ސައުދީގެ ކްލަބުތަކުން ސަލާހް ހޯދުމުގެ މަސައްކަތް ފަށައިފި

ސައުދީ ޕްރޮފެޝަނަލް ލީގުގެ ކްލަބުތަކުން، ލިވަޕޫލްއަށް ކުޅެމުން އަންނަ މުޙައްމަދު ސަލާޙް ހޯދުމުގެ މަސައްކަތް ފަށާފައިވާކަމަށް، އެ ލީގުގެ ޗީފް އެގްޒެކެޓިވް، އޮމަރް މުޤާބެލް ހާމަކޮށްފިއެވެ.

އެ ކްލަބުތަކުން ސަލާޙް ހޯދުމުގެ މަސައްކަތް ފެށީ، ލީގުގައި ލިވަޕޫލް އެންމެ ފަހުން ކުޅުނު މެޗަށް ފަހު ނޫސްވެރިންނާ ބައްދަލުކޮށް ދެއްކި ވާހަކަތަކާ ގުޅިގެން، ކޯޗު، އާރނޭ ސްލޮޓްއާ ދެމެދު އޮތް ގުޅުން ހީނަރުވެފައިވުމުންނާއި، ކްލަބު ދޫކޮށްދާން ބޭނުންވާފަދަ އިބާރާތްތަކެއް އެ އިންޓަވިއުގައި ސަލާޙް ބޭނުންކޮށްފައިވާ ދަނޑިވަޅެއްގައެވެ. 

ސައުދީގެ ވެރިރަށް ރިޔާޟުގައި އޮތް ވޯލްޑް ފުޓުބޯލް ސަމިޓްގައި ވާހަކަ ދައްކަމުން އޮމަރު ބުނީ، ސައުދީއިން ސަލާޙްއަށް މަރުހަބާ ކިޔާނެ ކަމަށާއި، ނަމަވެސް އޭނާ ގެނައުމަށް މަޝްވަރާ ކުރަން ޖެހޭނީ އެކަމަށް ބޭނުންވާ ކްލަބުތަކުން ކަމަށެވެ. 

އެހެންކަމުން، މަސްރަޙު މިހާރު އޮތް ގޮތުން، ޖެނުއަރީގައި ހުޅުވާލާ ޓްރާންސްފަރ ވިންޑޯގައި ސަލާޙް ޢަރަބި ކްލަބަކުން ފެނުމަކީ ވަރަށް އެކަށީގެންވާ ކަމެކެވެ. 

_{ހޮނިހިރު ދުވަހު ދިން އިންޓަވިއުގައި ސަލާޙް ބުނީ، އޭނާ އާއި ޓީމުގެ ކޯޗާ ދެމެދު މިހާރު އެއްވެސް ގުޅުމެއް ނެތްކަމަށް. ނަމަވެސް އޭގެ ފަހުން ސްލޮޓު ބުނީ އޭނާއަށް އެކަން ނޭންގޭ ކަމަށް---}

ސައުދީ ލީގަށް ސަލާޙް ގެނައުމަށް 2023ވަނަ އަހަރުގެ ސެޕްޓެންބަރުގައި ވެސް މަސައްކަތް ކޮށްފައިވެއެވެ. އެ ފަހަރު އަލް އިއްތިހާދުން ހުށަހެޅި 150 މިލިއަން ޕައުންޑުގެ ބިޑު ޤަބޫލުނުކުރުމަށް ލިވަޕޫލުން ނިންމިއެވެ. 

ވޯލްޑް ފުޓުބޯލް ސަމިޓްގައި ކްލަބުތަކުގެ ފަރާތުން ވާހަކަ ދެއްކި ބައެއް ފަރާތްތަކުން ސަލާހް ސައުދީ ލީގަށް ފިޓް ނުވާނެކަމަށް ބުނެފައިވެއެވެ. އަދި ބައެއް ފަރާތްތަކުން ބުނީ، ސަލާޙްއަށް ވުރެ ބޮޑަށް ރެއާލް މެޑްރިޑްގެ ވިނީސިއަސް ޖޫނިއަރއަށް ޝައުގުވެރިކަން ހުރި ކަމަށެވެ. 

ސަލާޙް ހޮނިހިރު ދުވަހު ދިން އިންޓަވިއުއާ ގުޅިގެން އޭނާ ވަނީ ލިވަޕޫލް އެންމެ ފަހުން ކުޅުނު ޗެމްޕިއަންސް ލީގުގެ ސްކޮޑުން ވެސް ބާކީކޮށްފައެވެ. 

ރިޕޯޓުތައް ބުނާ ގޮތުން، ސަލާޙް ސްކޮޑުން ބާކީކުރަން ނިންމި ނިންމުމަކީ، ކޯޗު ބޭނުން ވެގެން ކްލަބުން ނިންމި ނިންމުމެކެވެ. އެގޮތުން ސަލާޙް ޢަމަލުކުރި ގޮތުން މިވަގުތަށް އެންމެ ރަނގަޅީ ޓީމާ ދުރުގައި ކުޑަ ދުވަސްކޮޅަކަށް މަޑުކޮށްލުންކަމަށް ވަނީ ހާމަކޮށްފައެވެ.

މި މައްސަލަ ފެންމަތިވިއިރު، މިއަންނަ ހޯމަ ދުވަހު އެޕްރިކަން ކަޕް އޮފް ނޭޝަންސްގައި ވާދަކުރާ އިޖިޕްޓުގެ ޤައުމީ ޓީމާ ގުޅުމަށް ސަލާޙް ދާނެއެވެ. އަދި އޭގެ ކުރިން އެންފީލްޑްގައި ޕްރިމިއަރ ލީގު މެޗެއް ހޮނިހިރު ދުވަހަށް ވެސް އޮތީ ތާވަލުކޮށްފައެވެ. 

އެ މެޗުގައި ބްރައިޓަން އެންޑް ހޯވްސްއާ ދެކޮޅަށް ލިވަޕޫލް ނިކުންނައިރު، މެޗު ބަލަން އައުމަށް ސަލާޙްގެ މަންމަ އާއި ބައްޕައަށް ދައުވަތު ދީފައިވާނޭ ކަމަށާއި، އެއީ އެ މެޗަށް ފަހުން ވާނެ ގޮތެއް ނޭންގޭތީ ކަމަށް ވެސް ސަލާޙް ވަނީ ބުނެފައެވެ.  އަދި ބްރައިޓަން މެޗަކީ އެފްރިކަން ކަޕް އޮފް ނޭޝަންސްއަށް ދިއުމުގެ ކުރިން ލިވަޕޫލް ކުޅޭ ފަހު މެޗު ކަމުން، އެ މެޗުގައި ލިވަޕޫލްގެ ސަޕޯޓަރުންނަށް އަލްވަދާއު ކިޔަން ބޭނުންކަމަށް ވެސް، ހޮނިހިރު ދުވަހު ދިން އިންޓަވިއުގައި ސަލާޙް ބުންޏެވެ.

2017ވަނަ އަހަރު ލިވަޕޫލްއާ ގުޅުނު ފަހުން ސަލާޙްއަކީ ލީގުގައި އެންމެ ވިދުން ގަދަ އެއް ތަރިއެވެ. އޭނާ އިނގިރޭސި ލީގުގައި މިހާތަނަށް 190 ގޯލު ކާމިޔާބުކޮށްފައިވާއިރު، ލީގުގެ ތާރީޙުގައި އެންމެ ގިނައިން ގޯލު ޖަހާފައިވާ ކުޅުންތެރިންގެ ލިސްޓުގައި އޭނާ އޮތީ ހަތަރު ވަނައިގައެވެ.