(ކާވާ) މެންސް ވޮލީބޯލް ޗެލެންޖް ކަޕް 2024: ދެވަނަ މެޗުންވެސް ރާއްޖެ ބަލިވެއްޖެ

އުޒްބެކިސްތާނުގައި ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެލެންޖް ކަޕް 2024 ގައި ރާއްޖޭގެ ޤައުމީ ފިރިހެން ވޮލީބޯޅަ ޓީމުން ކުޅުނު ދެވަނަ މެޗުންވެސް ބަލިވެއްޖެއެވެ.

ރާއްޖޭއިން ދެވަނަ މެޗުގައި ބައްދަލު ކޮށްފައިވަނީ ތުރުކުމެނިސްތާނާއެވެ. މި މެޗުން ރާއްޖެ ބަލިވީ ތުރުކުމެނިސްތާން އަތުން ތިން ސެޓު ދެ ސެޓުންނެވެ. މި މެޗުގެ ފުރަތަމަ ސެޓު ތުރުކުމެނިސްތާނުން ގެންދިޔަ ނަމަވެސް، ރާއްޖެއިން ވަނީ ޖެހިގެން އައި ދެ ސެޓު ކާމިޔާބުކޮށްފައެވެ. އެހެން ނަމަވެސް އަނެއް ދެ ސެޓު ވަނީ ތުރުކުމެނިސްތާނުން ގެންގޮސްފައެވެ. 

މެޗުގައިި ރާއްޖެއިން މޮޅު ކުޅުމެއް ދެއްކި ނަމަވެސް، ޤައުމީ ޓީމަށް މިހާރު މިވަނީ ފައިނަލަށް ދިއުމުގެ އަމިއްލަ ބާރު ގެއްލިފަ އެވެ. ރާއްޖޭގެ ޤައުމީ ޓީމު ކުޅުނު ފުރަތަަމަ މެޗުން ބަލިވެފައިވަނީ ސީދާ ތިންސެޓުންނެވެ. މި މެޗުގައި ރާއްޖެ ކުޅެފައިވަނީ ކިރްގިސްތާންއާއި ދެކޮޅަށެވެ. މުބާރާތުގެ ތިންވަނަ މެޗުގައި ރާއްޖެ ނިކުންނާނީ އަފްގާނިސްތާނާ ދެކޮޅަ ށެވެ.

ކާވާ ވޮލީބޯލް ޗެލެންޖް ކަޕް ކުރިއަށްދާނީ މިމަހުގެ 24 ވަނަ ދުވަހުގެ ނިޔަލަށް އުޒްބެކިސްތާނުގެ ޓަޝްކެންޓުގައެވެ. މި މުބާރާތުގައި ހަ ގައުމެއް ވާދަކުރާއިރު، އެ ޤައުމުތަކަކީ ރާއްޖޭގެ އިތުރުން އުޒްބެކިސްތާނާއި، ކިރްގިސްތާނާއި، ތަޖިކިސްތާނާއި، ތުރުކުމެނިސްތާން އަދި އަފްޣާނިސްތާނެވެ.