އެފްއޭއެމް ވިމެންސް ލީގު: މާޒިޔާއިން ޓީސީ ބަލިކޮށް އޮޑި ސްޕޯޓްސްއާ ޕޮއިންޓުގެ ގޮތުން ހަމަކޮށްފި

އެފްއޭއެމް ވިމެންސް ލީގުގައި މާޒިޔާ ސްޕޯޓްސް އެންޑް ރެކްރިއޭޝަނުން، ބޮޑު ތަފާތަކުން ޓީސީ ސްޕޯޓްސް ކްލަބް ބަލިކޮށް، ލީގުގެ އެއްވަނައިގައި އޮތް އޮޑި ސްޕޯޓްސް ކްލަބާ ޕޮއިންޓުގެ ގޮތުން ހަމަހަމަކޮށްފިއެވެ.

ހެންވޭރު ދަނޑުގައި ކުޅުނު މި މެޗު މާޒިޔާއިން ކާމިޔާބުކުރީ 10-0ގެ ބޮޑު ތަފާތަކުންނެވެ.

މި މެޗުގައި މާޒިޔާގެ ނޭޕާލް ކުޅުންތެރިޔާ، ދީޕާ ޝާހީ ވަނީ 5 ގޯލު ކާމިޔާބުކޮށްފައެވެ. ދީޕާގެ އިތުރުން އެ ޓީމަށް ކުޅޭ ނޭޕާލްގެ ދެވަނަ ކުޅުންތެރިޔާ ރޭކާ ޕޯޑެލް ވެސް މޮޅު ކުޅުމެއް ވަނީ ދައްކާފައެވެ. އޭނާ ވަނީ މެޗުގައި ދެ ގޯލު ކާމިޔާބުކޮށްފައެވެ.

އެގޮތުން މަޒިޔާއިން މުޅި މެޗު ޑޮމިނޭޓުކޮށްގެން ކުޅުނުއިރު، އެ ޓީމުން ވަނީ ޓީސީގެ ގޯލަށް ގިނަ ހަމަލާތަކެއް ފޮނުވާލާފައެވެ.

މާޒިޔާއިން މި މެޗުގައި ލީޑު ނެގީ ޓީސީގެ ފާތިމަތު ތާނީ ލަޠީފުގެ އަތުން 6ވަނަ މިނެޓުގައި ބައިކޮޅަށް ވަތް ގޯލަކުންނެވެ. 

އަދި މާޒިޔާއިން ވަނީ އައިޝަތު ސަމާގެ ގޯލަކުންނާއި ދީޕާ ޝާހީ މެޗުގައި ކާމިޔާބުކުރި ފުރަތަމަ ގޯލާއެކު، ހާފު ނިމުމުގެ ކުރިން 3 ގޯލުގެ ލީޑެއް ނަގާފައެވެ.

ދެވަނަ ހާފުގައި ޓީސީ ގޮތް ހުސްވެގެން ދިޔަފަދަ ވަގުތުކޮޅެއް ވެސް އައެވެ. އެގޮތުން މެޗުގެ 40ވަނަ މިނެޓާއި 46ވަނަ މިނެޓާއި ދެމެދު މާޒިޔާއިން 4 ގޯލު ކާމިޔާބުކުރިއެވެ. 

މި މެޗުގައި ފާތިމަތު އިނާޔާ ވެސް ވަނީ މާޒިޔާއަށް ގޯލެއް ކާމިޔާބުކޮށްދީފައެވެ.

މި މެޗުން ލިބުނު 3 ޕޮއިންޓާއެކު ޖުމްލަ 7 ޕޮއިންޓު ހޯދައި މާޒިޔާ ވަނީ އޮޑި ސްޕޯޓްސްއާ ޕޮއިންޓުގެ ގޮތުން ހަމަހަމަކޮށްފައެވެ. ނަމަވެސް އޮޑި ކުރީގައި އޮތީ ގޯލުގެ ތަފާތުންނެވެ.

މި މުބާރާތުގެ މެޗެއް މާދަމާ ވެސް ކުޅޭނެއެވެ. އެ މެޗުގައި ބައްދަލު ކުރާނީ ނިއު ރޭޑިއަންޓް ސްޕޯޓްސް ކްލަބާއި ވިކްޓަރީ ސްޕޯޓްސް ކްލަބެވެ. ހެންވޭރު ދަނޑުގައި ކުޅުމަށް ތާވަލުކޮށްފައިވާ މި މެޗު ފަށާނީ ހަވީރު 4:00ގައެވެ.