ބަންގްލަދޭޝްގެ އައު ބޮޑުވަޒީރާއެކު ބޭއްވުނު ބައްދަލުވުމަކީ ވަރަށް ކާމިޔާބު ބައްދަލުވުމެއް: ރައީސް މުޢިއްޒު

ބަންގްލަދޭޝްގެ އައު ބޮޑުވަޒީރު ތާރިޤް ރަޙްމާން މަޤާމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށްފަހު، އެ މަނިކުފާނާއެކު ބޭއްވެވި ބައްދަލުވުމަކީ ވަރަށް ކާމިޔާބު އަދި ނަތީޖާ ނެރެވޭނެ ބައްދަލުވުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ބަންގްލަދޭޝްގެ ވެރިރަށް ޑާކާގައި މިއަދު ބޭއްވުނު މި ރަސްމިއްޔާތަށްފަހު ރައީސް މުޢިއްޒު ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، ބޮޑުވަޒީރު ތާރިޤް ރަޙްމާން އަދި ބަންގްލަދޭޝް ނޭޝަނަލިސްޓް ޕާޓީ (ބީ.އެން.ޕީ) ގެ އައު ސަރުކާރުން މަޤާމުގެ ހުވާކުރެއްވުމުގެ ތާރީޚީ ރަސްމިއްޔާތު ހެކިވެވަޑައިގަތުމަކީ ލިބިވަޑައިގެންނެވި ބޮޑު އުފަލެއް ކަމަށެވެ.

It has been a pleasure to witness the oath-taking ceremony of Prime Minister HE Tarique Rahman @trahmanbnp and the Government of @bdbnp78 in Dhaka today. I also had a fruitful meeting with Prime Minister Rahman and conveyed my best wishes to him and the new Government. I look… pic.twitter.com/0Dk9rSPX7z

— Dr Mohamed Muizzu (@MMuizzu) February 17, 2026

މި ބައްދަލުވުމުގައި ރައީސުލްޖުމްހޫރިއްޔާ ވަނީ ބޮޑުވަޒީރު ތާރިޤް ރަޙްމާނަށާއި ބަންގްލަދޭޝްގެ އައު ސަރުކާރަށް ހެޔޮއެދުންތައް ފޮނުއްވާފައެވެ. ރައީސްގެ ވާހަކަފުޅުގައި މި ބައްދަލުވުމަކީ ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް މަގުފަހިވެގެންދިޔަ ބައްދަލުވުމެއްކަން ފާހަގަކުރެއްވިއެވެ.

"އަޅުގަނޑު ބޮޑުވަޒީރު ރަޙްމާނާއެކު ބޭއްވި ބައްދަލުވުމަކީ ވަރަށް ކާމިޔާބު ބައްދަލުވުމެއް. އަދި އެ މަނިކުފާނަށާއި އައު ސަރުކާރަށް ހެޔޮއެދުންތައް އަރިސްކުރިން،" ރައީސް މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ ދިވެހިރާއްޖެ އާއި ބަންގްލަދޭޝްއާ ދެމެދު އޮތް ގާތް އަދި ރަޙްމަތްތެރި ގުޅުން ކުރިއަށް އޮތް ތަނުގައި އިތުރަށް ވަރުގަދަވެގެންދާނެ ކަމަށް އުންމީދު ކުރައްވާ ކަމަށެވެ. މި ދަތުރުފުޅަކީ ދެ ޤައުމުގެ ދެމެދުގައި އޮތް ޒަމާންވީ ގުޅުން އައު ހަރުފަތަކަށް ގެންދިއުމަށް އެޅުނު މުހިންމު ފިޔަވަޅެއްގެ ގޮތުގައި ބެލެވެއެވެ.