އިޒްރޭލަށް ހަތިޔާރު އުފުލާ އުޅަނދުތަކާ ދެކޮޅަށް އިޓަލީގެ ބަނދަރުގައި މަސައްކަތްކުރާ މުވައްޒަފުން އިހުތިޖާޖުކޮށް މަސައްކަތް ހުއްޓާލައިފި

އިޓަލީގެ ބަނދަރުތަކުގައި މަސައްކަތްކުރާ މުވައްޒަފުން، އިޒްރޭލަށް ހަތިޔާރު އުފުލާ އުޅަނދުތަކާ ދެކޮޅަށް އަޑުއުފުލުމަށާއި މަސައްކަތުގެ ހައްގުތައް ހޯދުމަށް ގޮވާލައި މުޅި ގައުމުގައި 24 ގަޑިއިރުގެ ހަޅުތާލެއް ފަށައިފިއެވެ.

ޔޫއެސްބީ ލަވޯރޯ ޕްރިވާޓޯ (USB Lavoro Privato) އިސްނަގައިގެން ފެށި މި ހަޅުތާލުގެ ސަބަބުން ޖެނޯއާ، ޓްރިއެސްޓޭ، ލިވޯނޯ، ނޭޕަލްސް އަދި ޕަލާމޯ ފަދަ ބޮޑެތި ބަނދަރުތަކުގެ މަސައްކަތްތަކަށް ވަނީ ބޮޑެތި ބުރޫތަކެއް އަރާފައެވެ.

މި ހަޅުތާލަކީ ބަނދަރުތަކުގެ މުވައްޒަފުންގެ ކަލެކްޓިވް އެގްރީމެންޓާ ގުޅޭގޮތުން ކުރެވެމުންދާ މަޝްވަރާތައް ހުއްޓުމަކަށް އައުމާ ގުޅިގެންނާއި، ބަނދަރުތަކުން ކުރާ މަސައްކަތްތަކުގައި ދެފުށް ފެންނަ ސިޔާސަތެއް ގާއިމުކުރުމަށް ގޮވާލައި ކުރިއަށްގެންދާ ހަރަކާތެކެވެ. އިޓަލީގެ ގާނޫނީ އޮނިގަނޑުގެ ތެރެއިން ކުރިއަށްގެންދާ މި ހަޅުތާލުގެ ތެރެއިންވެސް، ޒަރޫރީ ފެރީގެ ހިދުމަތްތަކާއި ބަނދަރުގެ މުހިންމު ބައެއް އޮޕަރޭޝަންތައް ކުރިއަށްދާނެ ކަމަށް ޔޫނިއަނުން ބުނެފައިވެއެވެ.

މަސައްކަތްތެރިންގެ ހައްގުތަކުގެ އިތުރުން، ގާޒާގައި އިޒްރޭލުން ހިންގަމުންދާ ގަތުލުއާންމާ ގުޅިގެން، އިޒްރޭލަށް ހަތިޔާރު އުފުލާ އުޅަނދުތައް އިޓަލީގެ ބަނދަރުތައް ބޭނުންކުރުމާ ދެކޮޅަށް މުވައްޒަފުން ވަނީ ވަރުގަދައަށް އަޑުއުފުލާފައެވެ. ޔޫނިއަންގެ އޮފިޝަލުން ވިދާޅުވީ ބަނދަރުތަކުން އުފުލާ މުދަލަކީ ކޮބައިކަން ސާފުވާންޖެހޭ ކަމަށާއި، އަސްކަރީ ސާމާނު އުފުލުމުގައި އާންމުންގެ ބައިވެރިވުން އޮންނަ ފާރަވެރިވުމެއް އޮންނަންޖެހޭނެ ކަމަށެވެ.

މި ހަޅުތާލުގެ ސަބަބުން އިޒްރޭލާ ގުޅުންހުރި ބައެއް ބޮޑެތި އުޅަނދުތަކުގެ ދަތުރުތަކަށް ވަނީ ބަދަލުތަކެއް އައިސްފައެވެ. އެގޮތުން ޒިމް (Zim) އަދި އެމްއެސްސީ (MSC) ކުންފުނީގެ ބައެއް އުޅަނދުތަކަށް ބަނދަރަށް ނުވަދެވި ކަނޑުމަތީގައި މަޑުކުރަން ޖެހިފައިވާކަން ވެސެލް ޓްރެކިންގް ޑޭޓާތަކުން ދައްކައެވެ. މީގެ ތެރޭގައި އިޒްރޭލަށް އަސްކަރީ މުދާ އުފުލާ ކަމަށް ތުހުމަތު ކުރެވޭ "ޒިމް ވާޖިނިއާ" ލިވޯނޯ ބަނދަރަށް ނުވަދެވި ބޭރުގައި މަޑުކުރަން ޖެހުނުކަން ފާހަގަކުރެވެއެވެ.

މީގެ އިތުރުން "ޒިމް ނިއުޒީލަންޑް" ފްރާންސްގެ ބަނދަރެއްގައި މަޑުކޮށްފައިވާއިރު، "ޒިމް އޮސްޓްރޭލިއާ" ވެސް ވަނީ އިޓަލީގެ ބަނދަރުތަކަށް ވަނުމުގެ ބަދަލުގައި ސްލޮވީނިއާ ކައިރީގައި މަޑުކޮށްފައެވެ. އަދި އިޒްރޭލުން ފުރައިގެން އައި "އެމްއެސްސީ އީގަލް III" ވެސް ވަނީ އޭގެ ދަތުރުގެ މިސްރާބު ބަދަލުކޮށްފައެވެ.

ޔޫނިއަން އޮފިޝަލުން ހާމަކުރި ގޮތުގައި، އިޓަލީގެ މި ހަރަކާތަށް ސްޕެއިން، ފްރާންސް، ތުރުކީ، ޖަރުމަނު އަދި އުތުރު އެފްރިކާގެ ބަނދަރުތަކުންވެސް ވަނީ ތާއީދު އޮތްކަން ހާމަކޮށްފައެވެ. މިއީ ބައިނަލްއަގުވާމީ ހަމަނުޖެހުންތަކާއި، ހާއްސަކޮށް އިޒްރޭލުގެ އިސްތިއުމާރީ ސިޔާސަތުތަކާ ގުޅިގެން ބަނދަރުތައް ބޭނުންކުރުމުގައި ގެންގުޅެންޖެހޭ އަހުލާގީ މިންގަނޑުތަކާ މެދު ޔޫރަޕްގައި ކުރެވެމުންދާ ބޮޑު ބަހުސެއްގެ ބައެއް ކަމަށްވެސް އެފަރާތްތަކުން ފާހަގަކުރެއެވެ.