ނޭޕާލްގައި ހިނގި ހިތާމަވެރި ހާދިސާއާ ގުޅިގެން ރައީސުލްޖުމްހޫރިއްޔާގެ ހަމްދަރުދީ ޙިއްސާކުރައްވައިފި

ނޭޕާލްގައި ފެންބޮޑުވެ ބިންގަނޑު ކަހާލައިގެން ހިނގި ހިތާމަވެރި ހާދިސާއާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ހަމްދަރުދީ ޙިއްސާކުރައްވައިފިއެވެ.

"އެކްސް"ގައި މި ހާދިސާއާ ގުޅިގެން ރައީސުލްޖުމްހޫރިއްޔާ ޙިއްސާ ކުރެއްވި ޕޯސްޓުގައި ވިދާޅުވީ، އެ ހާދިސާގައި ގިނަ ބައެއްގެ ފުރާނަ ގެއްލިފައި ވާތީ އެކަމާ ހިތާމަކުރައްވާކަމުގައެވެ. 

އަދި މި ހާދިސާއާ ގުޅިގެން ދިވެހި ސަރުކާރާއި ރައްޔިތުން، މި ހިތްދަތި ވަގުތުގައި ނޭޕާލްގެ ރައްޔިތުންނާއެކު އެއްބައިވަންތަކަމާއެކު ތިބިކަން ފާޅުކުރައްވާފައިވެއެވެ. 

އަދި މި ހާދިސާގައި ގެއްލުން ލިބުނު އެންމެހައި ފަރާތްތަކަށް ހެޔޮ ދުޢާ ދަންނަވާކަމަށް ވެސް ވިދާޅުވިއެވެ.

Deeply saddened to learn of the loss of lives and devastation caused by the floods and landslides in #Nepal. The government and the people of the #Maldives stand in solidarity with the people of Nepal during this difficult time. Our thoughts and prayers are with all those…

— Dr Mohamed Muizzu (@MMuizzu) October 7, 2025

ނޭޕާލްއަށް ކުރިމަތިވި މި ހިތާމަވެރި ހާދިސާއަކީ ބޯކޮށް ވާރޭވެހުމުގެ ސަބަބުން ހިނގި ހާދިސާއެކެވެ. މި ތޫފާންގެ އަސަރު، ނޭޕާލްގެ އިތުރުން އިންޑިއާގެ ހިމާލަޔާ ސަރަޙައްދަށްވެސް ކޮށްފައިވެއެވެ. 

މި ހާދިސާއާ ގުޅިގެން، ތޫފާންގެ އަސަރު އެންމެ ބޮޑަށްކުރި، އިންޑިއާގެ ބޯޑަރު ކައިރީގައި އޮންނަ އިލާމްއިން 41 އާއިލާއެއް ވަނީ ރައްކާތެރި ހިސާބުތަކަށް ބަދަލުކޮށްފައެވެ.