ރައީސް ޑރ. މުޙައްމަދު މުއިއްޒު ވެރިކަމުގައި ސިޔާސީ ހަމަޖެހުން!

ރައީސް ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގަތީ ރާއްޖޭގެ ސިޔާސީ މަޝްރަޙު ވަރަށްބޮޑަށް ހަލަބޮލިވެފައިވާ ދަނޑިވަޅެއްގައެވެ. ސިޔާސީ ގޮތުން ޤައުމުގައި ވެރިކަން ކުރި ރައީސަކު ޖަލަށްލާ، އާންމު ރައްޔިތުން މަގުމައްޗަށް ނުކުމެފައިވާ ދަނޑިވަޅެއްގައެވެ.

ފާހަގަ ކޮށްލެވޭ ކަމަކީ ވެރިކަމަށް ވަޑައިގަތުމަށް ރިޔާސީ އިންތިޚާބުގައި 8 ކެނޑިޑޭޓުން ވާދަކުރެއްވީ ބޮޑެތި ވަޢުދުފުޅުތަކެއް ވެވަޑައިގަންނަމުންނެވެ. އެގޮތުން މިހާރުގެ ރައީސް ޑރ.މުހައްމަދު މުޢިއްޒު އެންމެ ބާރަށް ވިދާޅުވާ އެއް ވާހަކައަކީ ޤައުމުގެ ހަމަޖެހުމާއި ރައްކާތެރިކަން ދަމަހައްޓާނެކަމެވެ. ނުޙައްގުން ޖަލުގައި ތިބި ހައްޔަރީން މިނިވަންކުރާނެ ކަމެވެ. ވާނުވާ ބަންދު އުވާލާ، ވާނުވާ ބަންދުގައި ތިބި ފަރާތްތަކަށް ޙައްޤު ހޯދައިދެއްވާނެކަމެވެ. ކަން ކުރެއްވީވެސް އެފަދައިންނެވެ. ވަޢުދުފުޅާއި އެއްގޮތަށް ވެރިކަމާއި ހަވާލުވީ ފުރަތަމަ ދުވަހު، ކުރީގެ ރައީސް ޢަބްދުއްﷲ ޔާމީން ޖަލުން މިނިވަން ކުރައްވާ ގެއަށް ބަދަލުކޮށްދެއްވިއެވެ. ހަމައެއާއެކު، ސިޔާސީ ބަންދުގައި ތިބި ފަރާތްތަކަށް މަޢާފުދެއްވުމާއި، އެއްވެ އުޅުމުގެ މިނިވަންކަމާއި ސިޔާސީ ޚިޔާލު ފާޅުކުރުމުގެ މިނިވަންކަން ގެނެސްދެއްވިއެވެ.

ރާއްޖޭގައި ކުރީގައި އޮތް ސިޔާސީ ހަމަޖެހުމަށް ބަލާއިރު، ސިޔާސީ ޕާޓީތަކުގެ މެދުގައި އޮތް ވާދަވެރިކަން ހައްދުފަހަނައަޅާ ގޮސް، ގިނަ ފަހަރު މަގުމައްޗަށް ނުކުމެ މުޒާހަރާކުރުމާއި، އަނިޔާވެރި ޢަމަލުތައް ހިންގުން ވަނީ މާލެތެރޭގައި އާންމުވެފައެވެ. މިކަން މިގޮތަށް ތަކުރާރު ވަމުންގޮސް ރާއްޖޭގެ ހިތްގައިމު ކުދިކުދި ރަށްތަކުގައިވެސް ހަމަނުޖެހުންތައް ހިނގަމުންދިޔައެވެ.  ނަމަވެސް ރައީސް މުއިއްޒު ވެރިކަމާ ހަވާލުވެވަޑައިގަތް ފަހުން މި ހާލަތު ވަނީ ވަރަށް ބޮޑަށް ބަދަލުވެފައެވެ.

