އޮރެންޖުގެ އަގު ހަމައަކަށް އަޅުވައިފި ، އެސްޓީއޯ އިން ކިލޯއެއް 35 ރުފިޔާއަށް ވިއްކަން ފަށައިފި!

ރައްޔިތުންގެ ކުންފުނި، ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އިން، ރާއްޖޭގެ ބާޒާރުގައި އޮރެންޖުގެ އަގު އާދަޔާ ޚިލާފަށް ބޮޑުވެ، އާންމު ރައްޔިތުންނަށް ގަންނަން ނުކުޅެދިފައިވާ ދަނޑިވަޅެއްގައި، ތާޒާ އޮރެންޖު ކިލޯއެއް 35 ރުފިޔާއަށް ވިއްކަން ފަށައިފިއެވެ.

މިދިޔަ ހަފްތާތަކުގައި އަމިއްލަ  ބައެއް ވިޔަފާރިތަކުން އަސާސީ މޭވާތަކަށް ބޮޑު އަގު ނަގަމުން ދިޔުމުގެ ސަބަބުން، ގިނަ ގޭބިސީތަކުން މޭވާގެ ބައެއް ބައިވަތްތައް ގަތުން މަދުކުރަން މަޖުބޫރުވެފައި ވެއެވެ. މި ގޮންޖެހުން ދެނެގަނެ، އެސްޓީއޯއިން ވަނީ އަގުތައް ހަމަޖައްސައި، ދިވެހިންނަށް އަތްފޯރާ އަގެއްގައި ތަކެތި ފޯރުކޮށްދިނުމަށް މުހިންމު ފިޔަވަޅެއް އަޅާފައެވެ.

އެސްޓީއޯގެ އޮފިޝަލުން ހާމަކުރެއްވި ގޮތުގައި، މި ފިޔަވަޅަކީ ރައްޔިތުންނަށް ބޭއިންސާފުން ބާޒާރުގައި އަގުބޮޑުކޮށް ވިއްކުން ހުއްޓުވުމަށް ރައީސް މުޢިއްޒުގެ ސަރުކާރުން ވެފައިވާ ވަޢުދު ތަންފީޒުކުރުމުގެ ގޮތުން އަޅާ ފިޔަވަޅެކެވެ. އެސްޓީއޯގެ ވަރުގަދަ ސަޕްލައި ނެޓްވޯކާއި ދައުލަތުގެ އެހީތެރިކަމުގެ ބޭނުންކޮށްގެން، ބައެއް ވިޔަފާރިވެރިން މަތިކުރާ އަގުތަކާ ކުރިމަތިލުމަށްޓަކައި، އެސްޓީއޯއިން ތާޒާ ބާވަތްތައް ހެޔޮ އަގުގައި ފޯރުކޮށްދެވޭނެއެވެ.

މިހާރު ދުނިޔޭގެ ބާޒާރުގައި ހުރިހާ ބާވަތެއްގެ އަގުތައް މަތިވަމުން ދިޔަ ނަމަވެސް، ސަރުކާރާއި އެސްޓީއޯއިން ދަނީ މި ކަންކަމުގެ އަސަރު ކުޑަކޮށް، ރައްޔިތުންނަށް ބޭނުންވާ މުހިންމު ތަކެތި ހެޔޮ އަގުގައި ފޯރުކޮށްދެމުންނެވެ. މިހާރު ކިލޯއެއް 35 ރުފިޔާއަށް އޮރެންޖު ފުޅާދާއިރާއެއްގައި ލިބެން ހުރުމާއެކު، ދިވެހި އާއިލާތަކަށް މާލީ ބުރައެއްނެތި ފައިދާހުރި މޭވާ ބޭނުންކުރެވޭނެއެވެ.

އެސްޓީއޯގެ މި ފިޔަވަޅަކީ، ބޭއިންސާފުން ފައިދާ ނަގާ ބއެއް ވިޔަފާރިވެރިންނަށް ސާފު މެސެޖެކެވެ. ސަރުކާރުން އަބަދުވެސް އަމަލުކުރާނީ ރައްޔިތުންގެ މަސްލަހަތު ހިމާޔަތްކުރުމަށް ކަމެވެ. ރައްޔިތުންގެ އިޚްތިޔާރުގެ ގޮތުގައި އެސްޓީއޯއަށް ލިބިފައިވާ މަޤާމަކީ، ގައުމުގެ އެންމެހާ ގޭބިސީތަކަށް އިތުބާރާއި އެހީތެރިކަމެވެ.