ޚަބަރު
ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙަސަން ޞާބިރު ރަސްމީ ޢިއްޒަތުގައި ފަސްދާނުލައިފި
ނިޝާން ޢިއްޒުއްދީންގެ ޢިއްޒަތްތެރި ވެރިޔާ ޙަސަން ޞާބިރު ރަސްމީ އިއްޒަތުގައި ފަސްދާނުލުން. ފޮޓޯ: ޕީއެސްއެމް
ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙަސަން ޞާބިރު މިއަދު ޢަސްރު ނަމާދަށް ފަހު ރަސްމީ ޢިއްސޒަތުގައި ފަސްދާނުލައިފިއެވެ. ޙަސަން ޞާބިރު ނިޔާވީ މިއަދު ހެނދުނުގެ ވަގުތެއްގައި ޓްރީ ޓޮޕް ހޮސްޕިޓަލުގައެވެ. އެމަނިކުފާނު ނިޔާވީ އުމުރުފުޅުން 73 އަހަރުފުޅުގައެވެ.
މިއަހަރުގެ މިނިވަން ދުވަހުގެ ރަސްމިއްޔާތުގައި ނިޝާން ޢިއްޒުއްދީނުގެ ޢިއްޒަތުގެ ވެރިޔާގެ ޝަރަފު އެރުވުނު ޙަސަން ޞާބިރުގެ ޖަނާޒާގެ ކަންތައް ކުރިއަށް ގެންގޮސްފައިވަނީ އިސްލާމީ މަރުކަޒުގައެވެ. މޫނު ދެއްކުމާއި ކަށުނަމާދު ނިންމުމަށްފަހު، އެމަނިކުފާނުގެ ހަށިކޮޅު ވަނީ ގަލޮޅު ސަހަރާގައި ވަޅުލައިފައެވެ.
އެމަނިކުފާނުގެ ކަށުނަމާދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި ދައުލަތުގެ އިސްވެރިން ބައިވެރިވެ ވަޑައިގެންނެވިއެވެ. އަދި އަވަހާރަވުމާ ގުޅިގެން ރައީސުލްޖުމްހޫރިއްޔާ ވަނީ ތަޢުޒިޔާ ވިދާޅުވެފައެވެ. "ޙަސަން ޞާބިރު އަވަހާރަވި ޚަބަރު އަޑުއެއްސެވީ ނުހަނު ފުންހިތާމައާ އެކު" ކަމަށް ރައީސް ވިދާޅުވެ، މަރުޙޫމުގެ ފުރާނަފުޅަށް ސުވަރުގޭގެ މަތިވެރި ނިޢުމަތް މިންވަރުކުރެއްވުން އެދި ދުޢާ ދެންނެވިއެވެ.
ދިވެހި ދައުލަތަށް 38 އަހަރަށްވުރެ ދިގު މުއްދަތަކަށް ޚިދުމަތް ކުރެއްވި ޙަސަން ޞާބިރު ވަނީ ދަނޑުވެރިކަމާއި ފަތުރުވެރިކަމާއި މަސްވެރިކަމުގެ ދާއިރާގެ ވަޒީރުކަން ކުރައްވާފައެވެ. އެމަނިކުފާނުގެ ވަޒީރުކަމުގައި އެ ދާއިރާތަކުން އަގުހުރި ގިނަގުނަ ޚިދުމަތްތަކެއް ޤައުމަށް ކޮށްދެއްވާފައިވެއެވެ.
އަވަހާރަވުމާ ގުޅިގެން ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފާއި ކުރީގެ ރައީސުންނާއި ދައުލަތުގެ އިސްވެރިންނާއި ސިޔާސީ ވެރިންވެސް ވަނީ ތަޢުޒިޔާ ވިދާޅުވެފައެވެ.
Ads by MSS
