މާލޭގައި އަލުން ސީއެޗްއެސްއީ ހުޅުވުމަކީ ގާތުން ތަޢުލީމު ދިނުމުގެ ސިޔާސަތު ކަށަވަރުކުރެއްވުމަށް ރައީސް ނިންމެވި ނިންމެވުމެއް- ތަޢުލީމީ ވަޒީރު

މާލޭގައި ސީއެޗްއެސްއީ އަލުން ހުޅުވުމަކީ ގާތުން ތަޢުލީމު ދިނުމުގެ ސިޔާސަތު ކަށަވަރުކުރެއްވުމަށް އެމަނިކުފާނު ނިންމެވި ނިންމެވުމެއް ކަމަށް ތަޢުލީމީ ވަޒީރު ޑރ.އިސްމާޢީލް ޝަފީޢު ވިދާޅުވެއްޖެއެވެ.

މިރޭ ސެންޓަރ ފޯރ ހަޔަރ އެޑިއުކޭޝަން-މާލެ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު ވިދާޅުވީ ސަރުކާރުގެ ސިޔާސަތަކީ ދަރިވަރުންނާ ވީހާވެސް ގާތުން ތައުލީމު ފޯރުކޮށްދިނުންކަމަށެވެ.

ވަޒީރު ވިދާޅުވީ ސީއެސްއެސްއީ ހުޅުމާލެއަށް ބަދަލުކޮށް ކިޔަވައިދޭން ފެށުމުން ގިނަ ބެލެނިވެރިންނާއި ދަރިވަރުންގެ ކަންބޮޑުވުންތަކާއި ގުޅިފައިވާ އެތައް ސިޓީއެއް އެމަނިކުފާނަށް ލިބިވަޑައިގަތްކަމަށެވެ. އެގޮތުން މޫސުމުގެ ގޮތުން ދަތުރުކުރަން ދަތިވެ ހުޅުމާލެ ދިއުމަކީ އުނދަގޫ ކަމެއް ކަމުގައި ބެލެނިވެރިންގެ ފަރާތުން ޝަކުވާ ރައީސަށް ލިބިވަޑައިގެންނެވި ކަމަށް ވަޒީރު ވިދާޅުވިއެވެ. އެހެން ކަމުން ސީއެސްއެޗްސީގެ ދަރިވަރުންނަށް މާލޭގައި ތިބެގެން ތަޢުލީމު ޙާސިލުކުރެވޭނެ އިންތިޒާމު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު  ހަމަޖައްސަވައިދެއްވީ ކަމުގައި ވަޒީރު ވިދާޅުވިއެވެ.

މި ރަސްމިއްޔާތުގައި ވަޒީރު ވަނީ ރަނގަޅު ނަތީޖާ ނުލިބޭ ދަރިވަރުން ސިފައިން އަދި ފުލުހުންގެ ޚިދުމަތަށް ވަންނަން މަޖުބޫރުވާ ޕްރޮގްރާމުގެ ސަބަބުން ގައުމު އާރާސްތު ކުރުމަށް ގިނަ ޒުވާނުންތަކެއް ބިނާ ކުރެވޭނެކަން ފާހަގަ ކުރައްވާފައެވެ. ރޭ ނަސްރުގެ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް ވަނީރަނގަޅު ނަތީޖާ ނުލިބޭ ދަރިވަރުން 16 އަހަރުވުމުން ސިފައިންގެ އާއި ޕޮލިހަށް ވަންނަން މަޖުބޫރުވާ ޕްރޮގްރާމެއް ފެށުމުގެ ނިންމެވިކަން އިއުލާން ކުރައްވާފައެވެ. 

ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ، ރައީސުލްޖުމްހޫރިއްޔާ ޢިއުލާންކުރެއްވި ޤައުމީ ޚިދުމަތުގެ ޕްރޮގްރާމްގެ ސަބަބުން މަގުމަތިވެގެންދާ ޒުވާނުންގެ ނިސްބަތް ދަށަށް ދާނެކަމަށެވެ. އަދި އޯލެވެލް ނިންމާ ކުދިންނަށް ކުރިއަށްދާނެ އިތުރު ފުރުސަތުތަކެއް ފަހިކޮށްދިނުމަކީ ޤައުމު ބިނާކުރުމަށް ނުކުންނަ ޒުވާނުން އިތުރުވެގެންދާނެކަމެއް ކަމުގައެވެ. 

ވަޒީރުގެ ވާހަކަފުޅުގައިވަނީ މަތީ ތަޢުލީމުގެ ފުރުސަތު ފުޅާކޮށް އޭލެވެލް ހެދުމަށް ގިނަ ދަރިވަރުންނަށް ފުރުސަތު ފަހިކޮށްދިނުމަށް ގެނައި ބަދަލާއެކު ދެހާހާއި ގާތްކުރާ ޢަދަދަކަށް ކުދިން އޭލެވެލްއަށް މިއަހަރު ވަދެފައިވާކަން ފާހަގަ ކުރައްވާފައެވެ. ވަޒީރު ވިދާޅުވީ ކުރީގައި އޭލެވެލްއަށް ކިޔެވުމުގެ އިންތިޒާމު އޮތްގޮތުން 1300 އެއްހާ ދަރިވަރުން އޭލެވެލްއަށް ވަންނަކަމަށާއި އަލަށް ޕްރައިވެޓް އަދި ޕަބްލިކް ސްކޫލްތައް އެއްކޮށް 800 އެއްހާ ކުދިންނަށް ފުރުސަތު ފަހިކޮށްދެވިފައިވާ ކަމަށެވެ. 

ތަޢުލީމީ ޒުވާނުން ބިނާކޮށް ތަފާތު ދާއިރާތަކުން މަތީ ތަޢުލީމް ޙާޞިލް ކުރުމުގެ ފުރުސަތު ފަހިކޮށްދެއްވުމަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ޚާއްޞަ އިސްކަމެއް ދެއްވާ ދާއިރާއެކެވެ. އެގޮތުން ތަޢުލީމް ޙާޞިލްކުރުމަށް ދަރިވަރުންނަށް ފަސޭހަވާނެ މަގުތަށް ސަރުކާރުން ދަނީ ފަހިކޮށްދެއްވަމުންނެވެ.