަމާލުވެ ރައްކާތެރިވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.

ފުލުހުން ވިދާޅުވީ މި ލިންކަކީ "ގެދޮރުވެރިޔާ ސްކީމުން ފްލެޓުތަކަށް ފޯމުލުމުގެ ފުރުސަތު އެޗް.ޑީ.ސީ.އިން އަލުން ހުޅުވާލިކަމަށާއި ވެބްސައިޓުން ލިބެންހުންނާނެ" ކަމަށް ބުނެ ޞައްޚަނޫން މަޢުލޫމާތު ހިމެނޭ މެސެޖަކާއެކު ދައުރުކުރަމުންދާ ލިންކެއްކަމުގައެވެ.

މީގެ ކުރިންވެސް މިފަދަ ލިންކުތައް އެކި ދުވަސްވަރު ދައުރުވެ، ގިނަ އަދަދެއްގެ ބަޔަކު މިފަދަ ލިންކުތަކުގެ ޝިކާރައަކަށް ވެފައިވާކަން އެ އިދާރާއަށް ފާހަގަ ކުރެވިފައިވާކަމަށާއި ޚާއްޞަކޮށް ގެދޮރުވެރިޔާ ސްކީމުން ބޯހިޔާވަހިކަން ލިބޭ މީހުންގެ މަޢުލޫމާތު އާންމުކުރުމަށް ދައުލަތުން ތައްޔާރުވަމުންދާ މި ދަނޑިވަޅުގައި މިފަދަ ލިންކުތަކަށް ކްލިކްކުރާ މީހުންގެ އަދަދު އިތުރުވެދާނެކަމަށް ބެލެވޭ ކަމަށްވެސް ފުލުހުން ވަނީ ވިދާޅުވެފައެވެ.

އެހެންކަމުން، ގެދޮރުވެރިޔާ ސްކީމާ ގުޅޭ މަޢުލޫމާތު ހޯދުމުގައި ދަޢުލަތުގެ ރަސްމީ ޕޯޓަލްތަކުން މަޢުލޫމާތު ޗެކްކުރެއްވުމަށް ސަމާލުކަން ދެއްވުމަށާއި، ސޯޝަލް މީޑިއާ ގްރޫޕެއްގައި މިފަދަ ލިންކެއް ދައުރުވާނަމަ ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުގެ އީމެއިލް [email protected] އަށް އެންގުމަށް ފުލުހުން އެދިފައިވެއެވެ.

މީގެ އިތުރުން، ޝައްކުކުރެވޭ މިފަދަ ލިންކެއް ލިބިއްޖެނަމަ، އެ އިތުރަށް ފޯވަރޑްކޮށް ޝެއަރ ނުކުރުމަށާއި ސްކޭމުން ރައްކާތެރިވުމަށް ފުލުހުން ކުރައްވަމުން ގެންދަވާ މަސައްކަތްތަކުގައި އެއްބާރުލުން ދިނުމަށް އެދިފައިވެއެވެ.