ސަރުކާރުގެ އެހީގައި އައިވީއެފް ހެދުމުގެ ފުރުސަތު 63 މީހަކަށް

ގުދުރަތީ ގޮތުން ދަރިން ލިބުމުގެ ދަތިކަން ކުރިމަތިވެފައިވާ މީހުންނަށް އެހީވުމަށް އާސަންދަ ސްކީމް މެދުވެރިކޮށް އައިވީއެފް ހެދުމުގެ ފުރުޞަތު ދިނުމުގެ ދެވަނަ ބުރުގައި، 63 މީހުންނަށް ސަރުކާރުން އެހީ ހަމަޖައްސައިފިއެވެ.

ނޭޝަނަލް ސޯޝަލް ޕްރޮޓެކްޝަން އެޖެންސީން ވިދާޅުވީ ރައީސްގެ ރިޔާސީ ވަޢުދުފުޅުގެ ދަށުން  އައިވީއެފްގެ ފަރުވާ އަށް ދަޢުލަތުގެ އެހީއަށް އެދުމުގެ ފުރުޞަތު ހުޅުވާލި ދެވަނަ ބުރުގައި 215 މީހުން، އައިވީއެފް އެހީއަށް އެދިފައިވާ ކަމަށެވެ.  އެގޮތުން އެހީއަށް އެދުނު 215 މީހުންގެ ތެރެއިން ޝަރުތު ހަމަވަނީ 63 މީހުންނަށް ކަމަށާއި އެމީހުންގެ ލިސްޓު ނެރެފައިވާ ކަމަށް އެ އެޖެންސީން ނެރުނު ބަޔާނުގައި ވެއެވެ. ދެވަނަ ބެޗުގައި އެހީ ދިނުމަށް 63 މީހުން ކަނޑައަޅާފައިވަނީ، މިއަހަރަށް ކަނޑައެޅި 100 މީހުންގެ އަދަދަށް ބަލައިގެންނެވެ.

މީހުން ކަނޑައެޅުމަށްފަހު އާންމު ކުރި ލިސްޓުގައި އެހީއަށް އެދިފައިވާ ފޯމުގެ އެންޓްރީ ނަންބަރު އެނގޭނެ ފަދައިން، ޝަރުތު ހަމަވި މީހުންގެ އިތުރުން، ޝަރުތު ހަމަނުވާ މީހުންނާއި ސަބަބުވެސް ހިމަނާފައިވެއެވެ.

އެންސްޕާއިން ވިދާޅުވީ ދެވަނަ ބުރުގައި އެހީ ހަމަޖެހިފައިވާ މީހުން ފަރުވާ ކުރިއަށްގެންދާނެގޮތުގެ ޕްލޭން ޙިއްސާކުރުމާގުޅޭގޮތުން، މިމަހުގެ 30ވަނަ ދުވަހުގެ ކުރިން މަޢުލޫމާތު ފޯރުކޮށްދޭނެކަމަށެވެ. އަދި އާންމު ކޮށްފައިވާ ލިސްްޓާއި ގުޅިގެން ޝަކުވާއެއް އޮތްނަމަަ މިމަހުގެ 10ވަނަ ދުވަހުގެ 14:00ގެ ކުރިން ހުށައެޅުމަށް އެދިފައި ވެއެވެ. އަދި  ޝަކުވާއަށް ބެލުމަށްފަހުގައި، މިހާރު ޝާއިޢުކޮށްފައިވާ ލިސްޓަށް ބަދަލު ގެންނަންޖެހޭނަމަ، މުރާޖަޢާކޮށް ލިސްޓް 15 ނޮވެމްބަރުގައި އަލުން ނެރޭނެކަމަށްވެސް އެ އިދާރާއިން ވަނީ ވިދާޅުވެފައެވެ.

ސަރުކާރުގެ އެހީގައި އައިވީއެފް ހެދުމަށް ހުޅުވާލި ފުރަތަމަ ބުރުގައި 153 މީހުން އެހީތެރިކަމަށް އެދިފައިވާއިރު އޭގެ ތެރެއިން، ޝަރުތު ހަމަވެ 37 ދެމަފިރިއަކަށް ވަނީ ސަރުކާރުން އައިވީއެފް ހެދުމަށް އެހީ ފޯރުކޮށްދީފައެވެ. މިއަހަރު 100 ދެމަފިރިއަކަށް އެހީދިނުމަށް ސަރުކާރުންވަނީ ނިންމަވާފައިވެއެވެ. އަދި އެކަމަށް ޚާއްޞަކޮށް އާސަންދަ މެދުވެރިކޮށް ބަޖެޓެއް ކަނޑައަޅާފައިވެއެވެ. އައިޔޫއައި އަދި އައިވީއެފްގެ ފަރުވާ އާސަންދަ ސްކީމް މެދުވެރިކޮށް ފޯރުކޮށްދިނުމަކީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ހަފްތާ 14ގެ ވަޢުދުގެތެރޭގައި ހިމެނޭ ވަޢުދުފުޅެކެވެ.