ޤައުމުގެ މިނިވަންކަން ޙިމާޔަތްކޮށް، އަސްކަރީ ޤާބިލިއްޔަތު ވަރުގަދަ ކުރެއްވުމުގައި އެއް އަހަރު!

"މިއަދާ ހަމައަށް އަޅުގަނޑު ކޮންމެ ދުވަހެއް ހޭދަ މިކުރަނީ ޤައުމުގެ މިނިވަންކަން ޙިިމާޔަތްކުރުމަށްޓަކާ" މިއީ ރާއްޖޭގެ ރައީސުލްޖުމްހޫރިއްޔާ ޤައުމާ މުޚާތަބު ކުރައްވާ ވާހަކަފުޅު ދައްކަވާއިރު ތަކުރާރުކޮށް ވިދާޅުވާ ބަސްކޮޅެކެވެ. މި ބަސްކޮޅު އެންމެ ފަހުން އިވިގެން ދިޔައީ ނަސްރުގެ ދުވަހުގެ މުނާސަބަތުގައި ބޭއްވި ރަސްމީ ޖަލްސާއިން މީގެ ހަފްތާއެއްހާ ދުވަސް ކުރިންނެވެ. 

ޤައުމުގެ މިނިވަންކަން ޙިމާޔަތް ކުރުމަށް އެމަނިކުފާނު އަބަދުވެސް ދަނީ ބޮޑެތި މަސައްކަތްތަކެއް ކުރައްވަމުންނެވެ. މި ޤައުމާމެދު އޮތް ލޯބިި އެމަނިކުފާނު ވިދާޅުވަމުން ގެންދަވާ ބަސްފުޅުތަކުން ވަރަށް ބޮޑަށް ސާފުވެއެވެ. މިއަދު ސަރުކާރަށް އެއް އަހަރު ފުރިގެން ދާއިރު އެއްގަމާއި ކަނޑާއި ވައިގެ މަގުން ރާއްޖެ ދިފާއުކޮށް ރައްކާތެރިކުރުމަށާއި ރާއްޖޭގެ އިޤްތިޞާދީ ސަރަހައްދު އަމިއްލައަށް ބެލެހެއްޓުމަށް ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ފުރަތަމަ ދުވަހުން ފެށިގެން މަސައްކަތް ފަށާފައެވެ. 

ނިމިދިޔަ ފަސްއަހަރުގައި ކަން ހިނގާފައިވާ ގޮތަށް ބަލާއިރު ރާއްޖޭގެ ދިފާއީ ބާރު ވަނީ އަވައްޓެރި ޤައުމެއްގެ އަތްމައްޗަށް ދޫކޮށްލެވިފައެވެ. ޔަޤީންވާ ކަަމަކީ ދިވެހިން ދިވެހި ޤައުމަށް ހެޔޮ އެދޭފަދައިން އެހެން ބަޔަކު ނޭދޭނެކަމެކެވެ. ދިވެހިންގެ ހިތުގައި އޮތް ލޯތްބެއް އެހެން ޤައުމެއްގެ ބަޔަކު ނޯންނާނެކަމެވެ. އެހެން ކަމުން ރާއްޖެއާއި އޮންނަ ގާތް ގުޅުންމެއްގެ ސަބަބުން މިނިވަންކަމާއި އިސްތިޤްލާލު ހިމާޔަތްކުރުންފަދަ ކަންކަން ބަޔަކާއި ހަވާލުނުކޮށް އަމިއްލައަށް ކުރަންޖެހޭ މަސައްކަތްތަކެއްކަމަށް ރައީސް ދެކެވަޑައިގަންނަވައެެވެ. 

