ޖަމާޢަތުގައި ކުރި ފަތިސް ނަމާދާއެކު ނަޞްރުގެ ދުވަހުގެ ހަރަކާތްތައް ފަށައިފި

ޖަމާޢަތުގައި ކުރި ފަތިސް ނަމާދާއެކު ނަޞްރުގެ ދުވަހުގެ ހަރަކާތްތައް ފަށައިފިއެވެ. 

އިސްލާމީ މަރުކަޒުގައި ކުރި ފަތިސް ނަމާދުގެ ޖަމާޢަތުގައި ސިފައިންގެ އެންމެ މަތީ ވެރިޔާ އަދި ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު  އަދި ދަޢުލަތުގެ އިސްވެރިން ބައިވެރިވެވަޑައިގެންނެވިއެވެ. އެގޮތުން ރައީސުލްޖުމްހޫރިއްޔާގެ  ނައިބު އަލްއުސްތާޛް ޙުސައިން މުޙައްމަދު ލަޠީފާއި ދައުލަތުގެ ވަޒީރުންނާއި އިސްވެރިން ބައިވެރިވެވަޑައިގެންނެވިއެވެ.

މިއަދުގެ ފަތިސްނަމާދުގެ ޖަމާޢަތުގައި ޔުނިފޯމްއެޅި ގިނަ އަދަދެއްގެ ދިވެހި ސިފައިންނާއި އާންމުންވެސް ބައިވެރިވެފައިވެއެވެ. ސިފައިންގެ ހުރިހާ އޭރިއާ ކޮމާންޑުތަކެއްގައި ވެސް ނަސްރުގެ ދުވަސް ފާހަގަކުރުމުގެ ގޮތުން އެއް ޖަމާއަތެއްގައި ފަތިސް ނަމާދުކޮށްފައިވެއެވެ.

ނަޞްރުގެ ދުވަހާއު ގުޅިގެން ނޮވެންބަރުގެ 3 ގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް  ހަރުކޮށްފައިވެއެވެ. މި ރަސްމިއްޔާތަށްފަހު "ނަޞްރު ދުވަހުގެ ސިފައިންގެ މައުރަޒު" ވެސް ވަނީ ހުޅުވާފައެވެ. މި މައުރަޒު ހުޅުއްވައިދެއްވީ ސިފައިންގެ އެންމެ މަތީ ވެރިޔާ އަދި ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު  އެވެ. މިއަހަރުގެ "ސިފައިންގެ މައުރަޒު" ބޭއްވުމަށް ހަމަޖެހިފައިވަނީ ނޭޝަނަލް އާޓް ގެލަރީގައެވެ.