އައިވީއެފް: އާއިލާ ބިނާކުރުމުގެ ހިތްހަަމަޖެހުން ގެނެސްދެއްވުމަށް ރައީސް ހުޅުވައިދެއްވި ދޮރަށް ޝުކުރު ޙައްޤު

ދަރިމައިވުމުގެ މައްސަަލައަކީ ދިރިއުޅުމުގައި ދިމާވާނެ އެންމެ  ބޮޑު އެއް ގޮންޖެހުމެވެ. ދަރިއަކު ލިބުމަކީ ކޮންމެ ދެމަފިރިއެއްވެސް ކައިވެންޏަށްފަހު ދެކޭނެ ހުވަފެނެކެވެ. ނަމަވެސް މިއުފަލުން މަޙުރޫމްވެފައިވާ ގިނަ އާއިލާތައް ރާއްޖޭންވެސް ފެންނަމުންދެވެ. ކަން މިހެން އޮތްނަމަވެސް، އާއިލާއެއް ބިނާކުރުމަށް އެހީތެރިވެދޭ ތަފާތު ފަރުވާތަކެއް ހުރެ އެވެ. މީގެތެރޭގައި އިން ވިޓްރޯ ފާޓިލައިޒޭޝަން (އައިވީއެފް) އަކީ ފާހަގަ ކޮށްލެވޭ ފަރުވާއެކެވެ. އައިވީއެފްގެ ސަބަބުން ވަރަށް ގިނަ އަދަދެއްގެ ދެމަފިރިންނަށް ދަރިމައިވުމުގެ މައްސަލަތަކުން އަރައިގަނެވި، އާއިލާއެއް ބިނާކުރުމުގެ އުފާވެރިކަން ވަނީ ލިބިފައެވެ.

ރާއްޖޭގައިވެސް އާންމުކޮށް ދިމާވާ މި މައްސަލައަށް އައިވީއެފް ފަރުވާ ނުހޯދި ތިބެންޖެހިފައިވަނީ ފަރުވާގެ އަގު ބޮޑުވުމާއި، ރާއްޖޭގައި މި ފަރުވާ ދޭނެ ފުރިހަމަ ވަސީލަތްތައް ނެތުމުންނެވެ. ރާއްޖޭން ބޭރުން މި ފަރުވާ ހޯދޭނެ ތަނަވަސްކަން ގިނަ އާއިލާތަކަށް ލިބިފައެއް ނުވެއެވެ. އެހެން ނަމަވެސް މި ދަތިތައް ޙައްލުކޮށްދިނުމަށް ސަރުކާރުން މިހާރު މިވަނީ މަސައްކަތް ފަށާފައެވެ.

ރާއްޖޭގައި މިވަގުތު އައިވީއެފް ހަދައިދެނީ ޓްރީޓޮޕް ހޮސްޕިޓަލުގައި އެކަންޏެވެ. ދަރިމައިވުމަށް ބޭނުންވާ އައިވީއެފް ފަރުވާ އާސަންދައިން ހަމަޖައްސަވައިދެއްވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދެކެވެ. މިވަޢުދުގެ ދަށުން މިފަރުވާ ބޭނުންވާ 100 ދެމަފިރިއަކަށް މިއަހަރު އާސަންދަ މެދުވެރިކޮށް ފަރުވާ ކުރެވޭނެ އިންތިޒާމު ހަމަޖައްސައިދިނުމަށް ނިންމާ އެކަމަށް 30 މިލިއަން ރުފިޔާގެ ބަޖެޓެއް ހަމަޖައްސާފައިވެއެވެ. އަދި މި ފަރުވާއަށް ޝަރުތުހަމަވާ މީހުންގެ ލިސްޓު އާންމުކޮށް ދެވަނަ ބެޗު މިވަނީ ފަރުވާއަށް ތައްޔާރުވެފައެެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ އައިވީއެފް ފަރުވާ ހޯދުމަށް އާ ދޮރުތަކެއް ހުޅުވާލާފައެވެ. މީގެ ތެރޭގައި ދައުލަތުގެ ބަޖެޓުން އައިވީއެފް ފަރުވާއަށް ޚާއްޞަ ފަންޑެއް ޤާއިމުކުރުމާއި، ރާއްޖޭގެ މައި ހޮސްޕިޓަލް (އައިޖީއެމްއެޗް)ގައި އައިވީއެފް ފަރުވާ ދިނުމަށް ބޭނުންވާ ވަސީލަތްތައް ޤާއިމުކުރުން ހިމެނެއެވެ. މީގެ އިތުރުން، އައިވީއެފް ފަރުވާ ދިނުމަށް ބޭނުންވާ ޚާއްޞަ ޑޮކްޓަރުން ތަމްރީނުކުރުމުގެ މަސައްކަތްވެސް މިވަނީ ފެށިގެން ގޮސްފައެވެ. 

