ވިލާ އެއަރގެ ސީޕްލޭން ޚިދުމަތް އަލުން ފެށުމަށް ދެ ޓުވިން އޮޓަރ މަތިންދާބޯޓު ގެނެސްފި

ވިލާ އެއަރގެ ސީޕްލޭން އޮޕަރޭޝަންތައް ފުޅާކޮށް، އަލުން ފެށުމަށްޓަކައި ދެ ޑީ ހެވިލަންޑް ކެނެޑާ ޑީއެޗްސީ-6 ޓުވިން އޮޓަރ މަތިންދާބޯޓު ރާއްޖެއަށް ގެނެސްފިއެވެ. މި އިތުރުކުރެވުނު ދެ މަތިންދާބޯޓާއެކު ކުންފުނީގެ ވައިގެ ދަތުރުފަތުރުގެ ޚިދުމަތް ފުޅާވެ، ފެންވަރު މަތިވެގެންދާނެ ކަމަށް ބެލެވެއެވެ.

ރާއްޖޭގައި ދަތުރުކުރުމަށް އެންމެ އެކަށީގެންވާ އަދި އިތުބާރުހުރި މަތިންދާބޯޓުތަކުގެ ގޮތުގައި ފާހަގަކުރެވޭ ޓުވިން އޮޓަރ މަތިންދާބޯޓުތަކަކީ ރަށްރަށާ ދެމެދު ދަތުރުކުރުމަށް ބޭނުންކުރެވޭ އެންމެ އެކަށޭނަ އުޅަނދުތަކެވެ. މި މަތިންދާބޯޓުތައް ސީޕްލޭންގެ ގޮތުގައި ބޭނުންކުރުމަށްޓަކައި ގެންނަންޖެހޭ ޓެކްނިކަލް ބަދަލުތައް ގެނައުމުގެ މަސައްކަތް ކުރިއަށް ގެންދެވޭނެއެވެ.

ކުރީގައި، ވިލާ އެއަރގެ ބްރޭންޑް ކަމުގައިވާ ފްލައިމީގެ ދަށުން ސީޕްލޭން ޚިދުމަތް ދިނުމަށް ބޭނުންކުރަމުން އައީ ސިންގަލް އިންޖީނުގެ ސެސްނާ 208 ކެރަވަން މަތިންދާބޯޓެވެ. މި މަތިންދާބޯޓު ބޭނުންކޮށްފައިވަނީ ޗާޓަރ ފްލައިޓްތަކާއި ފޮޓޯ ފްލައިޓް  ދަތުރުތަކަށެވެ.

ފާހަގަކޮށްލެވޭ ކަމަކީ، ވިލާ އެއަރއިން ވަނީ ގިނަ އަދަދެއްގެ އޭޓީއާރު މަތިންދާބޯޓުތަކެއް ދާދިފަހުން  ވިއްކާލާފައެވެ. މިއީ ކުންފުނިން މައިގަނޑު ގޮތެއްގައި ސީޕްލޭން އޮޕަރޭޝަންތަކަށް އަމާޒު ހިފުމުގެ ނިޝާނެއް ކަމަށް ބެލެވެއެވެ. ކުންފުނިން މިހާތަނަށް ބޭނުންކުރަމުން އައި އޭޓީއާރު މަތިންދާބޯޓުތައް ބޭނުންކުރަމުން އައީ މައިގަނޑު ގޮތެއްގައި ދަރަވަންދޫއާއި މާމިގިއްޔަށް ދަތުރުކުރުމަށެވެ.