ޓެކްސް އެޕީލް ޓްރައިބިއުނަލްގެ ރައީސް ކަމުގެ މަޤާމަށް އުސްތާޛު ޢަބްދުލްޣަނީ މުޙައްމަދު އައްޔަނުކޮށްފި

ޓެކްސް އެޕީލް ޓްރައިބިއުނަލްގެ ރައީސް ކަމުގެ މަޤާމަށް އަލްއުސްތާޛު ޢަބްދުލްޣަނީ މުޙައްމަދު އަދި ނައިބު ރައީސްގެ މަޤާމަށް ޙަސަން ޒުހައިރު މުޙައްމަދު ކަނޑައަޅައިފިއެވެ.

ޓެކްސް އެޕީލް ޓްރައިބިއުނަލުގެ ރައީސް އަދި ނައިބު ރައީސްގެ މަޤާމު ހޮވަނީ ޓެކްސް ނެގުމާއި ބެހޭ އިދާރީ ޤާނޫނުގެ ދަށުން، އެ ޓްރައިބިއުނަލްގެ މެންބަރުންގެ މެދުގައި ނަގާ ސިއްރު ވޯޓަކުންނެވެ. އެގޮތުން އެ ޓްރައިބިއުނަލްގެ ހުސްވެފައިވާ 4 މެންބަރުންގެ މަޤާމަށް ދާދި ފަހުން ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ ވަނީ މެންބަރުން އައްޔަން ކުރައްވާފައެވެ. އެ މަޤާމުތަކަށް ރައީސް އައްޔަނު ކުރައްވާފައިވަނީ މިމަހުގެ 24 ވަނަ ދުވަހުގައެވެ. ޓެކްސް އެޕީލް ޓައިބިއުނަލަށް މި ހަތަރު މެންބަރުން ޢައްޔަނުކުރެއްވުމުގެ ކުރިން، ރައްޔިތުންގެ މަޖިލީހުން ވަނީ މި ހަތަރު ބޭފުޅުންނަށް ރުހުން ދެއްވާފައެވެ.

ޓެކްސް އެޕީލް ޓްރައިބިއުނަލަށް ޢައްޔަނުކުރައްވާފައިވާ ހަތަރު މެންބަރުންނަކީ:

އަލްއުސްތާޛު ޢަބްދުލްޣަނީ މުޙައްމަދު

އަލްފާޟިލް ޙަސަން ޒުހައިރު މުޙައްމަދު

އަލްފާޟިލް އިބްރާހީމް ޝަރީފް

އަލްއުސްތާޛާ ޝިފްޒާ ޢަބްދުލްޤައްޔޫމް

ޓެކްސް އެޕީލް ޓްރައިބިއުނަލްގެ ރައީސް ކަމުގެ މަޤާމަށް އައްޔަނު ކުރެއްވި އަލްއުސްތާޛު ޢަބްދުލްޣަނީ މުޙައްމަދަކީ ކުރީގައި ފަނޑިޔާރުކަން ކުރެއްވި ބޭފުޅެކެވެ. ޓްރައިބިއުނަލްގައި ކުރިން ތިއްބެވި ހަތަރު މެންބަރުން ވަކިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ މަޖިލީހުގެ ލަފާފުޅެއްގެ މަތިންނެވެ.