ދަރުމަވަންތަ ހޮސްޕިޓަލުގައި ދާދި ފަހުން ރައީސް ހުޅުއްވައިދެއްވި ފާޓިލިޓީ ސެންޓަރުގައި މިއަހަރުގެ ތެރޭ އައިވީއެފް ހަދަން ފެށުމަށްވަނީ ނިންމާފައެވެ. ގުދުރަތީ ގޮތުން ދަރިން ނުލިބޭނަމަ އެކަމަށް އޮތް ފަރުވާއަކީ އައިޔޫއައި އަދި އައިވީއެފް މެދުވެރިކޮށް ދަރިން ހޯދުމެވެ. މި ހޮސްޕިޓަލުން މި ދެ ޚިދުމަތްވެސް ލިބިގެންދާނެއެވެ.  ފާހަގަ ކޮށްލެވޭ އަނެއް ކަމަކީ އައިވީއެފް ފަރުވާ ރާއްޖެއާއި ރާއްޖޭން ބޭރުންވެސް ލިބޭނެ އިންތިޒާމު ހަމަޖައްސާފައިވާކަމެވެ. އެގޮތުން ރާއްޖޭގެ ރަށަކުން މާލެ އަންނަ ފަރާތެއްނަމަވެސް އަދި ރާއްޖެއިން ބޭރުން ފަރުވާ ހޯދާނަމަވެސް ތިބުމުގެ ޚަރަދާއި ކެއިން ބުއިމުގެ ޚަރަދު މިފަރުވާގެ ތެރެއިން ލިބޭނެ އިންތިޒާމު ހަމަޖެހިގެންދާނެ ކަމަށް އެންސްޕާއިންވަނީ ވިދާޅުވެފައެވެ. 

އައިވީއެފްއާއި އައިޔޫއައިގެ ޚިދުމަތް އާސަންދައިގެ ދަށުން ފޯރުކޮށްދިނުމަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވަޢުދުފުޅެކެވެ. މި ޚިދުމަތް ދިނުމާ ބެހޭ އުޞޫލެއް އެކުލަވާލައި މިދިޔަ ފެބްރުއަރީ މަހު ވަނީ ޢާންމުކޮށްފައެވެ. ރައީސްގެ މިވަޢުދުފުޅުގެ ދަށުން މިފަރުވާ ބޭނުންވާ 100 ދެމަފިރިއަކަށް މިއަހަރު އާސަންދަ މެދުވެރިކޮށް ފަރުވާ ކުރެވޭނެ އިންތިޒާމު ހަމަޖައްސައިދިނުމަށްވަނީ ނިންމަވާފައެވެ.

މި ފިޔަވަޅުތަކުގެ ސަބަބުން ކުރިއަށް އޮތް އަހަރުތަކުގައި ރާއްޖޭގައި އައިވީއެފް ފަރުވާ ހޯދާ މީހުންގެ އަދަދު ބޮޑުތަނުން އިތުރުވާނެކަމަށް ޞިއްޙީ ދާއިރާގެ މާހިރުން ލަފާކުރެއެވެ. މިކަމުގެ ސަބަބުން ގުދުރަތީ ގޮތުން ދަރިން ލިބުމުން މަހުރޫމްވެފައިވާ ފަރާތްތަކަށް ވަަރަށް ބޮޑު ހިތްހަމަޖެހުމެއް ލިބިގެންދާނެއެވެ.