ފުލުހުން މަގުތަކަށް ނުކުތުމުގެ ނަތީޖާ ރަނގަޅު، އެކްސިޑެންޓްތަކުގެ އަދަދު ދަށަށް!

މިއަހަރުގެ އެންމެ މަދުން އެކްސިޑެންޓް ހިނގި މަސްކަމަށް ނިމިދިޔަ ސެޕްޓެމްބަރު މަސް ކަމުގައި ދިވެހި ފުލުހުންގެ ޚިދުމަތުގެ ތަފާސްހިސާބުތަކުން ދައްކައިފިއެވެ.

ފުލުހުންގެ ތަފާސްހިސާބުތައް ދައްކާގޮތުން ނިމުނު ސެޕްޓެމްބަރު މަހު ހިނގާފައިވަނީ 186 އެކްސިޑެންޓެވެ.މީގެ ކުރިން ކޮންމެ މަހެއްގައިވެސް އެކްސިޑެންޓް ތަކުގެ ޢަދަދު 200 އަށްވުރެ މައްޗަށް އަރާފައިވާކަން ތަފާސްހިސާބުތަކުން ދައްކައެވެ. އަދި މި އަހަރުގެ މިހާތަނަށް އެންމެ ގިނަ އެކްސިޑެންޓް ހިނގާފައިވަނީ މާރިޗް މަހުގައެެވެ. އެ މަހުގައި 301 އެކްސިޑެންޓް ހިނގާފައިވާއިރު އެންމެ މަދުން އެކްސިޑެންޓް ހިނގާފައިވަނީ ސެޕްޓެމްބަރު މަހުގައެެވެ. އެމަހުގައި ރިޕޯޓްކޮށްފައިވަނީ 186 އެކްސިޑެންޓެވެ. 

މަގުމަތީގެ ރައްކާތެރިކަން ކަށަވަރުކުރުމަށްޓަކައި ފުލުހުން ވަނީ ޚާއްޞަ ފިޔަވަޅުތަކެއް އަޅާފައެވެ. އެގޮތުން ފުލުހުން 24 ގަޑިއިރު ފޯރިމެރުމާއި، ކޮންމެ ފަސް މިނެޓަކުން ފުލުހަކު ފެންނަން ޖެހޭ ގޮތަށް އުސޫލެއް ކަނޑައަޅާފައިވެއެވެ. ނަތީޖާއެއްގެ ގޮތުން އެކްސިޑެންޓްގެ ޢަދަދު ދަށްކުރެވިފައިވެއެވެ.

 ފުލުހުންގެ ތަފާސްހިސާބުތަކަށް ބަލާލާއިރު މިއަހަރު އެންމެ ގިނައިން ރިޕޯޓް ކޮށްފައިވަނީ ވައްކަމުގެ މައްސަލަތަކެެވެ. އެގޮތުން 2920 ވައްކަމުގެ މައްސަލަ ހުށަހަޅާފައިވާއިރު ދެވަނައަށް އެންމެ ގިނައީ އެކްސިޑެންޓްގެ މައްސަލަތަކެވެ. މިއަހަރުގެ މިހާތަނަށް 2192 އެކްސިޑެންޓް ރިޕޯޓްކޮށްފައިވާއިރު މި އަދަދު ބޮޑުތަނުން މައްޗަށް ދިޔަނުދީ ހެފެހެއްޓިދާނެކަމަށް ޤަބޫލުކުރެވެއެވެ.