ސަރުކާރުގެ ސިޔާސީ މުވައްޒަފުންގެ ޢަދަދު ހާމަކުރުމަށް އެދި ހުށައެޅި ކުއްލި މައްސަލަ މަޖިލީހުން ބޭރުކޮށްލައިފި!

ސަރުކާރުގެ ސިޔާސީ މުވައްޒަފުންގެ ޢަދަދު ހާމަކުރުމަށް އެދި ރައްޔިތުންގެ މަޖިލީހަށް އެދި ހުށައެޅި ކުއްލި މައްސަލަ އެމަޖިލީހުން ބޭރުކޮށްލައިފިއެވެ. 

މިމައްސަލަ މިއަދުގެ ރައްޔިތުންގެ މަޖިލީހުގެ ޖަލްސާއަށް ހުށައެޅުއްވީ އިދިކޮޅު އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެމްބަރު މީކާއިލް އަޙުމަދު ނަސީމެވެ. 

މަޖިލީހަށް ހުށައެޅި މިމައްސަލަ ބަލައިގަތުމަށް ވޯޓު ދެއްވައިފައިވަނީ 8 މެމްބަރެކެވެ. އަދި އެމައްސަލަ ބަލައިނުގަތުމަށް 59 މެމްބަރަކު ވަނީ ވޯޓުދެއްވައިފައެވެ. 

މެމްބަރު މީކާއިލް ހުށައެޅުއްވެވި މި ކުއްލި މައްސަލާގައި ވަނީ ދައުލަތުގެ ޚަރަދުތައް ކުޑަކުރުމުގެ ގޮތުން އަޅުއްވާ ފިޔަވަޅެއްގެ ގޮތުން، ސަރުކާރުގެ އެކިއެކި މުއައްސަސާތަކާއި އިދާރާތަކާއި ސަރުކާރު ޙިއްޞާވާ ކުންފުނިތަކުގެ ބައެއް ފަރާތްތަކުގެ މުސާރަ ކުޑަކުރަން ނިންމާފައިވާކަމަށް ސަރުކާރުން އިޢުލާނުކޮށްފައިވާ ހިނދު މިއަދާ ހަމައަށްވެސް ސަރުކާރުގެ އެކި އެކި މުއައްސަސާތަކުގައި ސިޔާސީ މުވައްޒަފުންގެ ގޮތުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ޢައްޔަންކުރައްވާފައިވާ ފަރާތްތަކުގެ ޢަދަދު ހާމަކޮށްފައި ނެތް ކަމަށެވެ.

އަދި އެފަރާތްތަކުގެ މުސާރަތައް ކުޑަކުރަން ހުށަހަޅާފައިވާ މިދަނޑިވަޅުގައ،ި ސިޔާސީ މަޤާމްތަކަށް ރައީސް ޑރ މުޢިއްޒު ޢައްޔަންކޮށްފައިވާ ފަރާތްތަކުގެ ޢަދަދާއި އެފަރާތްތަކުގެ މަޤާމްގެ މަސްއޫލިއްޔަތު ހާމަކޮށްދިނުމަށް ރައީސް ޑރ މުޢިއްޒަށާއި ސަރުކާރަށް ގޮވާލައި، ރައްޔިތުންގެ މަޖިލީހުގެ ޤަވާއިދުގެ 192 ވަނަ މާއްދާގެ ދަށުން ކުއްލި މައްސަލަ ހުށައަޅާކަމަށެވެ. 

ސަރުކާރުގެ ސިޔާސީ މަޤާމުތަކުގެ ޢަދަދު ހާމަކުރުމަށް މަޖިލީހަށް ކުއްލި މައްސަލައެއް ހުށައެޅި އެމައްސަލަ ބޭރުކޮށްލައިފައިވާ އިރު ސަރުކާރުގެ ސިޔާސީ މަޤާމުތަކުގައި ތިއްބެވި ބޭފުޅުންގެ ތެރެއިން 228 ބޭފުޅަކު ވަކިކުރެއްވުމަށް ރައީސް ޑރ މުޙައްމަދު މުޢިއްޒު ވަނީ ނިންމަވައިފައެވެ.