ހަމައެއާއެކު މިވަގުތު ޤައުމުގައި ދިފާޢީ ވަޒީރު ވަޒީރު ކަމުގައި ހުންނެވީ ޤައުމަށް އިޚްލާޞްތެރި ޤައުމު އެހެން ބައެއްގެ އަތްމައްޗަށް ދޫކޮށްލަށް ބޭނުންފުޅު ނުވާ ވަޒީރެކެވެ. ދިފާޢީ ވަޒީރު ޣައްސާން މައުމޫންގެ ސިޔާސަތުތަކަށް ބަލާއިރު އެމަނިކުފާނަކީ އެ މަޤާމުގައި ދެމިހުންނެވިހާ ހިނދަކު ރާއްޖޭގެ އިޤްތިޞާދީ ސަރަހައްދު ބެލެހެއްޓުމުގެ މަސައްކަތް ބޭރު ބަަޔަކާއި ހަވާލު ނުކުރުމަށް ޢަޒުމް ކަނޑައަޅުއްވާފައިވާ ބޭފުޅެކެވެ. ރައީސްގެ ވިސްނުންފުޅާ އެއްގޮތަށް އެމަނިކުފާނުވެސް ދެކެވަޑައިގަންނަވަނީ ރާއްޖޭގެ އިޤްތިޞާދީ ސަރަހައްދުގެ ބެލެހެއްޓުމުގެ މަސައްކަތް ކުރަން ޖެހޭނީ ދިވެހި ސިފައިންކަމުގައެވެ. 

ރާއްޖޭގެ އިޤްތިޞާދީ ސަރަހައްދުގެ ބެލެހެއްޓުމުގެ މަސައްކަތް ހަރުދަނާ ކުރުމުގެ ގޮތުން ވެރިކަމުގެ ކުރީކޮޅު ރައީސް ވަނީ  ޤައުމީ ދިފާޢީ ބާރުގައި ފުރަތަމަ ފަހަރަށް ވައިގެ ގޮތްޕެއް އުފައްދަވާ، އެންމެފަހުގެ ޒަމާނީ ޑްރޯންތަކާއެކު ރާއްޖެ 24 ގަޑިއިރު ބެލެހެއްޓޭނެ ޤާބިލުކަން ޤާއިމުކޮށްދެއްވާފައެވެ. ތުރުކީގެ ހިލޭ އެހީގައި ހޯއްދެވި ޑްރޯން ތަކަކީ އެންމެ ފަހުގެ ޒަމާނީ ވަސީލަތްތަކެެވެ.

އެމްއެންޑީއެފް އެއަރ ކޯރގެ ދަށުން އަންމޭންޑު އޭރިއަލް ވެހިކަލް، ޔޫ.އޭ.ވީ އުޅަނދު ނުވަތަ ޑްރޯން އޮޕަރޭޓްކުރަމުންދަނީ ރާއްޖޭގެ އުތުރާއި ދެކުނުގައި ޤާއިމްކޮށްފައިވާ އެމްއެންޑީއެފް އޭރިއާ ކޮމާންޑްތަކުގައެވެ. މި ޔޫއޭވީތަކާއެކު ރާއްޖޭގެ ނުވަލައްކަ އަކަ ކިލޯމީޓަރަށް ވުރެ ބޮޑު ޚާއްސަ އިޤްތިޞާދީ ސަރަހައްދު ދިވެހިންގެ އަމިއްލަ ބާރުވެރިކަމުގައި ފުރަތަމަ ފަހަރަށް ބެލެހެއްޓުމުގެ ޤާބިލީއްޔަތުކަން މިވަނީ ލިބިފައެވެ. 

ދެވަނަ ކަމަކަށް ބަލާއިރު ރާއްޖޭގެ އިޤްތިޞާދީ ސަރަހައްދުގެ ބެލެހެއްޓުން ހަރުދަނާ ކުރުމަށް ދިވެހި ސިފައިންގެ ޚިދުމަތަށް މުޅިން އަލަށް އާންމޭންޑް އޭރިއަލް ވެހިކަލް، ވަނީ ތަޢާރަފުކޮށްފައެވެ. މިއީ 220 ކިލޯމީޓަރުގެ ބާރުމިނުގައި މެދުނުކެނޑި 20 ގަޑިއިރު ދުއްވުމުގެ ޤާބިލްކަން ލިބިފައިވާ، ރޭގަނޑު އަނދިރީގައިވެސް އޮޕަރޭޝަންތައް ހިންގުމުގެ ޤާބިލުކަން ލިބިގެންވާ އުޅަނދެެވެ. 

