ވިމެންސް ލީގު: ސާލިޔާގެ ދެވަނަ ހެޓްރިކާއެކު އޮޑި ސްޕޯޓްސްއިން އެއްވަނައިގައި ލީޑު ފުޅާކޮށްފި

އެފްއޭއެމް ވިމެންސް ލީގުގައި ބިސް ބުރު ސްޕޯޓްސް ކްލަބާ ދެކޮޅަށް ކުޅުނު މެޗުގައި، އޮޑި ސްޕޯޓްސް ކްލަބްގެ ފާތިމަތު ސާލިޔާ މި މުބާރާތުގައި ހެދި ދެވަނަ ހެޓްރިކާއެކު، އެ ޓީމު ތާވަލުގެ އެއްވަނައިގައި ތިން ޕޮއިންޓުގެ ލީޑެއް ނަގައިފިއެވެ.

ހެންވޭރު ދަނޑުގައި މިއަދު ހަވީރު ކުޅުނު މި މެޗު އޮޑި ސްޕޯޓްސްއިން ކާމިޔާބު ކުރީ 7-0އިންނެވެ. 

ސާލިޔާ މި މެޗުގައި އޭނާގެ ހެޓްރިކް ފުރިހަމަ ކުރީ ފުރަތަމަ ހާފުގައެވެ. އެއީ 11 މިނެޓުގެ ތެރޭގައެވެ. އެގޮތުން ފުރަތަމަ ގޯލު 13ވަނަ މިނެޓުގައި ކާމިޔާބުކުރިއިރު، ދެވަނަ ގޯލު ޕެނަލްޓީއަކުން ކާމިޔާބުކުރީ 23ވަނަ މިނެޓުގައެވެ. އަދި އޭގެ މިނެޓެއް ފަހުން އިތުރު ގޯލަކާއެކު ސާލިޔާ ވަނީ މުބާރާތުގައި އޭނާގެ ދެވަނަ ހެޓްރިކް ފުރިހަމަ ކުރިއެވެ. 

ސާލިޔާގެ ގޯލުތަކުގެ ކުރިން، މެޗުގެ 11ވަނަ މިނެޓުގައި އޮޑި ސްޕޯޓްސްގެ ބިދޭސީ ކުޅުންތެރިޔާ، ރިހްލާ އެ ޓީމަށް ލީޑު ނަގައިދިނެވެ. އެހެންކަމުން އެ ޓީމުން ފުރަތަމަ ހާފު ނިންމާލީ 4 ގޯލުގެ ލީޑަކާއެކުއެވެ.

ދެވަނަ ހާފުގެ ދެވަނަ މިނެޓުގައި ރިހްލާ އިތުރު ގޯލެއް ކާމިޔާބުކުރިއިރު، އެ ޓީމުގެ ފަހު ދެ ގޯލު ކާމިޔާބުކުރީ ފާތުމަތު އިނާޝާއެވެ.

މި މެޗުގައި ހެދި ހެޓްރިކާއެކު ސާލިޔާ ވަނީ މިހާތަނަށް މި މުބާރާތުގައި ހަތް ލަނޑު ޖަހާފައެވެ. އޭނާ ވަނީ ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުގައި ހަތަރު ލަނޑު ކާމިޔާބުކޮށްފައެވެ.

މި މޮޅާއެކު ތާވަލުގެ އެއްވަނައިގައި އޮޑި ސްޕޯޓްސްއިން ތިން ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު ތިން މެޗުން ހަތް ޕޮއިންޓު ލިބިފައެވެ. އަދި މިއީ މި މުބާރާތުގައި ބިސްބުރު ބަލިވި ހަތަރުވަނަ މެޗެވެ. އެ ޓީމު މިހާތަނަށް އެއްވެސް މެޗަކުން މޮޅުވެފައި ނުވާއިރު، ކޮޅަށް ވަތް 15 ގޯލާއެކު އެ ޓީމު އޮތީ ތާވަލުގެ ފުލުގައެވެ.

މި މުބާރާތުގެ މެޗެއް މާދަމާ ވެސް އޮންނާނެއެވެ. އެ މެޗުގައި ބައްދަލުކުރާނީ ޓީސީ ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަންއެވެ.