ވީއައިއޭގައި ޖެއްސީ ހަނގުރާމަ މަތީ ބޯޓެއް ނޫން، އެއީ ސިވިލިއަން ފްލައިޓެއް: ރައީސް

ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގައި ޖެއްސީ ހަނގުރާމަ މަތީ ބޯޓެއް ނޫންކަމަށާއި، އެއީ ސިވިލިއަން ފްލައިޓެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، ވީއައިޭގައި ދާދިފަހުން ހަނގުރާމަ މަތީ ބޯޓެއް ޖެއްސިކަމަށް ބުނެ މީސްމީޑިއާގައި ދެކެވުނު ވާހަކަތަކާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަފުޅުދައްކަވަމުންނެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވެލާނާ އިންޓަނޭޝަނަލް އެއާޕޯޓުގައި އެމެރިކާގެ ހަނގުރާމަ މަތީ ބޯޓެެއް ޖައްސާފައިވާ މަންޒަރު ދައްކުވައިދޭ ފޮޓޯއާ ވީޑިއޯއެއް މީސްމީޑިއާގައި ދައުރުވަމުންދާތީ އެކަމާއި ގުޅިގެން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ރައީސް ވިިދާޅުވީ، އެ މައްސަލަ އެމަނިކުފާނުގެ  ސަމާލުކަމަށް އިސްފައިވުމާއެކު، އެކަމާއި ގުޅޭ މަޢުލޫމާތު ވަގުތުން ހޯދާފައިވާ ކަމަށެވެ. އަދި އެއީ އެމެރިކާގެ ސިވިލިއަން ބޯޓެއް ކަމަށް އެމަނިކުފާނު ވިދާޅުވިއެވެ.

މިކަމާއި ގުޅޭ އިތުރު މަޢުލޫމާތު ހިއްސާކުރައްވަމުން ރައީސް ވިދާޅުވީ، އެ ބޯޓު ވީއައިއޭގައި ޖެއްސުމުގެ ހުއްދަ މިދިޔަ ޖެނުއަރީ މަހުގެ 17 ވަނަ ދުވަހު ނަގާފައިވާ ކަމަށެވެ. ހަމަ އެހެންމެ، އެބޯޓު އެރޭ ފުރައިގެން ދިޔައީ ސީޝެލްގައި ޖައްސާފައި ތައިލެންޑަށް ކަމަށް ވެސް ރައީސް ވަނީ ވިދާޅުވެފައެވެ. އަދި އެ ބޯޓަކީ ހަނގުރާމައިގައި އުޅޭ ބޯޓެއް ނޫން ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.

ރައީސް އިތުރަށް ވިދާޅުވީ، އެ ފްލައިޓް ވެލާނާ އިންޓަރނޭޝަނަލް އެއާޕޯޓުގައި ޖެއްސުމަކުން ރާއްޖެއަށް އެއްވެސް ގެއްލުމެއް ނެތް ކަމަށެވެ.