ކެޓް ޝެލްޓަރ ހުޅުވުމުގެ އެންމެ ފަހުގެ ތައްޔާރީތައް ކުރިއަށްދަނީ

ހުޅުމާލޭގައި ކެޓް ޝެލްޓަރެއް ގާއިމުކުރުމުގެ އެންމެ ފަހުގެ ތައްޔާރީތައް މިހާރު ދަނީ ހަލުވި ދުވެލީގައި ކުރިއަށެވެ. މި ޝެލްޓަރ ތަރައްގީކުރެވެނީ ހުޅުމާލޭ ދެވަނަ ފިޔަވަހީގެ ފަރުކޮޅުފުށި ސަރަޙައްދުގައެވެ. މި މަޝްރޫޢުއަށް 5000 އަކަފޫޓުގެ ބިމެއް ހަމަޖައްސައި، އެ މަސައްކަތް ކުރުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މާލެ ސިޓީ ކައުންސިލާ ހަވާލުކުރެއްވީ މި އަހަރުގެ ޖަނަވަރީ މަހުގެ 25 ވަނަ ދުވަހުއެވެ.

ދަނޑުވެރިކަމާއި ދިރޭތަކެތީގެ ވުޒާރާގެ ވަޒީރު ޑރ. ޢާއިޝަތު ރަމީލާ ވިދާޅުވެފައިވަނީ ކެޓް ޝެލްޓަރެއް ތަރައްގީކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ޚާއްޞަ އިސްކަމެއް ދެއްވައިގެން ފަށްޓަވާފައިވާ މަޝްރޫޢުއެއް ކަމަށެވެ. އަދި މަގުމަތީގައި އުޅޭ ބުޅާތަކަށް އަމާޒުކޮށްގެން ކެޓް ޝެލްޓަރ ހުޅުވުނު ނަމަވެސް، އެތަނުގެ ވެޓްނަރީ ކްލިނިކުން އެހެނިހެން ޖަނަވާރުތަކަށްވެސް ޚިދުމަތް ފޯރުކޮށްދެވޭނެ ކަމަށް ވަޒީރު އިތުރަށް ވިދާޅުވިއެވެ.

މާލޭ ސިޓީ ކައުންސިލްގެ ޑެޕިއުޓީ މޭޔަރ ނަރީޝް ވިދާޅުވި ގޮތުގައި، މާލޭގެ ބުޅަލުގެ މައްސަލައަށް ހައްލެއް ހޯދުމަކީ ގިނަ ދުވަސްތަކެއް ވަންދެން ދެކެވެމުން އައި ވާހަކައެއް ނަމަވެސް، މި މައްސަލައަށް އަމަލީ ގޮތުން ހައްލެއް ހޯދުމުގެ މަސައްކަތް ފެށިގެން ދިޔައީ ޑރ. މުޙައްމަދު މުޢިއްޒު މާލޭ ސިޓީ މޭޔަރުކަމަށް އިންތިޚާބުވުމާ ގުޅިގެންނެވެ.

ރައީސް މުޢިއްޒު މޭޔަރުކަމުގައި ހުންނަވައިގެން ބުޅަލުގެ މައްސަލައަށް ފުރިހަމަ ހައްލެއް ހޯއްދެވުމަށް ކުރެއްވި މަސައްކަތް ހުއްޓުނީ ކުރީގެ ސަރުކާރުން އެކަމަށް ބޭނުންވާ ބިން ދޫނުކުރުމުގެ ސަބަބުން ކަމުގައި ނަރީޝް އެކްސްގައި ކުރެއްވި ޕޯސްޓުގައި ވަނީ ހާމަކުރައްވާފައެވެ.

ރައީސުލްޖުމްހޫރިއްޔާކަމަށް އިންތިޚާބުވެ ވަޑައިގަތުމާއެކު، ފުރަތަމަ އަހަރު ތެރޭގައި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އާއި ހަވާލުކޮށްގެން، މާލެ ސިޓީ ކައުންސިލްގެ އެހީތެރިކަމާއެކު ސަރުކާރުން ހުޅުމާލެއިން ބިމެއް ހަމަޖައްސައިދެއްވި ކަމަށް ޑެޕިއުޓީ މޭޔަރ ނަރީޝް ވިދާޅުވިއެވެ.

މިހާރު ކެޓް ޝެލްޓަރުގެ އިމާރާތް ނިމި، އަންނަ މަހުގެ ކުރީކޮޅު ހުޅުވުމަށް ހަމަޖެހިފައިވާ ކަމަށް އޭނާ ފާހަގަކުރެއްވިއެވެ. މި މަޝްރޫޢަކީ ރައީސް މުޢިއްޒުގެ އިރުޝާދުގެ ދަށުން މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ކުރިއަށް ގެންދަވާ ސަރުކާރުގެ މަޝްރޫޢެއްކަން އަދި ކެޓް ޝެލްޓަރ ބިނާކުރުމުގެ މަސައްކަތް ސަރުކާރުން އެދުނު ގޮތަށް ކޮށްދެއްވީ ސިޓީ ކައުންސިލުން ކަމަށްވެސް ޑެޕިއުޓީ މޭޔަރ ނަރީޝް ވިދާޅުވިއެވެ.

މާލޭގެ ރައްޔިތުންގެ މި ބޮޑު ކަންބޮޑުވުމަށް އަވަސް ހައްލެއް ގެނެސްދެއްވި ކަމަށްޓަކައި ރައީސް މުޢިއްޒަށް ޙައްޤު ޝުކުރު ދަންނަވަން 

ޑެޕިއުޓީ މޭޔަރ ނަރީޝް ވިދާޅުވިއެވެ

މި ކެޓް ޝެލްޓަރ ހުޅުވުމުން މާލޭގެ މަގުމަތީގައި އުޅޭ ބުޅާތަކަށް ރައްކާތެރި މާޙައުލެއް ޤާއިމުވެ، އަދި ބުޅަލުގެ އާބާދީ ކޮންޓްރޯލްކުރުމަށް ފަސޭހަވެގެންދާނެ ކަމަށް ބެލެވެ.ހަމައެހެންމެ މަގުމަތީގައި އުޅޭ ބުޅާތަކަށް އަޅާލުމާއި، އެހެނިހެން ޖަނަވާރުތަކަށް ބޭނުންވާ ސިއްޙީ ފަރުވާ ފޯރުކޮށްދިނުމަށް އިތުރު ފުރުޞަތުތަކެއް ހުޅުވިގެންދާނެއެވެ.