ނޭކުރެންދޫ ސްކޫލަށް އިތުރުކުރި އައު ކްލާސްރޫމްތައް ބޭނުންކުރަން ފަށައިފި

ހދ. ނޭކުރެންދޫ ސްކޫލަށް އިތުރުކުރި އައު ކްލާސްރޫމްތައް ބޭނުންކުރަން ފަށައިފިއެވެ.

މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހދ. ނޭކުރެންދޫއަށް މިދިޔަ އަހަރުގެ އޯގަސްޓު 26ވަނަ ދުވަހު ކުރެއްވި ދަތުރުފުޅުގެ ތެރެއިން، އެ ރަށު ސްކޫލްގެ ކްލާސްރޫމްތަކުގެ އިމާރާތުގެ މަސައްކަތް ހުއްޓިފައިވާތީ އެކަމުގެ ކަންބޮޑުވުން ޚިއްޞާ ކުރެވިގެންދިޔަ މަޝްރޫޢެކެވެ. 

އެ ދަތުރުފުޅުގައި ރައީސުލްޖުމްހޫރިއްޔާ ވިދާޅުވީ، އެ ރަށުގެ ތަރައްޤީއަށްޓަކައި ފެށިފައިވާ މަޝްރޫޢުތައް ބާރުމިނުގައި ގެންގޮސް އަވަހަށް ނިންމައިދޭނެ ކަމަށެވެ.

ނޭކުރެންދޫ ސްކޫލުގެ މަޝްރޫޢުގެ މަސައްކަތް ނުނިމި ގިނަ ދުވަސްތަކެއް ވެފައިވާކަން ފާހަގަކުރައްވާ ރައީސް ވިދާޅުވީ، 2025 ވަނަ އަހަރު ނިމުމުގެ ކުރިން އެ މަޝްރޫޢުގެ މަސައްކަތް އެއްކޮށް ނިންމާލާނެކަމަށެވެ. 

އައު ދިރާސީ އަހަރު ފެށެންވާއިރަށް އެ އިމާރާތުގެ ބޭނުން މި ރަށު ސްކޫލް ކުދިންނަށް ބޭނުންކުރެވޭ ގޮތަށް އަޅުގަނޑުމެން އިރާދަކުރެއްވިއްޔާ ނިންމާދޭނަން.

ނޭކުރެންދޫއަށް ވަޑައިގެން އެ ރަށުގެ ރައްޔިތުންނާ މުޙާތަބުކުރައްވައި ރައީސުލްޖުމްހޫރިއްޔާ ވިދާޅުވިއެވެ.

އެހެންކަމުން، އެ މަނިކުފާނު ވިދާޅުވި ގޮތަށް، އެ މަސައްކަތް ނިންމައި، އައު ދިރާސީ އަހަރާއެކު އެ ކްލާސްރޫމްތައް ވަނީ ބޭނުންކުރަން ފަށާފައެވެ.

_{ނޭކުރެންދޫ ސްކޫލްގައި އިމާރާތްކުރެވުނު ކްލާސްރޫމްތައް ބޭނުންކުރަނީ / ފޮޓޯ: މުޙައްމަދު ޒާހިރު އަންދުއްސައްތާރު}

މި މަސައްކަތުގެ އިތުރުން، ނޭކުރެންދޫ ސްކޫލްގައި މަލްޓިޕާޕަސްހޯލެއް ޤާއިމުކުރުމަށް މި އަހަރުގެ ބަޖެޓުގައި ހިމަނައިގެން، އެންމެ ލަސްވެގެން މި އަހަރުގެ ކުރީކޮޅު މަލްޓިޕާޕަސްހޯލްގެ އަމަލީ މަސައްކަތް ފައްޓަވާނެކަމަށް އެ މަނިކުފާނު ވިދާޅުވިއެވެ. 

ސްކޫލް ކްލާސްރޫމްތަކާއި މަލްޓި ޕާޕަސް ހޯލްގެ އިތުރުން، ރައީސުލްޖުމްހޫރިއްޔާގެ އެ ދަތުރުފުޅުގައި ވަނީ އެ ރަށުގައި ބައެއް މަޝްރޫޢުތައް ފައްޓަވައިދެއްވައި، އަދި ބައެއް މަޝްރޫޢުތައް ކޮންޓްރެކްޓަރުންނާ ހަވާލުކުރައްވާފައެވެ. 

އެގޮތުން ނޭކުރެންދޭ ބަނދަރުގެ މަޝްރޫޢާއި އެ ރަށުގައި ދޯނި އެހެލާ ސަރަހައްދެއް ޤާއިމްކުރުމާއި، މޫދަށް އެރޭނެ ބީޗެއް ޤާއިމްކުރުމުގެ މަސައްކަތް ކުރިޔަށް ގެންދިއުމަށް ވަނީ ހަމަޖެހިފައެވެ.

އަދި މި އަހަރުގެ ބަޖެޓުގައި ހިމަނައިގެން ނޭކުރެންދޫއަށް ދިމާވެފައިވާ ރަށްގިރުމުގެ މައްސަލައަށް ހައްލެއް ގެނެސްދިނުމުގެ މަޝްރޫޢެއް ފައްޓަވާނެކަމަށްވެސް ރައީސް ވިދާޅުވިއެވެ.