މެދުއިރުމަތީގެ ހަމަނުޖެހުމާއި ގުޅިގެން ރާއްޖޭގެ އިޤްތިޞާދަށް ކުރާ އަސަރުތައް ކުޑަކުރުމަށް ސަރުކާރުން އަންނަނީ މަސައްކަތްކުރަމުން: ރައީސް

މެދުއިރުމަތީގައި ފެށިފައިވާ ހަނގުރާމައިގެ ސަބަބުން ރާއްޖޭގެ އިގުތިޞާދަށް ކޮށްފާނެ ނޭދެވޭ އަސަރުތައް ކުޑަކުރުމަށް ކުރަންޖެހޭ މަސައްކަތްތައް ސަރުކާރުން ކުރަމުން އަންނަކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ހަނގުރާމަ ފެށުމާއެކު އެމަނިކުފާނު އެކުލަަވައިލެއްވި ވަޒީރުންގެ ކޮމިޓީން އެކި ދާއިރާތަކުން ކުރަންޖެހޭ މަސައްކަތްތައް މިހާރު ފަށާފައިވާ ކަމަށެވެ.

މެދުއިރުމަތީގައި ތިބި ދިވެހިންގެ ހާލަތާ ގުޅޭގޮތުން ރައީސް ވިދާޅުވީ، އެ ސަރަހައްދުގައި ދިރިއުޅޭ ދިވެހިންގެ ހާލަތު ސަރުކާރުން ވަރަށް ކައިރިން ބަލަމުންދާ ކަމަށެވެ. އަދި މިހާތަނަށް އެއްވެސް ދިވެއްސަކަށް އެއްވެސް ބާވަތެއްގެ ގެއްލުމެއް ލިބިފައިވާކަމުގެ ރިޕޯޓެއް ލިބިފައިނުވާކަން އެމަނިކުފާނު ފާހަގަކުރެއްވިއެވެ.

ރާއްޖޭގެ ފަތުރުވެރިކަމަށް ކުރާ އަސަރުތަކަށް އަލިއަޅުއްވާލައްވަމުން ރައީސް ވިދާޅުވީ، މެދުއިރުމައްޗަކީ ރާއްޖެއަށް އަންނަ ފަތުރުވެރިން މައިގަނޑު ގޮތެއްގައި ޓްރާންސިޓުކުރާ ސަރަހައްދަށްވާތީ، މި ހަނގުރާމައިގެ ސަބަބުން ދާއިރާއަށް ކުރާ އަސަރު ކުޑަކުރުމަށް ފިޔަވަޅުތައް އަޅަމުންދާ ކަމަށެވެ. އެގޮތުން ރާއްޖޭގައި ތާށިވެފައި ތިބި މީހުން ފުރުމަށް ބޭނުންވާ އެހެނިހެން ރާސްތާތައް ހޯދައިދިނުމާއި، ރާއްޖެއަށް އަންނަން ބޭނުންވާ ފަތުރުވެރިންނަށް މެދުއިރުމަތި ނޫން އެހެން ސަރަހައްދުތައް މެދުވެރިކޮށް ދަތުރުކުރެވޭނެ އިންތިޒާމުތައް ފަހިކުރުމަށް މަސައްކަތް ކުރަމުންދާ ކަމަށް ވިދާޅުވިއެވެ.

"އެހެންވީމާ އިރާދަކުރެއްވިއްޔާ ޓޫރިޒަމް ދާއިރާއިން އަންނަ އިމްޕެކްޓު ކުޑަކުރުމުގެ މަސައްކަތް ވަރަށް ކައިރިން ކުރިއަށް އެބަގެންދަން،" ރައީސް ވިދާޅުވިއެވެ.

މީގެ އިތުރުން، ރާއްޖެއަކީ ތެލަށް ބަރޯސާވުން ބޮޑު ގައުމަކަށް ވީނަމަވެސް، މި ހަނގުރާމައިގެ ސަބަބުން ތެޔޮ ލިބުމުގައި އެއްވެސް ދަތިކަމެއް ކުރިމަތިނުވާނެ ކަމުގެ ޔަގީންކަން ރައީސް ދެއްވިއެވެ. އަދި ކާބޯތަކެތި ލިބުމުގައިވެސް އެއްވެސް މައްސަލައެއް ކުރިމަތިނުވާނެ ކަމަށް ވިދާޅުވެ، ރައްޔިތުންނަށް ރައީސް ވަނީ ޔަގީންކަން އަރުވާފައެވެ.