ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ސަރުކާރުން ބޭހުގެ އަގު ކޮންޓްރޯލްކުރުމަށް ނިންމަވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ސަރުކާރުން ބޭހުގެ އަގު ކޮންޓްރޯލްކުރުމަށް ނިންމަވައި، އަންނަ ނޮވެމްބަރު މަހުގެ ތެރޭގައި ޢަމަލީ މަސައްކަތް ކުރުމަށް ނިންމަފައިފިއެވެ.

ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ނެރުނު ނޫސް ބަޔާނެއްގައި ވަނީ ދިވެހި ރައްޔިތުންނަށް ރަނގަޅު ފެންވަރުގެ އަސާސީ ސިއްހީ ހިދުމަތް ފޯރުކޮށްދިނުމަށްޓަކައި ހިންގޭ އިޖްތިމާއީ ސިއްހީ އިންޝުއަރެންސް ނިޒާމް އާސަންދަ ސްކީމް އަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތްތަކެއް ފޯރުކޮށްދޭ ނިޒާމަކަށް ހެދުމަށްޓަކައި މަސައްކަތްތަކެއް ކުރެވެމުން ދާ ކަމަށެވެ. އެގޮތުން، މިކަން ހާސިލް ކުރުމަށްޓަކއި އާސަންދަ ސްކީމުން އެންމެ ގިނައިން ދޫކުރެވޭ 250 ބޭހުގެ އަގަށް ބަދަލު ގެނައުމަށް ނިންމާފައިވާ ކަމަށް އެންސްޕާއިން ނެރުނު ބަޔާނުގައި ބުނެފައިވެއެވެ. 

އެންސްޕާއިން ބުނެފައިވަނީ އަންނަ ނޮވެމްބަރު މަހުގެ ފުރަތަމަ ދުވަހުން ފެށިގެން 87 ބެހެއްގެ އަގަށް ބަދަލު ގެނައުމަށް އަދި 126 ބޭހެއްގެ އަގަށް ނޮވެމްބަރު މަހުގެ 24 ވަނަ ދުވަހުން ފެށިގެން ބަދަލު ގެނައުމަށް ނިންމާފައިވާކަމަށެެވެ. މި ބަދަލާއެކު ބޭހަށް ކުރާ ހަރަދުގެ ތެރެއިން އަހަރަކަށް ގާތްގަނޑަކަށް 220 މިލިއަން ދިވެހި ރުފިޔާ ސަލާމަތް ކުރެވޭނެ ކަމަށް އެ ބަޔާނުގައި ބުނެފައިވެއެވެ.

ސަރުކާރުން އެޅި މިފިޔަވަޅާއެކު ކުރިން އަގު ބޮޑުކޮށް ވިއްކަމުންދިޔަ ބޭހުގެ އަގު ހެޔޮވެގެންދާނެއެވެ. އެއާއެކު އާސަންދަ ސްކީމު މެދުވެރިކޮށް ރައްޔިތުންނަށް ރައްޔިތުންނަށް ހިލޭ ބޭސް ލިބިދިނުމުގެ އިންތިޒާމު އެއްވެސް ބަދަލެއް ނައިސް، މި ބޭސް ލިސްޓުގައި ހިމެނޭ ކޮންމެވެސް އެއް ބްރޭންޑެއް އެސްޓީއޯގެ ފާމަސީތައް މެދުވެރިކޮށް އިތުރު އަގަކާ ނުލައި ލިބެން ހުންނާނެއެވެ. އަދި  އާސަންދަ ސްކީމްގައި ރަޖިސްޓަރީ ކޮށްފައިވާ އަމިއްލަ ފާމަސީތައް މެދުވެރިކޮށް މި ބޭސްތައް އިތުރު އަގަކާއި ނުލާ ބޭސްތައް ލިބޭނެ ކަމަށް އެންސްޕާއިން މަޢުލޫމާދު ދެއްވައެވެ. 

އެންސްޕާގެ ބަޔާނުގައިވާގޮތުން ކަނޑައެޅިފައިވާ ލިސްޓާއި ޚިލާފަށް ބޭސް ދޫކުރާކަން ފާހަގަ ކުރެވިއްޖެ ނަމަ އެކަން "ޝިކާވަތި" މެދުވެރިކޮށް ޝަކުވާ ހުށައެޅޭނެއެވެ. އަދި 7951400 އަށް ރިޕޯޓު ކުރުމަށް އެދިފައިވެއެވެ.