ވޭޕް މަނާކުރުމާ ހަމައަށް ޑިއުޓީ ބޮޑުކުރުމުގެ ބިލް ކޮމިޓީ އަށް ހުށައަޅައިފި!

ވޭޕް އަދި އީ-ސިނގިރޭޓް މަނާކުރާ ބިލް ރައްޔިތުންގެ މަޖިލީހަށް ހުށައަޅައިފިއެވެ. 

އެކްސްޕޯޓް އިމްޕޯޓުގެ ޤާނޫނަށް ހުށައެޅި މި އިސްލާޙު ސަރުކާރުގެ ފަރާތުން ރައްޔިތުންގެ މަޖިލީހަށް ހުށައަޅުއްވައިފައިވަނީ މައްޗަންގޯޅި އުތުރު ދާއިރާގެ މެމްބަރު އިބްރާހިމް މުޙައްމަދު (އިއްބެ ޖަނާބު) އެވެ. 

އެކްސްޕޯޓް އިމްޕޯޓުގެ ޤާނޫނަށް ހުށައެޅުނު މި އިސްލާޙުގައި ސިނގެރޭޓާއި ދުންފަތުގެ ބާވަތްތަކުން ނަގާ ޓެކްސް ބޮޑުކުރުމަށްވެސް ހުށައަޅައިފައިވެއެވެ. 

މެމްބަރު އިބްރާހިމް ހުށަހެޅުއްވި އިސްލާޙްގައި ހުށަހެޅުއްވުމުގެ، މަޤްސަދުގެ ގޮތުގައި އޭނާ ވިދާޅުވީ، ދުންފަތާއި، ދުންފަތުން އުފައްދާ ބާވަތްތަކާއި ދުންފަތުގެ ބަދަލުގައި ބޭނުންކުރެވޭ ބާވަތްތަކުން ނަގަމުން އަންނަ އިމްޕޯޓް ޑިޔުޓީ ޓެކްސްގެ މިންވަރު އިތުރު ކުރުމެވެ.

އަދި، ދުންފަތް ކޮންޓްރޯލް ކުރުމާ ބެހޭ ޤާނޫނުގެ ދަށުން އީ-ސިނގިރޭޓާއި ވޭޕް ކުރުމަށް ބޭނުންކުރާ އާލާތްތައް ރާއްޖެއަށް އެތެރެކުރުން މަނާ ކުރެވޭ ތާރީޚާ ހަމައަށް، މި ހިންގާ މުއްދަތުގައި ރާއްޖެއަށް ގެނެވޭ އެފަދަ ތަކެތިން ނަގާ އިމްޕޯޓް ޑިޔުޓީގެ މިންވަރު އިތުރުކުރުމެވެ.

ރާއްޖޭގެ އެކްސްޕޯޓް އިމްޕޯޓް ޤާނޫނުގެ ދަށުން ނެގޭ އިމްޕޯޓް ޑިޔުޓީއާއި ރޯޔަލްޓީއާއި ރެވެނިޔުފީ މަޢާފްކުރެވޭ ހާލަތްތަކާއި އުސޫލުތައް ބަޔާންކުރުމަށް އެ ޤާނުނަށް އިސްލާޙު ގެނައުންވެސް މި ބިލު ހުށަހެޅުމުގެ މަޤްސަދުގެ ތެރޭގައި ހިމެނައިފައިވެއެވެ. މެންބަރު އިބްރާހިމް ވަނީ މި ބިލުގެ މަސައްކަތް ކޮމިޓީން އަވަހަށް ނިންމައި ފާސްކުރުމަށް އެދިވަޑައިގެންފައެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށް ނިންމަވާފައެވެ. އަދި ދުންފަތުން އުފައްދާފައިވާ ތަކެތި ގަނެވިއްކޭނެ އެންމެ ހަގު އުމުރު، 21 އަހަރަށް ކަނޑައެޅުމަށްވެސް އެމަނިކުފާނު ވަނީ ނިންމަވާފައެވެ.

ރާއްޖޭގައި ވޭޕް މަނާކުރުމަށް ރައީސް މުޢިއްޒު ނިންމެވުމާއި ގުޅިގެެން ގިނަ ބައެއް ވަނީ އެމަނިކުފާނަށް ވަރަށް ބޮޑަށް ތަޢުރީފު ކުރައްވައިފައެވެ.