އިޓަލީގައި 2023 ހިނގި ހިތާމަވެރި ހާދިސާއާ ގުޅިގެން ފުލުހުންނާއި ކޯސްޓްގާޑުގެ ޝަރީއަތް ފަށައިފި

2023 ވަނަ އަހަރު އިޓަލީގެ އައްސޭރިފަށަށް ހިޖުރަވެރިން ގޮވައިގެން ދަތުރުކުރި ބޯޓެއް ބަންޑުންޖަހާލައި، މަދުވެގެން 94 މީހުން މަރުވި ހާދިސާއާ ގުޅިގެން އިޓަލީގެ ހަތަރު ފުލުހަކާއި ކޯސްޓްގާޑުގެ ދެ އޮފިސަރެއްގެ މައްޗަށް ކުރާ ޝަރީއަތް އިޓަލީގެ ދެކުނު ބަނދަރުމަތީ ރަށެއް ކަމަށްވާ ކްރޯޓޯންގައި ހުކުރު ދުވަހު ފަށައިފިއެވެ.

މި މައްސަލައިގައި ދައުވާ ލިބޭ ފަރާތްތަކުގެ މައްޗަށް އުފުލާފައިވަނީ ފަރުވާކުޑަކުރުމުގެ ސަބަބުން މީހަކު މަރުވުމުގެ ކުށުގެ ދައުވާ އާއި އިހުމާލުން އުޅަނދެއް ފެތުމުގެ ކުށުގެ ދައުވާއެވެ. އިންސާނީ ހައްގުތަކަށް މަސައްކަތްކުރާ ފަރާތްތަކުން ބުނާ ގޮތުގައި، މިއީ ހަމައެކަނި ވަކިވަކި އޮފިސަރުންގެ މައްޗަށް ކުރެވޭ ޝަރީއަތެއް ނޫން ކަމަށާއި، މިއީ އިޓަލީގެ ކަނާތު ފިޔަހުގެ ސަރުކާރުން ހިޖުރަވެރިންނާ މެދު ގެންގުޅޭ ސިޔާސަތުތަކުގެ މައްޗަށް ވެސް ކުރެވޭ ޝަރީއަތެކެވެ.

ޕްރޮސެކިއުޓަރުން ތުހުމަތުކުރާ ގޮތުގައި ފުލުހުން ވަނީ ކޯސްޓްގާޑަށް ދޭންޖެހޭ މުހިންމު މައުލޫމާތުތައް ހިއްސާކުރުމުގައި ފޭލްވެފައެވެ. އަދި 2023 ފެބްރުއަރީ 26 ވަނަ ދުވަހު ނުރައްކާތެރި ކަނޑެއްގައި އެ ބޯޓު ދަތުރުކުރަމުން ދިޔައިރު، ހާލަތުގެ ނުރައްކާތެރިކަން ދެނެގަތުމަށް ބޭނުންވާ ތަފްސީލުތައް އެއްކުރުމުގައި ކޯސްޓްގާޑުން އިހުމާލުވެފައިވާ ކަމަށް ވެސް ޕްރޮސެކިއުޓަރުން ބުނެއެވެ.

"ސަމަރ ލަވް" ނަމަކަށް ކިޔާ މި ބޯޓު އިޓަލީގެ ކޫޓްރޯ ސަރަހައްދުގެ ހިލަތަކުގައި ޖެހި އެކްސިޑެންޓްވިއިރު، މަރުވި މީހުންގެ ތެރޭގައި 35 ކުޑަކުދިން ހިމެނެއެވެ. ތުރުކީން ފުރައިގެން އަފްޣާނިސްތާން، އީރާން، ޕާކިސްތާން އަދި ސީރިއާގެ ރައްޔިތުން ގޮވައިގެން ދަތުރުކުރި މި ބޯޓުން ދަތުރުކުރި އިތުރު ބައެއް މީހުން ގެއްލިފައިވާ ކަމަށް ލަފާކުރެވޭއިރު، އެމީހުންގެ ހަށިގަނޑުތައް އަދިވެސް ފެނިފައެއް ނުވެއެވެ.

އެމްނެސްޓީ އިޓަލީގެ ކެމްޕޭން ސްޕެޝަލިސްޓް ސެރީނާ ޗިއޯޑޯ ވިދާޅުވީ، "ކޫޓްރޯގައި މަރުވި މީހުންނަކީ ކަމާބެހޭ ފަރާތްތަކުން އެމީހުންގެ ޒިންމާ އަދާކުރި ނަމަ މިއަދު ދުނިޔޭގައި ތިބޭނެ ބައެއް" ކަމަށެވެ. އަދި މި ޝަރީއަތަކީ އިޓަލީގެ އިދާރާތަކުން ހެދި ނުރައްކާތެރި ގޯސްތަކާއި ނިޒާމީ ފޭލްވުންތަކަށް އަލިކަމެއް ލިބިގެންދާނެ ފުރުސަތެއް ކަމަށް އޭނާ ފާހަގަކުރެއްވިއެވެ.

ބައިނަލްއަގުވާމީ ހިޖުރަވެރިންނާ ބެހޭ ޖަމްއިއްޔާ (އައި.އޯ.އެމް) އިން ހާމަކޮށްފައިވާ ގޮތުގައި، މެދުތެރޭ މެޑިޓެރޭނިއަން ކަނޑަކީ ދުނިޔޭގައި ހިޖުރަވެރިންނަށް އޮތް އެންމެ ނުރައްކާތެރި މަގަށް ވާއިރު، 2025 ވަނަ އަހަރުގެ މިހާތަނަށް އެކަނިވެސް މަދުވެގެން 1،340 މީހުން ވަނީ މި މަގުން ދަތުރުކުރަނިކޮށް މަރުވެފައެވެ.