ގެދޮރުވެރިކަމަށް ދާއިމީ ޙައްލެއް ގެނެސްދިނުމަށް ސަރުކާރުގެ ފުރަތަމަ ދުވަހުން ފެށިގެން މަސައްކަތް ފަށައިފިން - ރައީސް

ގެދޮރުވެރި ކަމަކީ ރާއްޖެއަށް ދިމާވެފައިވާ އެންމެ ބޮޑު މައްސަލަ ކަމަށާއި ގެދޮރުވެރިކަމުގެ މައްސަލައަށް ދާއިމީ ޙައްލެއް ގެނެސްދިނުމަށް ރިޔާސީ ވަޢުދުފުޅާ އެއްގޮތަށް ސަރުކާރުގެ ފުރަތަމަ ދުވަހުން ފެށިގެން ފަށާފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ހިޔާވެހި ފައިނޭންސިންގ ޕްރޮގްރާމް އިފްތިތާޙްކޮށްދެއްވާ ވަހާކަފުޅު ދައްކަވަމުން ރައީސް ވިދާޅުވީ އިންޓަރެސްޓް ރޭޓް މަތިވުމާއި ގުޅިގެން ގެދޮރު ނުހެދި ތިބި ފަރާތްތަކަށް ޙައްލެއް ލިބިގެންދާނެކަމަށެ.

ރައީސް ޑރ މުޢިއްޒު ވިދާޅުވީ ވަޢުދުވެފައި އޮންނަގޮތަށް އެކަން ކުރުމަށް ޚާއްޞަ އިސްކަމެއް ދެއްވާ ކަމަށާއި ސަރުކާރުގެ މުޅި ޓީމުވެސް އެކަމަށް މަސައްކަތް ކުރައްވަމުންދާކަމަށެވެ. އެގޮތުން ގެެދޮރުވެރިކަމުގެ މައްސަލައަށް ޙައްލު ހޯދުމަށް ބޭންކް ތަކުން ވަރަށް ބޮޑު އެހީތެރިކަމެއް ވަމުން ގެންދަވާކަން ރައީސް ފާހަގަ ކުރެއްވިއެވެ. ރައީސް ވިދާޅުވީ މިއަދު އިފްތިތާޙް ކުރެވިގެން ދިޔަ ހިޔާވަހި ފައިނޭންސިންގ ޕްރޮގްރާމް ވެގެންދާނީ ރާއްޖޭގައި އޮތް ގެދޮރުވެރިކަމުގެ މައްސަލައަށް ދާއިމީ ޙައްލު ގެނައުމަށް އެންމެ ފުރިހަމަ ނަތީޖާ ނުކުންނާނެ ކަމަށް ކަމުގައެވެ. 

މި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ، ރައީސްގެ ވަޢުދުފުޅާއި އެއްގޮތަށްް މިސަރުކާރު ނިމޭއިރު ހައުސިންގ އަށް އެކްސެސް ނުލިބޭ މީހަކު ނުހުންނާނެ ކަމަށާއި އެކަން އެގޮތަށް ވެގެންދާތަން ދެކެން ބޭނުންފުޅުވެ ވަޑައިގަންނަވާ ކަމަށެވެ. އެގޮތުން މިއަދު ތަޢާރަފްކުރެވުނު ލޯން ސްކީމުން އެތައްހާސް ރައްޔިތަކަށް އެމަގު ފަހިވެގެންދާނެ ކަމަށް އެމަނިކުފާނު ވިދާޅުވިއެވެެ. 

"ހިޔާވަހި ފައިނޭންސް ސްކީމް"ގެ ދަށުން ހުސްބިމެއްގައި އަލަށް އިމާރާތެއް ކުރުމަށް ނުވަތަ ނުނިމި ހުރި އިމާރާތެއް އެއްކޮށް ނިންމުމަށް ނުވަތަ ބާވެ ހަލާކުވެފައިވާ އިމާރާތެއް މަރާމާތުކުރުމަށް ފައިސާ ހަމަޖެހިގެންދާނެއެވެ. މި ސްކީމަކީ އެ މަނިކުފާނުގެ ވައުދުފުޅާ އެއްގޮތަށް %5 އިންޓްރެސްޓުގައި ދޫކުރާ ލޯނަށް އެދި ހުށަހެޅުމުގެ ފުރުސަތު ހުޅުވާލުމުގެ ގޮތުން ތަޢާރަފް ކޮށްފައިވާ ލޯން ސްކީމެކެވެ. ރައީސް ވިދާޅުވީ ކޮންމެ ރަށެއްގައި ހުރި ނަމަވެސް އެ މީހެއްގެ އަމިއްލަ ގޯތި ނޫނީ ބިން ނޫނީ އިމާރާތް ދިރިއުޅެވޭ ވަރުގެ ބޯހިޔާވައްސަކަށް ހެދުމަށް މި ސްކީމްގެ ދަށުން އެހީތެރިކަން ލިބިގެންދާނެ ކަަމަށެވެ.

ސްކީމާއި ގުޅޭގޮތުން ރައީސް އިތުރަށް ވިދާޅުވީ މިއީ މިއަހަރު ކުރިއަށްގޮސް އަންނަ އަހަރު ނިންމާލާނެ ކަމެއް ނޫންކަމަށާއި މިއީ ދާއިމަށް ކުރިއަށް ގެންދާނެ މަޝްރޫއެއްކަމުގައެވެ. އެގޮތުން އަންނަ އަހަރަށް ލަފާކުރާ ބަޖެޓުގައި މި ސްކީމަށް އެއް ބިލިއަން ރުފިޔާ ކަނޑައަޅާފައިވާނެ ކަމަށާއި،އެޗްޑީއެފްސީ، ބީއެމްއެލް ނުވަތަ އެމްއައިބީ މެދުވެރިކޮށް ލޯނު ދޫކުރަމުން ދާނެކަމަށް ރައީސް ވިދާޅުވިއެވެ. އެގޮތުން މި ދައުރުގެ ތެރޭ ކޮންމެ އަހަރަކު ވެސް ބަޖެޓުގައި އެއް ބިލިއަން ރުފިޔާ މިކަމަށް ކަނޑައަޅާނެކަމަށް ރައީސް ވިދާޅުވިއެވެ. 

ރައީސް ވިދާޅުވީ ޤައުމީ މައްސަލަތައް ފިޔަވާ އެންމެ އިސްކަމެއް ދެއްވާ ކަމަކީ ގެދޮރުގެ މައްސަލަ ކަމަށާއި އެގޮތުން އަންނަ އަހަރުގެ ބަޖެޓުގައި އަލަށް ފަށާ މަޝްރޫއުތަކުގެ ތެރެއިން އެންމެ އިސްކަން ދީފައިވާނީ، ގެދޮރުގެ ވައުދު ފުއްދުމަށް ކަމަށެވެ.