ނިކަމެތި ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ކުރިއަށް އޮތް ތަނުގައި ފެންނާނެ- ރައީސް

ނިކަމެތި ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ކުރިއަށް އޮތް ތަނުގައި އިތުރަށް ފެންނަމުންދާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.  

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފު ވާތަން ކުރިޔަށް އޮތް ތަނުގައި އިތުރަށް ފެންނާނެކަމަށެވެ. އަދި މި ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި ކަމަށްވެސް ރައިސްގެ ޕޯސްޓުގައި ވިދާޅުވެފައި ވެއެވެ. 

ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފު ވާތަން ކުރިޔަށް އޮތް ތާނގައި އިތުރަށް ފެންނާނެ! މި ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި!

— Dr Mohamed Muizzu (@MMuizzu) November 14, 2024

ސަރުކާރުން މަސައްކަތް ކުރައްވަމުން ގެންދާނީ ރައްޔިތުންގެ ޚިޔާލާ މަޝްވަރާގެ ދަށުން ކަމަށާއި ސަރުކާރު އަބަދުވެސް އޮންނާނީ ރައްޔިތުންގެ ފަޅީގައި ކަމުގައި ވިދާޅުވާ ވާހަކަ އަކީ ރައީސް ޑރ.މުޢިއްޒު ތަކުރާރުކޮށް ވިދާޅުވަމުން ގެންދަވާ ވާހަކައެކެވެ. ރައީސް މިފަދައިން ވިދާޅުވަމުން ގެންދަވާއިރު ވަކި ފަރުދުންގެ ލާބައާއި މަންފާއަށް ކަންކަން ނިންމުމެގެ ބަދަލުގައި ހުރިހާ ރައްޔިތުންނާއި ޤައުމަށްޓަކައި ގިނަ ނިންމުންތަކެއް ދަނީ ނިންމަމުންނެވެ. މިފަދަ ނިންމުންތަކަކީ ފައިސާވެރި މަހުޖަނުންނަށް ގެއްލުންވީ ނަމަވެސް އާންމު ފަރުދުންގެ ހެވާއި ލާބައަށް ނިންމަމުންދާ ނިންމުންތަކެއްކަން ސާފުކޮށްފެންނަން އެބަހުއްޓެވެ.

އިދިކޮޅު ފަރާތްތަކުންވެސް ހުއްޓުުމެއްނެތި ފާޑު ކިޔާ، ނަފުރަތު އުފެދޭފަދަ ގޮތްގޮތަށް ވާހަކަ ދައްކަމުންދާކަމީވެސް ފެންނަން އޮތް ޙަޤީގަތެކެވެ. ޤައުމުގެ އިޤްތިޞާދީ ޙާލަތު ރަނގަޅުކުރުމަށް ރައީސް ދަނީ ގިނަގުނަ ފިޔަވަޅުތަކެއް އަޅުއްވަމުންނެވެ. އެގޮތުން ބޭރުފައިސާއިން އާމްދަނީ ލިބޭ ހުރިހާ ވިޔަފާރީތަކެއް އެމްއެމްއޭގައި ރަޖިސްޓްރީވާންޖެހޭ ގަވާއިދަކީ ފާހަގަ ކޮށްލެވޭ ކަމެކެވެ. މިކަމަށް ގިނަ ފަރާތްތަކުން އިޖާބަދީފައިވީ ނަމަވެސް ނަން މަޝްހޫރު ވިޔަފާރި ކުންފުނިތަކުން މިކަމަށް ގޮންޖަހާ، ދެކޮޅުހަދާފައިވާކަން ފާހަގަކޮށްލެވެއެވެ.