މި ވަގުތު ސުކޫކުތަކަށް ފައިސާ ދައްކަން ޖެހުނަސް އެކަންކުރާވަރަށް ފައިސާ އެބަހުރި: ރައީސް

ސަރުކާރުން އަދާކުރަންޖެހޭ ސުކޫކުތަކަށް މިވަގުތު ފައިސާ ދައްކަން ޖެހުނު ނަމަވެސް، އެކަން ކުރެވޭނެ މާލީ ގާބިލުކަން ސަރުކާރުގައި އެބަހުރި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ 500 މިލިޔަން ޑޮލަރުގެ ސުކޫކު 8 އެޕްރީލް 2026 ގައި ދެއްކުމަށް ސަރުކާރުން މިހާރު ނިންމާފައިވާ ކަމަށެވެ.

ރައީސުލްޖުމްހޫރިއްޔާ ވިދާޅުވީ ސުކޫކު ދެއްކުމަށްޓަކައި 650 މިލިޔަން ޑޮލަރަށްވުރެ ގިނަ ފައިސާ މިހާރު ރައްކާކޮށްފައި އެބަހުރި ކަމަށެވެ. އަދި ރާއްޖޭގެ ގްރޮސް ރިޒާވް 1.27 ބިލިޔަން އެމެރިކާ ޑޮލަރަށް އަރާފައިވާކަން ފާހަގަކުރައްވައި، މިއީ ރާއްޖޭގެ ތާރީޚުގައިވެސް ގްރޮސް ރިޒާވް މިހާ މައްޗަށް ދިޔަ ފުރަތަމަ ފަހަރު ކަމަށް އެމަނިކުފާނު ވިދާޅުވިއެވެ.

ދައުލަތުގެ މާލީ ހާލަތާ ގުޅޭގޮތުން އިތުރަށް ތަފްސީލު ދެއްވަމުން ރައީސް ވިދާޅުވީ، "ރޭގެ ނިޔަލަށް އެސްޑީއެފްގައި 320 މިލިޔަން ޑޮލަރަށްވުރެ ގިނައިން އެބަހުރި ރައްކާކޮށްފައި، ޔޫސަބަލް ރިޒާވުގަ 330 މިލިޔަން ޑޮލަރަށްވުރެ ގިނަ ފައިސާ އެބަހުރި، އެހެންވީމަ ޖުމްލަ 650 މިލިޔަން ޑޮލަރަށްވުރެ ގިނަ ފައިސާ އެބަހުރި ރައްކާކޮށްފައި،" ކަމަށެވެ.

މިއަހަރަށް ބޭނުންވާ އިތުރު ފައިސާ ހޯދުމަށް ގިނަ މަސައްކަތްތަކެއް ކުރެވެމުންދާކަން ފާހަގަކުރައްވައި، ރައީސް ވިދާޅުވީ ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމަށެވެ. އަދި ބޭރުގެ މާލީ އިދާރާތަކާއެކު ކުރެވެމުންދާ މުޢާމަލާތްތައް ކާމިޔާބުކަމާއެކު ނިންމުމާ ގާތަށް ގޮސްފައިވާ ކަމަށްވެސް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ އިޤްޞާދު މެނޭޖްކުރަމުން ދަނީ ބޭރަށް ދައްކަންޖެހޭ ދަރަންޏާއި އެތެރޭގެ ދަރަނިވެސް ދެއްކޭނެ އިންތިޒާމުތަކާއެކު ކަމަށެވެ. ސުކޫކަށް ފައިސާ ދެއްކުމަށް ކަނޑައަޅާފައިވާ ތަވާލާ އެއްގޮތަށް ސަރުކާރުން މިހާތަނަށްވެސް ފައިސާ ދައްކަމުންދާކަން އެމަނިކުފާނު ފާހަގަކުރެއްވިއެވެ.