ދެޖިންސުގެ އެކި އުމުރުފުރާގެ މީހުންނަށް "ފަހިރައްކާ" ޕްރޮގްރާމް ހިތާދޫގައި ކުރިއަށްދަނީ

ބ. ހިތާދޫގައި "ފަހިރައްކާ" ގެ ނަމުގައި ޕްރޮގްރާމެއް ފަށައިފިއެވެ.

ފުލުހުން ވިދާޅުވީ މި ޕްރޮގްރާމުގައި، ހިތާދޫގައި ދިރިއުޅޭ އަންހެނުންނަށް ޚާއްޞަކޮށްގެން 20 ދުވަހަށް ކުރިއަށް ގެންދާ ކަސްރަތު ކްލާސްތަކަކާއި ސްކޫލުގެ ގްރޭޑް 6 އިން 9 އަށް ތަޢުލީމު ހާޞިލުކުރަމުންދާ ދަރިވަރުންނަށާއި ސްކޫލު މުދައްރިސުންނަށް ޚާއްޞަކޮށްގެން 20 ދުވަހަށް ސުވިމިންގ ކްލާސްތަކެއް ކުރިއަށް ގެންދިއުމަށް ހަމަޖެހިފައިވާކަމަށެވެ. އަދި "ފަހިރާސްތާ" ނަމުގައި ސްކޫލު ދަރިވަރުންނާއި ބެލެނިވެރިންނާއި، ރަށުގެ މުއައްސަސާތަކާއި ކުލަބް ޖަމުޢިއްޔާތަކަށް ޓްރެފިކް ސެޝަންތަކެއް ކުރިއަށް ގެންދިއުމަށް ހަމަޖެހިފައިވާ ކަމަށްވެސް ފުލުހުން ވިދާޅުވެއެެވެ.

މީގެ އިތުރުން ބެލެނިވެރިންނަށް ބާއްވާ ގެވެށިއަނިޔާއަށް ހޭލުންތެރި ކުރުމުގެ ސެޝަނަކާއި، ސްކޫލް ދަރިވަރުންނާއި ބެލެނިވެރިން ސައިބަރ ބުލީންގ އަދި ސައިބަރ ކްރައިމް އިން ރައްކާތެރިކުރުވުމަށް ބާއްވާ ސެޝަންތަކަކާއި، ސްކޫލްގެ ދަރިވަރުންނަށް ބާއްވާ ލީޑަރޝިޕް ސްކިލްސް ކްލާހަކާއި، ބެލެނިވެރިންނަށް ބާއްވާ ކޮމިއުނިކޭޝަން ސްކިލްސް ކްލާހެއްގެ އިތުރުން ރަށުގެ މުއައްސަސާތަކަށް ވޯކް އެތިކްސް ކްލާހެއް ބޭއްވުމަށް ވަނީ ހަމަޖެހިފައިވެއެވެ.

މި ޕްރޮގްރާމުގައި ހިމެނޭ ކްލާސްތަކަކީ ހިތާދޫ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީ އަދި ސްކޫލާ ބައްދަލުކޮށް ރަށަށް މިވަގުތު އެންމެ މުހިންމުކަމަށް ފާހަގަކޮށްފައިވާ ކަންކަމަށް އަލި އަޅުވާލައިގެން އެކުލަވައިލާފައިވާ ކްލާސްތަކެއްކަމަށް ފުލުހުން މަޢުލޫމާތު ދެއްވިއެވެ.  

މި ޕްރޮގްރާމަކީ ހިތާދޫ ޕޮލިސް ޕޯސްޓުން އިސްނަގައިގެން ރަށުގެ މުއައްސަސާތަކާ ގުޅިގެން އޮކްޓޫބަރު 15 އިން ނޮވެމްބަރު 3 އަށް ކުރިއަށްގެންދާ ޕްރޮގްރާމެކެވެ.