މި ޤައުމަށް ސިޔާސީ ހަމަޖެހުން ގެނައުމަށްޓަކައި ރައީސް މުއިއްޒު ވެރިކަމާ ހަވާލުވެވަޑައި ގަތުމާއެކު، އެމަނިކުފާނު ވަނީ ގިނަގުނަ މަސައްކަތްތަކެއް ކުރައްވާފައެވެ. މީގެ ތެރޭގައި އެކި ފިކުރު ތަކުގެ ސިޔާސީ ޕާޓީތަކަކާއެކު މަޝްވަރާކުރެއްވުމާއި، އިދިކޮޅު ފަރާތްތަކާއެކު ބައްދަލުވުންތައް ބާއްވާފައިވާ މަންޒަރު ފެނިފައިވެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ސަރުކާރަށް އެއްއަހަރު ފުރުނުއިރު ޚިޔާލުފާޅު ކުރުމުގެ މިނިވަންކަން ފަހިކޮށްދީފައިވެއެވެ. ފާޅުކަން ބޮޑު ގޮތެއްގައި ވަރީރުންނާއި ރައީސް ބައިވެރިވެވަޑައިގެން ނޫސްވެރިންގެ ބައްދަލުވުންތައް ހުއްޓުމެއް ނެތި ކުރިއަށްދެއެެވެ. މިވީހާތަނަށް ނުޙައްޤުން މީހަކު ހައްޔަރުކޮށްފައެއް ނުވެއެވެ. ވާނުވާ ބަންދެއްގައި ނިކަމެތި ރައްޔިތަކު ބަހައްޓާފައެވެ ނުވެއެވެ. ދިވެހިންނަށް ދިވެހީންގެ ރާއްޖެ ގެނެސްދީ، ޤައުމަށް ސިޔާސީ ހަމަޖެހުން ގެނެސްދެއްވިއެވެ.

ރައީސް ޑރ. މުޙައްމަދު މުއިއްޒުގެ އެންމެ ބޮޑު އެއް އަމާޒަކީ ރާއްޖޭގައި ސިޔާސީ ހަމަޖެހުން ޤާއިމުކުރުމެވެ. ޤައުމުގެ ތަރައްޤީއަށް ސިޔާސީ ހަމަޖެހުމަކީ ކޮންމެހެން ބޭނުން ކަމެއް ކަމަށް އެމަނިކުފާނު ދަނީ ތަކުރާރުކޮށް ވިދާޅުވަމުންނެވެ.  ނަތީޖާއެއްގެ ގޮތުން، ރާއްޖޭގެ ސިޔާސީ މަޝްރަޙު މިހާރު ވަނީ ކުރިއާ އަޅާބަލާއިރު ވަރަށް ބޮޑަށް ހަމަޖެހިފައެވެ.

ހިތާމައަކީ ޤައުމުގެ ވެރިއަަކަށް ހުންނެވި ބޭފުޅެއްގެ ވިސްނުން މިފަދައިން ހުރި ނަމަވެސް މަދު ދިވެހި ރައްޔިތަކާއި އިދިކޮޅު ފަރާތްތަކުން ދައްކަމުންދާ ޙަޤީޤަތާ ޚިލާފް ވާހަކަަތަކެެވެ. ވެރިކަމަށް ވާދަކުރައްވަން ނިންމެވި ހިސާބުން ރައީސްއަށް އެކި ގޮތްގޮތުން ނަފުރަތު ލިބެމުންދިޔައެވެ.

އެގޮތުން އިދިކޮޅު ފަރާތްތަކުން ހިންގާ މީޑިއާތަކުންނާއި ތަފާތު ސޯޝަލް މީޑިއާ އެކައުންޓް ތަކުން ބޭއަދަބީ ކޮންޓެންޓް އުފައްދާ، ރައީސްގެ އަބުރު ކަތިލާ، އެމަނިކުފާނަށް ފާޑުކިޔުން އާދައަކަށް ހަދާފައިވެއެވެ. ވެރިކަމާ ހަވާލުވެވަޑައިތުމުންވެސް ޤައުމުގެ ވަލީއުލްއަމްރަށް އެއްވެސް އިޙްތިރާމެއް ނެތްކަން ދޭހަވާފަދަ ލިޔުންތައް ލިޔަމުން ގެންދާ ކަމެވެ.

އިދިކޮޅު ފަރާތްތަކާއި އެފަރާތްތަކުގެ ފާޑުކިޔުން ލިބެމުންދާނެކަމީ އެއްވެސް ޝައްކެއް އޮތްކަމެއް ނޫނެވެ. އެހެން ނަމަވެސް ދޮގާ، މަސްލަޙަތު ގެއްލޭފަދަ ވާހަކަތައް ފެތުރުމަކީ ޤައުމަށް ގެންނަން ރައީސް މަސައްކަތް ކުރައްވާ ސިޔާސީ މިނިވަންކަމަށް ހުރަސްތަކެއް އެޅިދާނެ ކަމެކެވެ. ފާޑު ކިޔުމުގައިވެސް ބިނާ ކުރަނިވި ފާޑު ކިއުމާއި، އަބުރު ކަތިނުލާ ވާހަކަދެއްކުން މުހިންމެވެ. މިކަމުގެ ސަބަބުން ސަރުކާރަށް ޤައުމުގެ ތަރައްޤީއަށް މަސައްކަތްކުރުމަށް ފަހި މާޙައުލެއް ލިބޭނެ ކަމަށް ބެލެވެއެވެ.