ބައްޕާފުޅުގެ އަގުހުރި ބަސްކޮޅަކާއެކު ޖުމްހޫރީ ދުވަހުގެ ތަހުނިޔާ ރައީސުލްޖުމްހޫރިއްޔާ ފޮނުއްވައިފި

ބައްޕާފުޅު ފަޟީލަތުއްޝައިޚު އަލްއުސްތާޛު ޙުސައިން ޢަބްދުއްރަޙްމާންގެ އަގުހުރި ބަސްފުޅަކާއެކު ޖުމްހޫރީ ދުވަހުގެ ތަހުނިޔާ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ފޮނުއްވައިފިއެވެ. 

މަރްޙޫމް ޙުސައިން ޢަބްދުއްރަޙްމާންގެ ބަސްކޮޅާއެކު ފޮނުއްވި ތަހުނިޔާ މެސެޖުގައި ރައީސް ވިދާޅުވީ ޖުމްހޫރީ ދުވަހުގެ ތަހުނިޔާ ދިވެހި އެންމެހާ ލޮވުބެތި ރައްޔިތުންނަށް އަރިސްކުރައްވާ ކަމުގައެވެ. މި ޕޯސްޓުގައި އެމަނިކުފާނު ގެންނަވާފައިވާ ބައްޕާފުޅުގެ ބަސްކޮޅުގައި ވަނީ ހެޔޮ ގޮތުގައި ކުރެވޭ ވެރިކަމަކީ، ރައްޔިތުންގެ މަޞްލަޙަތުތައް ރަނގަޅަށް ބަލަހައްޓާ، ޤާނޫނީ ގޮތުންނާއި އިންސާނިއްޔަތުގެ ގޮތުން ފުރިހަމަ ޒިންމާ އުފުލާ ރައްޔިތުންގެ ހެވާއި ލާބައަށްޓަކައި ތެދުވެރިކަމާއި އަމާނާތްތެރިކަމާއެކު ރައްޔިތުންގެ ފަރާތުން ކުރާ ރައްޔިތުންގެ ވެރިކަމެއް ކަމުގައެވެ.

ޖުމްހޫރީ ދުވަހުގެ ތަހުނިޔާ ދިވެހި އެންމެހާ ލޮވުބެތި ރައްޔިތުންނަށް އަރިސްކުރަން! pic.twitter.com/OfJasneRSX

— Dr Mohamed Muizzu (@MMuizzu) November 11, 2024

ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސްވަނީ ބައްޕާފުޅުގެ ހަނދާން އައުކުރައްވާ، އެމަނިކުފާނު ވެރިކަން ކުރައްވަމުން ގެންދަވަނީ، ބައްޕާފުޅު ޝައިހް ހުސެއިން އަބްދުއްރަހްމާން ލިއުއްވާފައިވާ ފޮތުގައި ދެއްކެވި މަގު, އަދުލާއި އިންސާފާއި ހަމަހަމަކަމާ އެކު ރައްޔިތުން އިސްކުރައްވައި، ރައްޔިތުންގެ ފަޅީގައި ހުންނަވައިގެން ކަމަށް ވިދާޅުވެފައެވެ.

ބައްޕާފުޅު ޝައިހް ހުސެއިން އަބްދުއްރަހްމާން ލިއުއްވާފައިވާ ފޮތް ދައްކާލައްވަމުން ރައީސް ވިދާޅުވީ އެމަނިކުފާނުގެ ގައިޑަކީ އެ ފޮތް ކަމުގައެވެ. މިއަދާ ހަމައަށް ވެސް ބައްލަވަމުން ގެންދެވީ މި ފޮތް ކަމަށާއި އެއީ އެފޮތުގައި ކީރިތި ގުރުއާނުގެ އަލީގައި ކީރިތި ރަސޫލާގެ ސުންނަތުގެ އަލީގައި އިސްލާމީ ތާރީހުގެ އަލީގައި އަދި ރާއްޖޭގެ ގާނޫނުއަސާސީ އާއި ގާނޫނުތަކަށް ރިއާޔަތްކޮށް، ރާއްޖޭގެ ކޮންޓެކްސްޓުގައި ވަށާ ޖެހޭ ގޮތަށް ބައްލަވާލައްވާފައިވާތީ ކަމުގައެެވެ.

ރައީސްގެ ބައްޕާފުޅު، ފަޟީލަތުއްޝައިޚު އަލްއުސްތާޛު ޙުސައިން ޢަބްދުއްރަޙްމާން އަކީ އޮކްޓޫބަރު 5، 1980 ގައި ދިވެހި ރާއްޖޭގެ ހައިކޯޓު އުފައްދަވައި، އެ ކޯޓަށް ފުރަތަމަ ޢައްޔަނު ކުރެއްވި ފަނޑިޔާރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އެމަނިކުފާނު ޝަރީޢަތާ ޤާނޫނުގެ ރޮނގުން މަތީ ތަޢުލީމު ޙާޞިލްކުރައްވާފައިވަނީ މިސްރުގެ އަލްއަޒްހަރު ޔުނިވަރސިޓީންނެވެ. ކޯޓުގެ ފަނޑިޔާރުކަން ކުރެއްވުމުގެ އިތުރުން، ފަޟީލަތުއްޝައިޚް އަލްއުސްތާޒު އަލްމަރުޙޫމް ޙުސައިން ޢަބްދުއްރަޙްމާން ވަނީ، ބަންޑާރަނާއިބުގެ އޮފީސް ހިންގަވާ އިސް ބޭފުޅެއްގެ ގޮތުގައި، އެޓާނީ ޖެނެރަލްގެ ނާއިބުކަމުގެ މަޤާމު ވެސް އަދާކުރައްވައިފަ އެވެ. އަދި މިނިސްޓްރީ އޮފް އެޑިޔުކޭޝަންގައި އިސްލާމީ ތަޢުލީމުގެ ކަންކަން ބަލަހައްޓަވާ އެންމެ އިސް މަސްއޫލުވެރިއެއްގެ މަޤާމުގައި ވެސް ޚިދުމަތްކުރައްވައިފަ އެވެ.