ރަޖިސްޓަރީ ވެފައިވާ ޕާޓީގެ މަޢުލޫމާތު ހިމެނޭ ލިޔުން މިހާރު އޮންލައިންކޮށް ހޯދޭނެ

ރަޖިސްޓަރީ ވެފައިވާ ޕާޓީގެ މަޢުލޫމާތު ހިމެނޭ ލިޔުން އޮންލައިން ޕޯޓަލް މެދުވެރިކޮށް ލިބޭނެގޮތް ހަމަޖައްސައިފިއެވެ.

އިލެކްޝަންސް ކޮމިޝަނުން ވިދާޅުވީ އެ އިދާރާއިން ފޯރުކޮށްދޭ ޚިދުމަތްތައް ހަރުދަނާކޮށް، ޑިޖިޓަލް ކުރުމަށް ކުރެވޭ މަސައްކަތުގެ ތެރެއިން، މިކޮމިޝަނުން ބަލަހައްޓާ ސިޔާސީ ޕާޓީގެ މެންބަރުންގެ ދަފްތަރުގައި ރަޖިސްޓަރީވެފައިވާކަމުގެ ލިޔުން ޕޯޓަލް މެދުވެރިކޮށް ލިބޭނެ އިންތިޒާމް ހަމަޖައްސާފައިވާކަމަށެވެ.

އެގޮތުން، މިއަދު (2024 އޮކްޓޫބަރު 20)ން ފެށިގެން، ސިޔާސީ ޕާޓީތަކުގެ މެންބަރުންގެ ދަފްތަރުގައި ރަޖިސްޓަރީވެފައިވާނަމަ، ރަޖިސްޓަރީ ވެފައިވާ ޕާޓީގެ މަޢުލޫމާތު ހިމެނޭ ލިޔުން އޮންލައިން ޕޯޓަލް my.elections.gov.mv "މައި ޕޯޓަލް" މެދުވެރިކޮށް ލިބޭނެ ކަމަަށް އިލެކްޝަނުން ވިދާޅުވެފައިވެއެވެ.

އަދި މި ޚިދުމަތުގެ އިތުރުން، ސިޔާސީ ޕާޓީއެއްގައި ރަޖިސްޓަރީ ވެފައިނުވާނަމަ، އެކަމުގެ ލިޔުންވެސް ޕޯޓަލް އިން ލިބޭނެ ކަމަށް އިލެކްޝަންސް ކޮމިޝަނުން ވަނީ ޢާންމުކޮށްފައެވެ. ޕޯޓަލް މެދުވެރިކޮށް މި ޚިދުމަތަށްއެދޭއިރު، އިތުރު އެއްވެސް ލިޔެކިއުމެއް ބޭނުމެއް ނުވާނެއެވެ.

 ދަފްތަރުވެފައިވާ ސިޔާސީ ޕާޓީގެ މައުލޫމާތު ހިމެނޭ ލިޔުން ހޯދުމަށް މީގެ ކުރިން އެދެން ޖެހެނީ އެ ކޮމިޝަނަށް ސިޓީ ފޮނުވައިގެން ނުވަތަ އީމެއިލްކޮށްގެންނެވެ. ނަމަަވެސް އިލެކްޝަންސް ކޮމިޝަނުން އަންނަނީ އެ ކޮމިޝަނުން ދެމުން އަންނަ ޚިދުމަތްތައް ޑިޖިޓަލައިޒް ކުރުމުގެ މަސައްކަތް ކުރަމުންނެވެ.