ސިނަމާލެއާއި މާލެ ހިޔާ ފުލެޓުތަކުގެ ވެރިންނަށް ޖޫރިމަނާ މައާފުކޮށްދީ މާލީ އިނާޔަތެއް ދިނުމަކީ އެއްވެސް ޙާލަތެއްގައި ރިޝްްވަތެއް ނޫން: ރައީސް

ސިނަމާލެއާއި މާލެ ހިޔާ ފުލެޓުތަކުގެ ވެރިންނަށް ޖޫރިމަނާ މައާފުކޮށްދެއްވުމާއެކު މާލީ އިނާޔަތެއް ދެއްވުމަށް ނިންމެވި ނިންމެވުމަކީ އެއްވެސް ހާލެއްގައި ރިޝްވަތެއް ނޫންކަމަަށާއި، އެއީ އެމަނިކުފާނު ރިޔާސީ އިންތިހާބުގައި ހުށަހެޅުއްވި މެނިފެސްޓޯގައި ހިމެނޭ ވައުދުފުޅެއް ފުއްދެވުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ކުރިއަށް އޮތް ލޯކަލް ކައުންސިލް އިންތިހާބާ ގުޅުވައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

ރައީސް ވިދާޅުވީ މާލެހިޔާއާއި ސިނަމާލޭ ފުލެޓުތަކުގެ ވެރިންނަށް އިނާޔަތްތަކެއް ދެއްވުމުގެ ވާހަކައަކީ ރިޔާސީ އިންތިހާބުގެ ކެމްޕެއިން ތެރޭގައި ތަކުރާރުކޮށް ދައްކަވާފައިވާ ވާހަކަފުޅެއް ކަމަށެވެ. އެތަންތަނަކީ ޒަމާންވީ ތަންތަން ކަމަށާއި، އެކަށީގެންވާ ގޮތެއްގައި މަރާމާތުކޮށް އާބާތުރަފިލުވުމަށް މީގެ ކުރިން ކަންކަން ކުރެވިފައި ނެތްކަން ރައީސް ފާހަގަކުރެއްވިއެވެ. އަދި މި އަހަރުގެ ޖަނަވަރީ މަހުގެ ތެރޭގައި މި ފުލެޓުތަކުގެ ޖޫރިމަނާ މައާފުކުރުމާއި މާލީ އިނާޔަތް ދިނުމަށް ކެބިނެޓުން ނިންމާފައިވާ ކަމަށްވެސް ވިދާޅުވިއެވެ.

މި މަސައްކަތް މީގެ ކުރިން ނުކުރެވި ލަސްވީ މާލެ ސިޓީ ކައުންސިލުން އެކަށީގެންވާ އެއްބާރުލުން ނުލިބުމުން ކަމަށް ރައީސް ވިދާޅުވިއެވެ. ސޯޝަލް ހައުސިންތަކަށް އަރާފައިވާ ޖޫރިމަނާތައް މައާފުކުރުމަށް 2024 ވަނަ އަހަރު ނިންމައި، އެކަމާ ގުޅޭ އިރުޝާދުތައް ކަމާގުޅޭ ކައުންސިލްތަކަށް ފޮނުވާފައިވާނެ ކަމަށްވެސް އެމަނިކުފާނު ވިދާޅުވިއެވެ. ރައީސް ފާހަގަކުރެއްވި ގޮތުގައި މިއީ ރައްޔިތުންނަށް ލުއި ހޯދައިދިނުމަށް ކުރިންސުރެ ރޭވިފައިވާ ކަމެކެވެ.

ފުލެޓުތަކުގެ ހާލަތާ ގުޅޭގޮތުން ވާހަކަ ދައްކަވަމުން ރައީސް ވިދާޅުވީ މާލެހިޔާ އަދި ސިނަމާލޭ ފުލެޓުތައް ހުރީ ބޮލަށް ވެއްޓޭހައި ނާޒުކު ހާލަތެއްގައި ކަމަށެވެ. އެމަނިކުފާނު ވައުދުވެވަޑައިގަތް ގޮތަށް އައު ފުލެޓުތަކެއް އަޅައިދީ، އެތަންތަނަށް ބަދަލުވެވެންދެންވެސް ރައްޔިތުންނަށް ދިރިއުޅެވޭނީ ސަރުކާރުން މިފަދަ އެހީތެރިކަމެއް ފޯރުކޮށްދީގެން ކަމަށް ރައީސް ވިދާޅުވިއެވެ. ސަރުކާރުން ދޭ މާލީ އެހީއަކީ އެތަންތަން މަރާމާތުކޮށް ބެލެހެއްޓުމުގައި ރައްޔިތުންނަށް އެހީވުމަށް ދޭ ފައިސާއެއް ކަމަށްވެސް ވިދާޅުވިއެވެ.

ނިންމަވާލައްވަމުން ރައީސް ވިދާޅުވީ އެންމެ ފަހުން ފުލެޓުވެރިންނާއެކު ބޭއްވި ބައްދަލުވުމުގައިވެސް ހިއްސާކުރެއްވީ ސަރުކާރުން ކުރިން ނިންމާފައިވާ ނިންމުންތައް ކަމަށާއި، އެ ބައްދަލުވުމުގައި އަލަށް އެއްވެސް ކަމެއް ނުނިންމަވާ ކަމަށެވެ. ރައްޔިތުންނަށް ކުރިމަތިވެފައިވާ ބޮޑެތި ދަތިތަކާއެކު އެމީހުން ދޫކޮށްލުމަކީ ސަރުކާރުން ވެވޭނެ އިހުމާލެއް ކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.