ޝަހީދުންގެ މައްޗަށް ކަށު ނަމާދު ކުރުމެއް ނުވޭ، ޝަހީދުންގެ މައްޗަށް އޮތީ ހެޔޮ ދުޢާކުރުން- ޑރ ޝަހީމް

ޝަހީދުންގެ މައްޗަށް ކަށު ނަމާދު ކުރުމެއް ނުވާކަމަށާއި ޝަހީދުންގެ މައްޗަށް އޮތީ ހެޔޮ ދުޢާކުރުން ކަމަށް ދީނީ ޢިލްމުވެރިޔާ އަދި އިސްލާމީ ކަންތައްތަކާބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ފޭސްބުކުގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ އިސްލާމްދީނުގެ ޖުމުހޫރު ޢިލްމުވެރިން ދެކެވަޑައިގަންނަވާ ގޮތުގައި ހަނގުރާމައިގެ މައިދާނުގައި ދުޝްމަނުންނާ ހަނގުރާމަކުރަނިކޮށް ޝަހީދުވާ މީހުންގެ މައްޗަށް ކަށު ނަމާދު ކުރުން ނޯންނަކަމަށާއި އެގޮތަށް ކަށު ނަމާދު ކުރެވިދާނެކަމަށް ދެކެނީ ވަރަށް މަދު އިލްމުވެރިއެއް ކަމަށެވެ. އަދި އެކަމަކީ ޖާއިޒުކަމަށް ދެކޭ އިލްމުވެރިން ވެސް ވިދާޅުވަނީ އެއީ ވާޖިބުކަމެއް ނޫންކަމަށް ޝަހީމް ވިދާޅުވިއެވެ. 

ވަޒީރު އިތުރަށް ވިދާޅުވީ، ދީނުގެ ކަންކަމުގައި އަޅުގަނޑުމެން ޢަމަލުކުރަންވާނީ ދީނުގައި އޮންނަ ރަނގަޅު ގޮތައްކަމަށާއި ޢަމަލުކުރަން ވާނީ ކީރިތި ރަސޫލާ صلى الله عليه وسلم ގެ ޞައްޙަ ސުންނަތުގައި އޮންނަ ގޮތަށްކަމަށެވެ. އެގޮތުން އުޙުދު ހަނގުރާމައިގައި ޝަހީދުވި މާތް ޞަޙާބީންގެ މައްޗަށް ކީރިތި ރަސޫލާ صلى الله عليه وسلم ކަށު ނަމާދު ކުރައްވާފައި ނުވާކަމަށާއި، އެހަނގުރާމައިގައި އެކަލޭގެފާނުގެ މާތް ބޮޑު ބޭބޭފުޅު ޙަމްޒަތުގެފާނުގެ ވެސް ޝަހީދުވެވަޑައިގެންނެވި ކަމަށް ވަޒީރު ވިދާޅުވިއެވެ. އަދި ޙަމްޒަތުގެފާނުގެ މައްޗަށް ވެސް، އެހެން ބޭކަލެއްގެ މައްޗަށް ވެސް ވަޅުލުމުގެ ކުރިން ކަށު ނަމާދުކުރައްވާފައިނުވާކަމަށް ވިދާޅުވިއެވެ.

ހަމައެއާއެކު ޝަހީދުން ވަޅުލަނީ ނުހިނަވައި އެމީހުންގެ ލެއާއެކުގައިކަމަށާއި ޝަހީދުންގެ މައްޗަށް ކަށު ނަމާދު ކުރުން ނުވާކަމަށާއި ޝަހީދުންގެ މައްޗަށް އޮތީ ހެޔޮ ދުޢާކުރުންކަމަށް ވަޒީރު ވިދާޅުވިއެވެ.

ވަޒީރު މިހެން ވިދާޅުވެފައި މިވަނީ ހަމާސްގެ ވެރިޔާ އަށް އިސްރާއީލްގެ ސިފައިން ދިން ހަމަލާގައި އިސްމާއިލް ހަނިއްޔާ ޝަހީދު ކޮށްލުމާއި އޭގެ ފަހުން އެ ޖަމާއަތުގެ ލީޑަރަކަށް އައްޔަން ކުރެއްވި ޔަހްޔާ ސިންވާރު ވެސް މިދިޔަ ބުދަ ދުވަހު އިޒްރޭލުން ޝަހީދު ކޮށްލުމުން ވެސް ރާއްޖޭގައި ކަށުނަމާދު ކޮށްފައިނުވާތީ އަދި އެ ދެ ބޭފުޅުންނަށް ދިން ހަމަލާތައް ކުށްވެރި ކޮށްފައި ނުވާތީ ޝަހީމަށް ގިނަ ބަޔަކު ފާޑުކިޔާފައިވާ ދަނޑިވަޅެއްގައެވެ.