އީރާނުގެ ހަމަލާތަކާއެކު ގަތަރާއި، ޔޫއޭއީ އަދި ކުވައިތަށް ބޮޑެތި ގޮވުންތަކެއްގެ އަސަރުކޮށްފި

އެމެރިކާ އާއި އިސްރާއީލުން އީރާނަށް ދެމުންދާ ހަމަލާތަކަށް ރައްދު ދިނުމުގެ ގޮތުން އީރާނުން ފަށާފައިވާ އަސްކަރީ ހަރަކާތްތަކުގެ ތެރެއިން، ވިދިވިދިގެން ތިންވަނަ ދުވަހު ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދުބާއީ އާއި ގަތަރުގެ ވެރިރަށް ދޯހާއަށް ބާރުގަދަ ގޮވުންތަކެއްގެ އަޑު އިވިއްޖެއެވެ.

ހޯމަ ދުވަހުގެ ހެނދުނުގެ ވަގުތެއްގައި ކުވައިތުން ވެސް ބާރުގަދަ ގޮވުންތަކާއި ސައިރަންގެ އަޑު އިވިފައިވާއިރު، އެމެރިކާ އެމްބަސީ ކައިރިން ދުން އަރަމުންދާ މަންޒަރު ފެނިފައިވާ ކަމަށް ރޮއިޓާސް ނިއު އެޖެންސީން ރިޕޯޓުކޮށްފައިވެއެވެ. ކުވައިތުގެ ރޫމައިތިއްޔާ އަދި ސަލްވާ ސަރަހައްދަށް އަމާޒުވި ގިނަ ޑްރޯންތަކެއް އެ ގައުމުގެ އެއާ ޑިފެންސް ސިސްޓަމްތަކުން ހުއްޓުވާފައިވާ ކަމަށް ކުވައިތު ނިއު އެޖެންސީން ވަނީ ބުނެފައެވެ.

މި ހަމަލާތަކުގައި މިހާތަނަށް ކުވައިތުން އެކަކު މަރުވެފައިވާއިރު، ޔޫއޭއީން ތިން މީހަކު މަރުވެ، ގަތަރުން 16 މީހަކު ވަނީ ޒަހަމްވެފައެވެ. އަނެއްކޮޅުން އެމެރިކާ އާއި އިސްރާއީލުން އީރާނަށް ދެމުންދާ ހަމަލާތަކުގައި މިހާތަނަށް އީރާނުން 201 މީހުން މަރުވެ 747 މީހުން ޒަހަމްވެފައިވާ ކަމަށް ރިޕޯޓުތައް ބުނެއެވެ. އިސްރާއީލުން ވެސް ނުވަ މީހަކު މަރުވެ 121 މީހުން ވަނީ ޒަހަމްވެފައެވެ.

މި ހާދިސާތަކާ ގުޅިގެން ބަހްރޭނުގެ އިންޓީރިއާ މިނިސްޓްރީން ވަނީ އެއާ ރެއިޑް އެލާޓްތައް އެކްޓިވޭޓްކޮށް، ރައްޔިތުން ރައްކާތެރި ތަންތަނަށް ދިއުމަށް އިލްތިމާސްކޮށްފައެވެ. އަދި މަނާމާ އާއި ކައިރި ރަށްތަކާ ގުޅުވައިދޭ ޝެއިޚް ޚަލީފާ ބިން ސަލްމާން ބްރިޖް ބަންދުކޮށް، ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ވަނީ އަންގާފައެވެ.

އެމެރިކާ، ބަހްރޭން، އުރުދުން، ކުވައިތު، ގަތަރު، ސައުދީ އަރަބިއްޔާ އަދި ޔޫއޭއީ ގުޅިގެން ނެރުނު ބަޔާނެއްގައި އީރާނުގެ ހަމަލާތައް ކުށްވެރިކޮށް، އަމިއްލަ ނަފްސުގެ ދިފާއުގައި އަޅަންޖެހޭ ހުރިހާ ފިޔަވަޅެއް އަޅާނެ ކަމަށް ވަނީ ބުނެފައެވެ. ނަމަވެސް އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނުން އަމާޒު ކުރަނީ ހަމައެކަނި އެމެރިކާގެ އަސްކަރީ މަރުކަޒުތަކަށް ކަމަށާއި، އަވަށްޓެރި ގަލްފް ގައުމުތަކާ ދެކޮޅަށް ހަމަލާ ދިނުމުގެ ގަސްތެއް ނެތް ކަމަށެވެ.

"އަޅުގަނޑުމެން މިކުރާ ކަމަކީ އަޅުގަނޑުމެންނަށް ދެމުންދާ އެމެރިކާގެ އުދުވާނަށް ރައްދު ދިނުމުގެ ގޮތުން ކުރާ ކަމެއް. އަޅުގަނޑުމެން ގަލްފްގެ އަޚުންނަކަށް ހަމަލާއެއް ނުދެން، ނަމަވެސް އަޅުގަނޑުމެން އަމާޒު ކުރަނީ އެމެރިކާގެ އަމާޒުތަކަށް،" އަރަގްޗީ އަލްޖަޒީރާއަށް ދެއްވި އިންޓަވިއުއެއްގައި ވިދާޅުވިއެވެ.