ޓެކްސް ޓްރައިބިޔުނަލަށް އައްޔަނުކުރުމަށް 4 ބޭފުޅެއްގެ ނަން މަޖިލީހުން ފާސްކޮށްފި!

ޓެކްސް އެޕީލް ޓްރައިބިޔުނަލަށް އައްޔަނުކުރުމަށް 4 ބޭފުޅެއްގެ ނަން ރައްޔިތުންގެ މަޖިލީހުން ފާސްކޮށްފިއެވެ. 

ޓެކްސް އެޕީލް ޓަރައިބިޔުނަލަށް އައްޔަނުކުރުމަށް ހަތަރު ބޭފުޅެއްގެ ނަން ފާސްކުރުމަށް މަޖިލީހުގެ ތަޅުމަށް ހުށައަޅައިފައިވަނީ މިއަދުއެވެ. 

ތަޅުމަށް ހުށައެޅުނު ނަންތަކުގެ ތެރެއިން މިއަދުގެ މަޖިލީހުގައި ފާސްކޮށްފައިވާ ނަންތަކަކީ:-

1. އަބްދުލް ޣަނީ މުހައްމަދު

2. ޙަސަން ޒުހައިރު މުޙައްމަދު

3. އިބްރާހިމް ޝަރީފް

4. ޝިފްޒާ ޢަބްދުލް ޤައްޔޫމް

ޓެކްސް އެޕީލް ޓްރައިބިއުނަލްގެ ހަތަރު މެންބަރަކު މަޤާމުން ވަކިކޮށްފައިވަނީ އޮގަސްޓްމަހުގެ 26 ވަނަ ދުވަހުއެވެ. އެ ހަތަރު މެމްބަރުންނަކީ، ރައީސްކަމުގެ މަޤާމުގައި ހުންނެވި މުޙައްމަދު މުނައްވަރު ޢަލީ، ނައިބުރައީސް ޙުސައިން ޒައިދާން ޖަލީލް، މެމްބަރު އަޙުމަދު އަޝްރަފް އަދި މެމްބަރު ޚަދީޖާ ނަޢީމެވެ.

އެ ހަތަރު ބޭފުޅުން ވަކިކުރައްވާފައިވަނީ މަޖިލީހުން ލަފާދިނުމުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒެވެ.

ޓެކްސް އެޕީލް ޓްރިބިއުނަލުގެ 4 މެމްބަރަކު މަޤާމުން ވަކިކުރުމަށްފަހު، މެމްބަރުން އައްޔަނުކުރުމަށް ހުޅުވާލާފައިވަނީ މިދިޔަ އޮގަސްޓްމަހުގެ ތެރޭގައެވެ. ހުޅުވާލި މުއްދަތުގެ ތެރޭގައި 13 ފަރާތަކުން ވަނީ ކުރިމަތިލާފައެވެ.