ނޫސްވެރިން އުލުބައިންދަން ނުބުނެވޭނެ، މައްސަލަ ބަލާނަން: ރައީސް

ނޫސްވެރިން އުލުބައިންދަން ޖެހޭކަމަށް ޕީއެންސީގެ ޕީޖީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު މަޖިލީހުގެ ޖަލްސާގައި ދެއްކެވި ވާހަކައާ ގުޅިގެން އެފަދަ ވާހަކަތައް ނުދެއްކޭނެ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

މޯލްޑިވްސް ޖާރނަލިސްޓް އެސޯސިއޭޝަން (އެމްޖޭއޭ) އާއި ސީނިއާރ ނޫސްވެރިންނާއެކު މިއަދު މެންދުރުފަހު ރައީސް އޮފީހުގައި ބޭއްވި ބައްދަލުވުމަށްފަހު، ރިޔާސީ ގަނޑުވަރު މުލިއާގެއަށް ވަޑައިގަތުމަށް ނުކުމެވަޑައިގަތް ވަގުތު، އިހުތިޖާޖުކުރަމުންދިޔަ ނޫސްވެރިން ވަނީ އެ މަނިކުފާނާ ސުވާލުކޮށްފައެވެ. މި މައްސަލައިގައި ފިޔަވަޅު އަޅާނެތޯ ނޫސްވެރިން ކުރި ސުވާލަށް ޖަވާބުދެއްވަމުން ރައީސް ވިދާޅުވީ މައްސަލަ ބައްލަވާނެ ކަމަށެވެ.

މަޖިލީހުގެ ދައުރުން ބޭރުން އިއްޔެ ބޭއްވި ޖަލްސާގައި، މީޑިއާ ކޮންޓްރޯލްކުރާ ބިލަށް ބަހުސްކުރެއްވުމުގައި ފަލާހު ވިދާޅުވެފައިވަނީ މީޑިއާގެ ސަބަބުން އޭނާގެ އަބުރަށް ގެއްލުން ލިބިފައިވާ ކަމަށާއި، އެފަދަ ކަންކަން ކުރާ ނޫސްވެރިން ޖަލަށްލުމުގެ ބަދަލުގައި "އުލުބައިންދަންވީ" ކަމަށެވެ.

ފަލާހުގެ މި ބަސްފުޅުތަކާ ގުޅިގެން އެމްޖޭއޭ އިން ވަނީ މިއަދު މޯލްޑިވްސް ޕޮލިސް ސަރވިސްގައި މައްސަލަ ބަލައިދިނުމަށް އެދި ހުށަހަޅާފައެވެ. ނޫސްވެރިންގެ މިނިވަންކަމަށް އަމާޒުކޮށް މިފަދަ ބަސްތައް ބޭނުންކުރުމަކީ ކަންބޮޑުވާ ކަމެއް ކަމަށް އެމްޖޭއޭ އިން ވަނީ ފާހަގަކޮށްފައެވެ.

ފަލާހު އިޝާރާތްކުރެއްވި ވާހަކައަކީ ރަސްމީ މީޑިއާއެއްގައި ޝާއިޢުކުރެވިފައިވާ މަޢުލޫމާތެއް ނޫންކަން ފާހަގަކުރެވެއެވެ. ނަމަވެސް މަޖިލީހުގެ މެންބަރެއްގެ ހައިސިއްޔަތުން މިފަދަ ބަސްތައް ބޭނުންކުރެއްވުމާމެދު ގިނަ ފަރާތްތަކުން ވަނީ ކަންބޮޑުވުން ފާޅުކޮށްފައެވެ.