މުހިންމު ތިން ނިންމުމަކަށް ރައްޔިތުންގެ ވޯޓަކަށް ދަނީ

ޤާނޫނީ ގޮތުން ނިންމަވަންޖެހޭ މުހިންމު ތިން ނިންމެވުމަކަށް ރައްޔިތުންގެ ފެންނަ ނުފެން ވޯޓަކަށް ދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ވެރިކަން ބަދަލުވާ ދުވަސް ނޮވެމްބަރު 17ގެ ބަދަލު ޖުމްހޫރީ ދުވަހަށް ބަދަލުކުރުން

ރައްޔިތުންގެ ވޯޓަކާއެކު ބަދަލުކުރުމަށް ވިސްނުންފުޅުގައި ހުރި ތިން ކަމެއްގެ ތެރެއިން ރައީސުލް ޖުމްހޫރިއްޔާ ފާހަގަ ކުރެއްވި އެއްކަމަކީ، ވެރިކަމުގެ ދައުރު ބަދަލުވާ ދުވަސް ނޮވެމްބަރު މަހުގެ 11 ވަނަ ދުވަހަށް ނުވަތަ ޖުމްހޫރީ ދުވަހަށް ބަދަލުކުރެއްވުމެވެ. 2013 ވަނަ އަހަރުގައި ރިޔާސީ އިންތިޚާބުގެ ދެބުރުގެ ވޯޓު ނެގުމަށްފަހު ރިޔާސީ ދައުރު ބަދަލުވީ އެއަހަރުގެ ނޮވެމްބަރު މަހުގެ 17 ވަނަ ދުވަހުއެވެ. ވުމާއެކު އޭގެފަހުން ރިޔާސީ ދައުރުބަދަލުވާ ދުވަހަކީ ނޮވެމްބަރު 17އެވެ. ރައީސް ވިދާޅުވީ ޖުމްހޫރީ ދުވަހަކީ ނޮވެމްބަރު 11 ކަމަށާއި އެއީ އަމިއްލަފުޅަށް ނިންމާލެވޭ ވަރުގެ ކަމެއް ނޫންކަމަށެވެ. އަދި އެއީ ރައްޔިތުންގެ މަޖިލީހުގެ އިއްޒަތްތެރި މެމްބަރުންނަށް ވެސް ނުނިންމޭނެ ކަމެއް ކަމަށާއި ރައްޔިތުންގެ ގާތުން މިކަމުގެ މަޝްވަރާ ހޯއްދަވާނެ ކަމަށްވެސް އެމަނިކުފާނު ވިދާޅުވިއެވެ. 

ރިޔާސީ އިންތިޚާބު އަދި މަޖިލިސް އިންތިޚާބު އެއްކޮށް ބޭއްވުން

ރައްޔިތުންގެ ވޯޓަކުން ނިންމަން ރައީސް މުޢިއްޒު  ބޭނުންފުޅުވާ ދެވަނަ ކަމެއްގެ ގޮތުގައި ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލިހުގެ އިންތިޚާބު އެއްކޮށް ބޭއްވުމެވެ. ރައީސް ވިދާޅުވީ ދެ އިންތިޚާބުގެ ދެމެދުގައި މިހާރު އޮންނަނީ ދެތިން މަސް ކަމުގައްޔާއި ރައްޔިތުންނަށް އެކަން އެގޮތަށް ކުރިއަށް ގެންދަން ފެންނަނަމަ ދެން އޮންނަ ރިޔާސީ އިންތިޚާބާއި މަޖިލީސް އިންތިހާބު އޮންނާނީ އެކުއެކީކަމަށެވެ. އެހެންކަމުން ރައްޔިތުންގެ ވޯޓަކަށް އަހާނެކަމަށް ރައީސް ވިދާޅުވިއެވެ.

ރިޔާސީ އިންތިޚާބުގެ ދެވަނަ ބުރަކަށް ނުދިއުން

ރައްޔިތުންގެ ވޯޓަކުން ނިންމުމަށް ބޭނުންފުޅުވާ ތިންވަނަ ކަމެއްގެ ގޮތުގައި ރައީސް ފާހަގަކުރެއްވީ ރިޔާސީ އިންތިޚާބުގައި ދެވަނަ ބުރަށް ނުގޮސް ފުރަތަމަ ބުރުގައި ބޭފުޅަކު ކަނޑައެޅުމެވެ. ރައީސް ވިދާޅުވީ މި ޤައުމަށް އެންމެ ރަނގަޅު ގޮތް ކަމަށް ވަންޏާ ރައްޔިތުންގެ މަޖިލިސް މެދުވެރިކޮށް، ދެން އަންނަ ރިޔާސީ އިންތިޚާބުން ފެށިގެން ދެ ބުރު ނޯންނަ ގޮތަށް، އެއްބުރުން މީހަކު ހޮވައި ނިންމޭ ގޮތަށް ކަންކަން ބަދަލުކުރައްވާނެ ކަމަށެވެ. 

ރައީސުލްޖުމްހޫރިއްޔާ ޑރ. މުޢިއްޒުގެ ނިންމެވުންތަކަކީ ޤައުމަށްޓަކައި އިޚްލާޞްތެރިކަމާ އެކުގައި ނިންމެވުންތަކެވެ.  ރައީސް މަސައްކަތްޕުޅު ކުރައްވާނީ ރައްޔިތުންނާއިއެކު ރައްޔިތުންގެ ފަޅީގައި ހުންނަވައިިގެންކަން ތަކުރާރުކޮށް ވިދާޅުވަމުން ގެންދަވައެވެ.