މިއަދާ ހަމައަށް އަޅުގަނޑު ކޮންމެ ދުވަހެއް ހޭދަ މިކުރަނީ ޤައުމުގެ މިނިވަންކަން ޙިިމާޔަތްކުރުމަށްޓަކައި- ރައީސުލްޖުމްހޫރިއްޔާ

އަހަރެއްހާ ދުވަސް ކުރިން ވެރިކަމާއި ހަވާލުވެވަޑައިގެން، މިއަދާ ހަމައަށް އައިއިރުވެސް ކޮންމެ ދުވަހެއް ހޭދަ ކުރެއްވީ ޤައުމުގެ މިނިވަންކަން ހިމާޔަތްކުރުމަށްޓަކައި ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ. 

ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ރައްޔިތުން  ހަވާލުކުރި ޒިންމާއާ ހަވާލުވި ދުވަހު ދެންނެވި ފަދައިން، ޤައުމުގެ މިނިވަންކަން ޙިމާޔަތް ކުރުމަކީ  ލިބޭނޭ އެންމެބޮޑު ފަޚުރު ކަމަށާއި އިރާދަކުރެއްވީތީ މިއަދާ ހަމަޔަށް އައިއިރުވެސް، ކޮންމެ ދުވަހެއްވެސް ހޭދަ ކުރެއްވީ، ޤައުމުގެ މިނިވަންކަން ޙިމާޔަތް ކުރުމަށްޓަކައި ކަމަށެވެ. އެގޮތުން ޤައުމުގެ ޢަސްކަރީ ބާރު ވަރުގަދަކޮށް، ކުރިއަށް އޮތް ދުވަސްތަކަށް ފޯރުކޮށްދިނުމަށްޓަކައި، ދިފާޢީ ބާރު ވަރުގަދަކުރުމަށް މަސައްކަތް ކުރެއްވި ކަމަށް އެމަނިކުފާނު ވިދާޅުވިއެވެ. 

ރައީސް މުޢިއްޒު ވިދާޅުވީ މިދިޔަ އަހަރެއްހާ ދުވަހުގެތެރޭގައި، ސިފައިންގެ ވަރުގަދަކުރުމަށް ނުހަނު ގިނަ މަސައްކަތްތަކެއް ވަނީ ކުރެވިފައި ހުރިކަމަށެވެ. އެހެން ނަމަވެސް މި ޒަމާނަށް ފެތޭގޮތަށް އަދި ކުރިއަށް އޮތް ދުވަސްތަކަށް މުހިންމު ފެންވަރަކަށް ވަރުގަދަކުރަން ޖެހިފައި އޮތްކަމަށް އެމަނިކުފާނު ވިދާޅުވިިއެވެ.  ކަން މިހެން އޮތުމާއެކު އެއާކޯ ޤާއިމުކުރެވި، މިޒަމާނުގެ އެންމެ ޒަމާނީ ޓެކްނޮލޮޖީ ހިމެނޭ ޔޫ.އޭ.ވީތައް ގެނެވި، އިކޮނޮމިކް ޒޯން އަބަދުވެސް ބެލެހެއްޓޭނެ ފަދަ ޤާބިލިއްޔަތު، އިރާދަކުރެއްވީތީ ސިފައިން ކިބައިގައި ޤާއިމުކުރެވިގެންދިޔަ ކަންވެސް ފާހަގަ ކުރެއްވިއެވެެ.

ޤައުމުގެ ދިފާޢީ ބާރު ވަރުގަދަ ކުރުމަށް ކުރައްވާ މަސައްކަތްތަކުގެ ތެރެއިން، ކޯސްޓްގާޑުގެ ކެޕޭސިޓީ ވަރުގަދަކުރުމަށްޓަކައި ސްޕެޝަލް ބޯޓް ކޯޑްރަންއެއް ފެށިފައިވާކަމަށްވެސް ރައީސް ވިދާޅުވިއެވެ. އެއާއެކު ކަނޑުއޮތްގިރި މިހާރު ސިފައިންނާ، ކޯސްޓްގާޑާ ހަވާލުކުރެވިފައިވާކަން ފާހަގަ ކުރެއްވިއެވެ.  

ވޭތުވެދިޔަ ހަތަރު ފަސް އަހަރުގެ ތެރޭގައި ނުބެލެހެއްޓި އިހުމާލު ވުމުގެ ސަބަބުން ރާއްޖޭގެ އެކި ކަންކޮޅުތަކުގައި ހުރި ސިފައިންގެ މަރުކަޒުތައް ވަރަށް ބޮޑަށް ވީރާނާވާން ފަށާފައިވާ ކަމަށާއި، އެކުވެރި ދައުލަތްތަކުގެ އެހީތެރިކަމަށް މިހާރުވާނީ އެދިފައިވާކަމަށް ރައީސް ވިދާޅުވިއެވެ.  އަދި މި ހުރިހާ މަރުކަޒުތައް، އެފަދަ ފަރާތްތަކުގެ އެހީތެރިކަމާ އެކީގައި ހެދިގެންދާނެ ކަމުގެ އުފާވެރި ޚަބަރުވެސް އެމަނިކުފާނު ދެއްވިއެވެ. 

ރޭ ބޭއްވި ޖަލްސާގައި ރައީސް ވަނީ ނިޝާން ޢަސްކަރީގެ ވެރިކަން ލިބިވަޑައިގެންނެވި މޫސާ ޢަލީ ޖަލީލަށް ހޫނު މަރުޙަބާއެއް ދަންނަވާފައެވެ. އަދި މި ޤައުމުގެ ޙައްޤުގައި ކެރިގެން ޖިހާދުކުރުމުގެ ހިތްވަރު އަޅުގަނޑުމެންގެ ތެރޭގައި އާލާކުރުމަށް ޢަޒުމް ކަނޑައެޅުމަށް ރައީސް ގޮވާލެއްވިއެވެ.