ޖީޕީއެސް ޖޭމްކުރިކަމަށް އުތުރު ކޮރެއާއަށް ދެކުނު ކޮރެއާގެ އިލްޒާމު

އުތުރު ކޮރެއާއިން ގްލޯބަލް ޕޮޒިޝަނިންގ ސިސްޓަމް (ޖީޕީއެސް) ޖޭމިން އެޓޭކެއް ދީފައިވާކަމަށް ދެކުނު ކޮރެއާގެ ސިފައިން ބުނެފިއެވެ. މި އެޓޭކްގެ ސަބަބުން ދެކުނު ކޮރެއާގެ އެތައް އުޅަނދުތަކަކާއި މަދަނީ މަތިންދާބޯޓުތަކަށް އަސަރުކޮށްފައިވާ ކަމަށްވެސް ބުނެފައިވެއެވެ.

ދެކުނު ކޮރެއާގެ ޖޮއިންޓް ޗީފްސް އޮފް ސްޓާފް (ޖޭސީއެސް) އިން ހޮނިހިރު ދުވަހު ބުނެފައިވަނީ، އުތުރު ކޮރެއާއިން ހާޖޫ އަދި ކެސޮންގ ސަރަހައްދުތަކުގައި ނޮވެމްބަރު 8 އަދި 9 ވަނަ ދުވަހު ޖީޕީއެސް ޖެމިން ޕްރޮވޮކޭޝަންތަކެއް ހިންގާފައިވާ ކަމަށެވެ. މީގެ ސަބަބުން ގިނަ އަދަދެއްގެ އުޅަނދުފަހަރާއި މަދަނީ މަތިންދާބޯޓުތަކުގެ ހިންގުމަށް ބުރޫއަރާފައިވާ ކަމަށްވެސް ބުނެފައިވެއެވެ.

ޖޭސީއެސް އިން އުތުރު ކޮރެއާއަށް ގޮވާލާފައިވަނީ މި ހަރަކާތްތައް ވަގުތުން ހުއްޓާލުމަށެވެ. އަދި މިފަދަ ކަންކަމުގެ ޒިންމާ އުފުލަންޖެހޭނެ ކަމަށްވެސް އިންޒާރުދީފައިވެއެވެ.

މީގެ ކުރިން މޭ 29 އިން ޖޫން 2 އަށް ހިނގި މިފަދަ ޖެމިން ހަރަކާތެއްގައި 500 އަށްވުރެ ގިނަ މަތިންދާބޯޓާިންދާބޯޓާއި އެތައް އުޅަނދުތަކަކަށް އަސަރުކުރި ކަމަށް ދެކުނު ކޮރެއާގެ ސަރުކާރުން ބުނެފައިވެއެވެ. އޭރު މިކަމާ ގުޅިގެން ދެކުނު ކޮރެއާއިން އދ. ގެ އޭވިއޭޝަން ޖަމްޢިއްޔާ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިސީއޭއޯ) އަށް ޝަކުވާ ހުށަހެޅިއެވެ.

ދެ ކޮރެއާގެ ދެމެދުގައި ފަހަކަށް އައިސް ގުޅުން ގޯސްވަމުން އައިސްފައިވާއިރު، އުތުރު ކޮރެއާއިން މިސައިލް ޓެސްޓުތައް ކުރުމާއި، ދެކުނު ކޮރެއާއަށް ކުނި އެޅުމާއި، އަދި ރަޝިއާގެ ހަނގުރާމައަށް އުތުރު ކޮރެއާގެ ސިފައިން ފޮނުވާފައިވާ ކަމަށް ބެލެވޭ ކަންކަމުގެ ސަބަބުން ދެ ގައުމުގެ ދެމެދުގައި ހަމަނުޖެހުން އިތުރުވެފައިވެއެވެ.