އަސްކަރީ ގޮތުން ވަރުގަދަ ބޮޑެތި ޤައުމުތަކާ އެއްހަމައެއްގައި ރާއްޖޭގެ އަސްކަރިއްޔާއިން ވާދަ ކުރެވޭނެ ޤާބިލުކަން ނެންނަަމަވެސް 1988ވަަނަ އަހަރު ރާއްޖެއަށް ދިވެހީންގެ ބަޔަކު ޢައްދާރުވެ ދިން ޢުދުވާނީ ހަމަލާއިން ސަލާމަތްވެފައިވަނީ ސިފައިންގެ ކުޅަދާނަކަމުން ކަމުގައި ބުނެވިދާނެއެވެ. އެކަމުން ދޭހަވަނީ ޤައުމަށް ކޮންމެފަދަ ވަގުތެއްގައިވެސް ނުރައްކަލާކުރިމަތިލާން ޖެހިދާނެ ކަމެވެ. ކަނޑުފޭރޭ މީހުންނާއި ނިރުބަވެރި ޖަމާއަތްތައް ރާއްޖެ ހިމެނޭ ސަރަޙައްދުގައިވެސް ހަރަކާތްތެރިވާ ކަމީވެސް ޙަޤީޤަތެވެ. އެކަމަށްޓަކައި ދިވެހި ރާއްޖޭގެ އަސްކަރީ ޤާބިލިއްޔަތުކަން އިތުރުކުރަންޖެހޭ ކަމަށް ޤައުމީ ދިފާޢީ ބާރުން ފާހަގަކުރެއެވެ. 

މި ކަންބޮޑުވުމަށް އިޖާބަދެއްވާ، ރައީސް މުޢިއްޒު ވިދާޅުވީ، ހަތިޔާރު ހޯދައި، އެކިއެކި އާލާތްތައް ހޯދަންޖެހޭ ކަމަށާއި މިހާރުވެސް އެކުވެރި ބައެއް ދައުލަތްތަކާ އެކީގައި ވަނީ މަސައްކަތްތަކެއް ފެށިފައިކަމުގައެވެ. އެއާއެކު ހަތިޔާރާއި އާލާތްތައް ގަތުމަށްޓަކައި މިހާރު ހުށަހެޅިފައި އޮތް ބަޖެޓުގެ ތެރެއިން ވަކި ޢަދަދެއް ކަނޑައަޅާ އެކަމަށް ޙާއްޞަ ކުރެވިފައިވާކަން ރައީސް ފާހަގަ ކުރައްވާފައިވެއެވެ. ހަމައެހެންމެ އަންނަ އަހަރުގެ ތެރޭގައި، ސިފައިންގެ ޚިދުމަތަށް ބޭނުންވާ ހަތިޔާރާއި އާލާތްތަކުގެ ބޮޑު ޢަދަދެއް ހޯދައިދެވޭނެ ކަމުގެ އުފާވެރި ޚަބަރު ރައީސުލްޖުމްހޫރިއްޔާ ވަނީ ދެއްވާފައެވެ.

ޤައުމުގެ ދިފާއީ ބާރު އެހެން ބައެއްގެ އަތްމައްޗަށް ދޫކޮށްލުމަކީ ފޫނުބެއްދޭވަރުގެ ގެއްލުންތައް ޤައުމާއި ރައްޔިތުންނަށް ދިމާވެދާނެ ކަމެކެވެ. މިގޮތް ބަދަލުކުރައްވާ ޤައުމުގެ ދިފާޢީ ބާރު ވަރުގަދަކޮށް އަމިއްލަ މިނިވަންކަން ކަށަވަރު ކުރުމުގެ މަސައްކަތް ރައީސް ޑރ. މުޙައްމަދު މުއިއްޒު ގެންދަވަނީ ކުރައްވަމުންނެވެ.