ގްރީން ސްޓްރިޓްސް ބަލިކޮށް ލީގުގައި ޔޫވީ ތިން ދަރަޖަ ކުރިޔަށް

ދިވެހި ޕްރިމިއަރ ލީގުގެ ފުރަތަމަ ބުރުގެ ފަހު މެޗު މިއަދު ހަވީރު ކުޅުނުއިރު، އެ މެޗުގައި ޔުނައިޓެޑް ވިކްޓަރީ (ޔޫވީ)އިން ކްލަބް ގްރީން ސްޓްރީޓްސް 3-1 އިން ބަލިކޮށް، ލީގުގައި ތިން ދަރަޖަ ކުރިއަށް ޖެހިލައިފިއެވެ.

މި މެޗަށް ނިކުތްއިރު ޔޫވީ އޮތީ 4 ޕޮއިންޓާއެކު ލީގުގެ އެންމެ ފުލުގައެވެ. އަދި މިއަދުގެ މެޗު ކާމިޔާބުކޮށް ހޯދި 3 ޕޮއިންޓާއެކު އެ ޓީމު ލީގުގެ 7ވަނައަށް އެރީ ޖުމްލަ 7 ޕޮއިންޓާއެކުއެވެ.

މި މެޗުގައި ޔޫވީއިން ލީޑު ނެގީ ފުރަތަމަ ހާފުގައެވެ. މެޗުގެ 18ވަނަ މިނެޓުގައި އެ ޓީމަށް ލީޑު ނަގައިދިނީ މުސްލިމް މުޙައްމަދުއެވެ. އަދި ފަހު ހާފުގައި އެ ޓީމުން ލީޑު ފުޅާކުރީ މިސްރުގެ ފޯވާޑް، މުސްތަފާ މަހްމޫދް އެލްޝާޒްލީ އާއި އާދަމް ޝިޔާން މުޙައްމަދު ކާމިޔާބުކުރި ގޯލުތަކުންނެވެ. އެއީ މެޗުގެ 62 ވަނަ މިނެޓާއި 78 ވަނަ މިނެޓުގައެވެ.

ގްރީން ސްޓްރީޓްގެ ހަމައެކަނި ގޯލު، މެޗު ނިމެން 6 މިނެޓަށް ވެފައި ވަނިކޮށް ކާމިޔާބުކޮށްދިނީ ރިލްވާން ވަޙީދެވެ.

މި މެޗާއެކީ ލީގުގެ ފުރަތަމަ ބުރު ނިމުނުއިރު، 27 ޕޮއިންޓާއެކު ލީގު ތާވަލުގެ އެއްވަނައިގައި އޮތީ މާޒިޔާ ސްޕޯޓްސް އެންޑް ރެކްރިއޭޝަނުންނެވެ. އެ ޓީމު ވަނީ ކުޅުނު 9 މެޗު ވެސް ކާމިޔާބުކޮށްފައެވެ.

އަދި ލީގުގެ ދެވަނައިގައި އޮޑި ސްޕޯޓްސް ކްލަބް އޮތްއިރު، ތިން ވަނައިގައި އޮތީ ނިއު ރޭޑިއަންޓް ސްޕޯޓްސް ކްލަބެވެ. އޮޑި ސްޕޯޓްސްއަށް މާޒިޔާއަށް ވުރެ 5 ޕޮއިންޓު މަދުން ލިބިފައިވާއިރު، ނިއު އާއި އޮޑި ސްޕޯޓްސްއާ ދެމެދު ވެސް 5 ޕޮއިންޓުގެ ފަރަގެއް އެބައޮތެވެ.

މީގެ އިތުރުން، ކްލަބް އީގަލްސްގެ ކޯޗެއްގެ މަޤާމާއި އަބްދުالله ހަނީފް ހަވާލުވުމަށްފަހު އޭނާ ކަނޑައެޅި އަމާޒަށް މި ބުރުގައި ވާސިލްވުމަށް މަދުވީ އެންމެ ޕޮއިންޓެކެވެ. އެ ޓީމުން ދަށް ނަތީޖާތަކެއް ނެރެމުން ދަނިކޮށް ހަނީފް ހަވާލުވުމަށްފަހު ވަނީ ފުރަތަމަ ބުރު ނިމުމުގެ ކުރިން ގަދަ ހަތަރަކަށް އެރުމަށް އަމާޒު ހިފާފައެވެ. އެގޮތުން އޭނާ ހަވާލުވިފަހުން އެ ޓީމުން އެއްވެސް މެޗަކުން ބަލިވެފައި ނުވާއިރު، ލީގުގެ ފަސްވަނައިގައި ނިންމާލަން ޖެހުނީ ފުރަތަމަ ބުރުގެ ފަހު މެޗުގައި ވިކްޓަރީއާ އެއްވަރުވުމުންނެވެ.

އެހެންކަމުން ލީގުގެ ހަތަރުވަނައިގައި 14 ޕޮއިންޓާއެކު ބުރު ސްޕޯޓްސް ކްލަބް އޮތްއިރު، އީގަލްސް އޮތީ  13 ޕޮއިންޓާއެކު ފަސްވަނައިގައެވެ.